ب / دەستپێكێ ئەم دوعا هيدايەتێ و راستەرێكرنێ بۆ ڤێ خويشكێ دكەين و خودێ شرينيا ئيمانێ و ڤەهەسيان و دلرەحەتيێ بێخيتە د دلێ وێدا، راستە خودێ مەزن دبێژيت: پشك و بارێت خۆ ژ دنيايێ ژبير نەكە، بەلێ هەر بەرى ڤێ ئاخفتنێ دبێژيتە مە: هەرتشتێ خودێ ژ دنيايێ دايەتە ئاخرەتێ پێ بخوازە، دبێژيت: ((وَابْتَغِ فِيمَا آتَاكَ اللَّهُ الدَّارَ الْآخِرَةَ وَلَا تَنْسَ نَصِيبَكَ مِنَ الدُّنْيَا وَأَحْسِنْ كَمَا أَحْسَنَ اللَّهُ إِلَيْكَ وَلَا تَبْغِ الْفَسَادَ فِي الْأَرْضِ إِنَّ اللَّهَ لَا يُحِبُّ الْمُفْسِدِينَ)) و ب وى تشتێ خودێ دايە تە، ئاخرەتێ بخوازە و بارا خۆ ژ دنيايێ ژى ژبير نەكە، و كا چاوا خودێ قەنجى دگەل تە كريە، تو ژى وەسا قەنجيێ دگەل بەندەيێت وى بكە، و ل دويف خرابيێ نەگەرە، ب راستى خودێ حەژ خرابيكەران ناكەت.
و ئەم دبێژينە ڤێ خويشكا ئەوا دبێژيت ئەز دەستپێكێ مژويلى كارێ ئيسلامخوازيێ بووم و ئەز يا ژ خۆ رازي بووم نوكە ئەز ژبەر خواندنێ يا مژويلم و نەشێم ب وى كارى رابم يێ بەرى هنگى پێ رادبووم و دويف گۆتنا وآ، مانێ دڤێت هەڤسەنگيێ د ناڤبەرا دنيايێ و ئاخرەتێدا چێكەت دەست ب خواندنێ كر و ئەركێ خۆ يێ بانگهەلدێريێ هێلا، تو دورست د بانگهەلدێريێ نەگەهشتى و تە هەڤسەنگى و تەوازن ژى د ناڤبەرا دين و دنيايێدا نەپاراست، بانگهەلدێرى و ئيسلامخوازى ئەوە هەرجهێ مرۆڤ لێ بيت مفاي بگەهينيت و يێ ب مفابيت، و وەكى بارانێ بيت هەرجهێ بكەڤيتێ مفاى بگەهينيت نەخاسمە خودێ مەزن دبێژيتە هەمى خواندەڤانان بخوينن و بلا خواندنا هەوە ب ناڤێ خودێ بيت و بۆ خودێ بيت: ((اقْرَأْ بِاسْمِ رَبِّكَ الَّذِي خَلَقَ)) و تو يا چۆيە كوليەكا پيرۆز، ئيمامێ شافعي (خودێ ژێ رازی بیت) زانينا نوژداريێ دئينيتە بەرامبەر زانينا شەريعەتى و هەردووكان هەڤال و هەفكويف و هەڤالجەمك ددانيت، دبێژيت: (العلم علمان علم الابدان وعلم الاديان) و چۆنا تە بۆ وآ كوليێ دڤێت تو نەدانى بۆ دنيايێيە ل ئنيەتا خۆ بزڤرە و چۆنا خۆ بۆ خودێ بدانە و بلا مەخسەدا تە ئەو بيت خزمەتا موسلمانان بكەى، پشتى تو دەردكەڤى و تەخەروج دبى و خزمەتا ژنان تايبەت بكەى و بەردەواميێ بدەيە بانگهەلدێريا خۆ و تو قوتابى د ناف هەڤالێت خۆ يێت خواندنێ بلا گەنجێت مە ئنيەتا خۆ دورست بكەن هەرجهێ لێ بن، بلا بۆ خودێ بيت چ كوليا شەريعەتى بن يان ئەندازياريێ يان نوژداريێ و خۆ ژ دەعوە و بانگهەلدێرى و ئيسلامخوازيا خۆ نەڤەقەتينن، و ئەو دشێن د مينبەر و د بازنێ دەعوێدا بژين ب ئنيەتا خۆ و ب رابوونا كارێ بانگهەلدێريێ د ناف وى بازنێ ئەو د ناڤدا، و ئەو سستيا تو هەست پێ دكەى و كێم پێگريا تە ئەگەرێ دويركەفتنێيە ژ وێ ژينگەها تو تێدا دەمێ تە خۆ ژێ دوير ئێخستى تە باج و خويك دا، ئەو ژى ئەڤەيە سستى و دوودلى و دلنەرەحەتى و ئەڤە ژى ئەنجامەكێ ئاساييە يێ ژينگەها ديندار بهێليت و ژێ دويركەڤيت، چونكى پێغەمبەر (سلاڤێت خودێ لێ بن) دبێژيت هەروەكى بوخاري و موسلم ژ ئەبو مووسا (خودێ ژێ رازی بیت) ڤەدگێرن دبێژيت: پێغەمبەر (سلاڤێت خودێ لێ بن) دبێژيت: (الْمُؤمنُ للْمُؤمِن كَالْبُنْيانِ يشدُّ بعْضهُ بَعْضاً وَشَبَّكَ بَيْنَ أَصَابِعِه) خودان باوەر بۆ خودان باوەرى وەكى ئاڤاهينە، ئێكدوو دگرن، و تلێت خۆ كرنە د ناڤێكدا. ڤێجا هەكە ئەم د ناف واندا نەبين چاوا دێ هێينە پاراستن، و دڤێت ئەم بزانين شەيتان گورگێ مرۆڤانە، وى مرۆڤى نێچير دكەت يێ ڤەدەربيت وەكى گورگێ پەزى، پێغەمبەر (سلاڤێت خودێ لێ بن) دبێژيت: (فَعَلَيكُمْ بِالجَمَاعَة، فَإِنَّمَا يأْكُلُ الذئْبُ مِنَ الغَنمِ القَاصِية) هشيارى جەماعەتێ بن، ب راستى گورگ ژ پەزى يا ڤەدەر دخۆت. ڤێجا دەمێ تە خۆ ڤەدەركرى تو بوويە نێچيرەكا ب ساناهي بۆ شەيتانى و شيا گوهۆرينا بێخيتە تە، و چارە ئەڤەيە تو بزڤريەڤە دا ژ شەيتانى قورتال ببى و ژ خۆ رازى ببيەڤە. پێغەمبەر (سلاڤێت خودێ لێ بن) د حەديسەكا ديدا ڤێ رامانێ مسۆگەر دكەت، دبێژيت: (عليكم بالجماعة فإن الشيطان مع الواحد وهو من الإثنين أبعد) دگەل كۆمێ بن و شەيتان يێ دگەل ئێكى و ژ دوويان دويرترە، و بزانە يێ خۆشيا بەحەشتێ بڤێت دڤێت دگەل موسلمانان بيت، و د ڤێ رامانێدا پێغەمبەر (سلاڤێت خودێ لێ بن) دبێژيت: (فَمَنْ أَرَادَ مِنْكُمْ بُحْبُوحَە الْجَنَّە فَلْيلْزَمِ الْجَمَاعَة فَإِنَّ الشَّيْطانَ مَعَ الْوَاحِدِ وَهُوَ مِنَ الاثنَيْنِ أَبْعَدُ) يێ نيڤا بەحەشتێ و جهێ برنجى ژێ دڤێت بلا موسلمانان بگريت، ب راستى شەيتان يێ دگەل ئێكى و ئەو ژ دووان دويرترە. و ئەو هزر و ئاوازێت خەلەت و كرێت و دلێ تە بۆ دئێشيت و تو دترسى تە ژ دينى دەربێخن ژ شەيتانينە و ژ وەسواسا وينە و خودێ مەزن دبێژيت: ((وَإِمَّا يَنْزَغَنَّكَ مِنَ الشَّيْطَانِ نَزْغٌ فَاسْتَعِذْ بِاللَّهِ إِنَّهُ هُوَ السَّمِيعُ الْعَلِيمُ)) هەر وەختەكێ وەسواسەك ژ شەيتانى بگەهيتە تە، خۆ ب خودێ بپارێزە، ئانكو بێژە: "أَعُوذ بِاللَّهِ مِنَ الشَّيْطانِ الرَّجِيمِ ". ئانكو: يا خودێ ئەز خۆ ب تە دپارێزم ژ شەيتانێ تە ژ دلۆڤانيا خۆ دوير ئێخستى. ڤێجا چارە ئەڤەيە ئەم هەوارا خۆ بگەهينينە خودێ مەزن مە ژ وەسواس و ئاواز و بانگ و ئاريانا وى بپارێزيت، و بلا مرۆڤ بزانيت هندى مرۆڤ ڤان هزران نەكەتە كريار و نەئينيتە سەر ئەزمانێ خۆ و پێ نەئاخڤێت مرۆڤ يێ د خێرێدا و نە د مەترسيێدا و چو تشێ ترس ل سەر ئيمانا مرۆڤى نينە و مرۆڤ ب ئانەهيا خودێ گاور نابيت.
هەڤالێت پێغەمبەرێ خۆشتڤى (سلاڤێت خودێ لێ بن) هاتنە دەف، گۆتن: ئەى پێغەمبەرێ خودێ.. هندە هزر بۆ مە چێ دبن ئەم شەرم دكەين و دترسين بينينە سەر ئەزمانێ خۆ، ئينا پێغەمبەرێ خۆشتڤى (سلاڤێت خودێ لێ بن) گۆتە وان: ئەڤە ژى هەوە ديتيە، ب راستى ئەڤە ژ دورستە باوەريێيە، چونكى ئەو د پێ نەخۆشن و ئەڤە نيشانا باوەريێيە، و هەكە باوەرى پێ هەبا ب خەم نەدكەفتن و دلێ وان نەدئێشا و ئەو هزر مەزن نەدديتن.
ڤێجا ئەز دبێژمە ڤێ خويشكێ: هندى تو ڤان هزرا نەئينى سەر ئەزمانێ خۆ و نەكەيە كار، نەترسە تو يا ل سەر خێرێ و چو ترس ل سەر ئيمان و باوەريا تە نينە، و ئەو دلئێشيا تە نيشانا باوەريا تەيە و هەڤركيەكا د ناڤبەرا تە و شەيتانيدا يا هەى هندى تو وى پاشڤە ببەى و نەهێلى وان هزران بكێشيتە سەر ئەزمانێ تە تو يا سەركەفتى و تو يا خودان باوەرى، و ب ئانەهيا خودێ دێ باوەريا تە پارێزيت و تە سەرئێخيت، و خودێ چێتر دزانيت.
