ب / كچا موسلمان نابيت وى تشتى بخوازيت يێ گونەه و بێ ئەمريا خودێ و پێغەمبەرى تێدا، ئەڤە تشتەكێ نەجوانە و دڤێت گوهێ خۆ نەدەتە چاڤلێكرنێ، و هەكە خواستيێ وێ يێ سست بيت بڤێت حەلەقا زێرى بكەتێ بلا بێژتێ نەخێر وەنەكە ئەڤە يا خەلەتە من دڤێت تو تشتێ حەرام نەكەى، و گوهێ خۆ نەدە خەلكێ بێ ئەمريا خودێ و پێغەمبەرى نەكەى، ئها دڤێت كچا موسلمان يا هۆسا بيت، و هەكە ژ خواستيێ خۆ خواست ژى دڤێت ئەو گوهێ خۆ نەدەتێ، چونكى پێغەمبەر (سلاڤێت خودێ لێ بن) دبێژيت: ((لا طاعَة لِبَشَرٍ فِي مَعْصِية اللَّهِ))، و نابيت گوهداريا كەسێ بێتەكرن د بێ ئەمريا خودێدا، و هەكە گوهێ خۆ دايێ گونەه بۆ هەردووكانە و ئەڤە دەسپێكەكا نەيا جوانە بۆ هەردووكان د ئاڤاكرنا هێلين و مالا خۆدا. بەرێ خۆ بدێ دەمێ پێغەمبەرێ خۆشتڤى (سلاڤێت خودێ لێ بن) گوستيركەكا زێرى د دەستێ ئێكيدا ديتى چ گۆتێ، ئيمام موسلم د سەحيحا خۆدا ژ ئبن عەباسى (خودێ ژێ رازی بیت) ڤەدگێريت دبێژيت: پێغەمبەرێ خودێ (سلاڤێت خودێ لێ بن) گوستيركەكا زێرى د دەستێ زەلامەكى ديت، كێشا و هاڤێت و گۆت: ئێك ژ هەوە ئەو ب خۆ دێ قەستا پەلەكى ژ ئاگرى كەت و دێ كەتە دەستێ خۆ، گۆتنە وى زەلامى پشتى پێغەمبەرێ خودێ (سلاڤێت خودێ لێ بن) چۆى، گوستيركا خۆ راكە و بۆ خۆ فايدە ژێ بكە، گۆت: نە ب خودێ پشتى پێغەمبەرێ خودێ (سلاڤێت خودێ لێ بن) هاڤێتى قەت ئەز ناراكەم. بەرێ خۆ بدێ پشتى ڤى ئەمرێ هۆسا يێ ئاشكرا چاوا تو ژێ دخوازى ئەو گوستيركا زێرى بكەتێ؟! يان حەتا هەما حەزدكەى؟! و چاوا ئەو سستيێ دكەت و گوستيركا زێرى دكەتە دەستێ خۆ؟!، و خودێ چێتر دزانيت
