ب / بەس خويشكا تە ئەوا شيرێ وێ مالێ خوارى دبيتە كچا وان يا شيرى، و نابيت ئەو شى ب كەسێ ژ وێ مالێ بكەت، هەمى پسمامێت وێ، نە بەس ئەو تنێ يێ شيرێ وى خوارى هەمى دبنە برايێت وێ، و ل سەر خويشكا تە حەرامن، و خوارزايێت وێ مالێ بۆ دبنە خوارزا، و هەمى برازا بۆ دبنە برازا، هەلبەت يێت شيرى، و خالێت وێ مالێ دبنە خالێت وێ يێت شيرى، و هۆسا و كا چ ب خوينێ ل سەر د حەرامن هەر ئەو ب شيرى ل سەر دحەرامن. پێغەمبەر (سلاڤێت خودێ لێ بن) دبێژيت: ((يحرم من الرضاعة مايحرم من النسب)) ئانكو ب رێكا دەيبابان كا چ ل سەر مرۆڤى حەرام دبن خويشك و مەت و خالەت و برازا و خوارزا هۆسا ب رێكا شيرى ژى عەينى تشتى كچ و كورێت وێ ژنێ هەمى دبنە خويشك و برايێت مرۆڤى و عەيالێ وان كچ و كورا دبنە خوارزا و برازايێت مرۆڤى و مەت و خالەتێت وان كچ و كوران دبنە خالەت و مەت بۆ مرۆڤى. ب كورتى: خويشكا تە دبيتە كچا وێ مالێ و هەمى عەيالێ وان دبنە خويشك و برايێت وێ، بەلێ خويشك و برايێت خويشكا تە ئەوێت شيرێ وێ مالێ نەخوارين چو پەيوەندى دگەل وان نينە و بۆ ئێك د دورستن، ڤێجا بۆ تە هەيە تو شوى ب هەر كورەكێ مامێ خۆ بكەى و برايێت تە ژى دشێن دۆتمامێت خۆ بۆ خۆ بينن، و خودێ چێتر دزانيت.
