ب / دويف بەلگە و دەليلێت بەر دەستێ مە ژ قورئان و حەديسان دەنگێ ژنێ نەعەورەتە و نەيێ حەرامە و سەحابان گول دەنگێ ژنان دبوو و ژن دهاتنە دەف پێغەمبەرى (سلاڤێت خودێ لێ بن) و دەف زەلامان پسيارا دينێ خۆ دكرن و پێغەمبەرێ خودێ (سلاڤێت خودێ لێ بن) بەرسڤا وان دا و نەدگۆتە وان نابيت دەنگێ هەوە بگەهيتە گوهێت زەلامان چونكى دەنگێ هەوە عەورەتە و يێ حەرامە. و دايكا مە عائيشا (خودێ ژێ رازی بیت) ئێك ژ پێنج سەحابانە يێت پتر حەديس بۆ مە ژ پێغەمبەرێ خودێ (سلاڤێت خودێ لێ بن) ڤەگوهاستين و ئەڤ حەديسە بۆ زەلامان دگۆتن، و زەلام دچۆن پسيار ژێ دكرن و بەرسڤا وان ددا، هەرهۆسا هەمى دايكێت دى يێت مە موسلمانان خودآ ژ وان رازى بيت، و كەسێ دەنگێ ژنێ نەدورست نەدانايە، و قورئانێ چەند ديمەن يێت بۆ مە ئيناين دەنگێ ژنێ و زەلامى تێدا، وەكى وێ دان و ستاندنا د ناڤبەرا مووسا پێغەمبەري (سلاڤێت خودێ لێ بن) و كچا شوعەيب پێغەمبەريدا چێ بووى، يان ئەو دان و ستاندنا د ناڤبەرا خويشكا مووسا پێغەمبەرى (سلاڤێت خودێ لێ بن) و مرۆڤێت فيرعەونيدا چێ بووى، بەس نەيا دورستە ژن نازك و نازداري دگەل زەلامان باخڤيت، ئەو نازك و نازدارى نامێت خەلەت بۆ يێ بەرامبەر بهنێريت و شەيتان دلێ وى خەلەت بكەت و بەر خەلەتيێرا ببەت، خودێ مەزن دبێژيت: ((يَا نِسَاءَ النَّبِيِّ لَسْتُنَّ كَأَحَدٍ مِنَ النِّسَاءِ إِنِ اتَّقَيْتُنَّ فَلَا تَخْضَعْنَ بِالْقَوْلِ فَيَطْمَعَ الَّذِي فِي قَلْبِهِ مَرَضٌ وَقُلْنَ قَوْلًا مَعْرُوفًا)) ئانكو: گەلى ژنێت پێغەمبەرى هوين نەوەكى چو ژنكێت دينە، ئەگەر هوين تەقوا خودێ بكەن، ڤێجا ئاخفتنا خۆ ب نازكى نەكەن وەختێ هوين دگەل زەلامان دئاخڤن، دا ئەوێ نەساخى و خرابى د دليدا هەى تەمايى نەكەفتە دلى، و ئاخفتنەكا عەدەتى باخڤن. پشتى ڤێ رۆنكرنێ دێ هێين ئاخفتنێت زانايان ئينين ل سەر دەنگبلندكرنا ژنێ ب قورئان خواندنێ، ئبن حەزمێ زاهرى (خودێ ژێ رازی بیت)، دبێژيت: بۆ ژنێ هەيە دەنگێ خۆ بلندكەت ـ بيانى ل وێرێ هەبن يان نە ـ و هندە زانايێت دى دبێژن: هەكە يێت وێرێ ژن بن يان ژى مەحرەمێت وێ بن، دێ دەنگێ خۆ بلندكەت، و هەكە بيانى ژ زەلامان ل وێرێ بن، دێ دەنگێ خۆ نزمكەت، بەلێ ب راستى ئەز بۆچۆنا ئبن حەزمى(خودێ ژێ رازی بیت)، ب هێزتر و دورستر ددانم، چونكى مە چو بەلگە و دەليل نە ژ قورئانێ نە ژ حەديسێ نينن بێژن دەنگێ ژنێ يێ حەرامە و دڤێت زەلامان گولێ نەبيت، و خودێ چێتر دزانيت.
