ب / تێگەهشتنا زەلامێ تە تێگەهشتنەكا خەلەت و نەيا دورستە، هەكە زارۆكێت هەوە دويف ئێك دهێن و ساخلەميا تە ژى نەيا دورستە، بۆ هەوە هەيە هوين وان ئەگەر و رێكا وەرگرن يێت زارۆكان بۆ دەمەكێ دياركرى گيرۆكەن، ئەم ژبير نەكەين خودێ مەزن د قورئانا خۆ يا پيرۆزدا دەمێ حەملێ و شيردانا بچويكى دكەتە دوو سال و نيڤ دبێژيت: ((وَحَمْلُهُ وَفِصَالُهُ ثَلَاثُونَ شَهْرًا)) هەلگرتنا وى هەتا شيرڤەكرنا وى سيه هەيڤن. و د ئايەتەكا ديدا بەس شيرڤەكرنا وى ب تنێ دوو سالان ددانيت: ((وَوَصَّيْنَا الْإِنْسَانَ بِوَالِدَيْهِ حَمَلَتْهُ أُمُّهُ وَهْنًا عَلَى وَهْنٍ وَفِصَالُهُ فِي عَامَيْنِ أَنِ اشْكُرْ لِي وَلِوَالِدَيْكَ إِلَيَّ الْمَصِيرُ)) و مە ئەمرێ مرۆڤان كر دگەل دەيبابێت خۆ د باش بن نەخاسمە دگەل دەيكێ، نەخۆشى و بێ تاقەتى ل دويف نەخۆشى و بێ تاقەتيێ پێ برن دەمێ د زكيدا، و دوو سالان ل سەرێك شير دايێ ژ نوى ژ شيرڤەكر، و مە گۆتێ: شوكرا من بكە من تو دايى، و شوكرا دەيبابێت خۆ بكە تو خودانكرى، و هوين هەر دێ ب بال منڤە زڤرن. ل ڤێرێ ديار دبيت بچويكبوون دويف ئێك و ئەڤ دەمە نەكەڤيتە د ناڤبەرا واندا دبيت رەوشەكا ساخلەم و دورست نەبيت، لەوا فەرە هوين ئەگەران ب كار بينن پاشى بێژن ب هيڤيا خودێ و يا خودێ ڤيايى هەر دێ چێبيت. د بوخارى و موسلمێدا هاتيە سەحابان (خودێ ژێ رازی بیت) پسيار ژ پێغەمبەرى (سلاڤێت خودێ لێ بن) كرن ژ رێتنا ئاڤا خۆ دەرڤەى مالبچويكى گۆت: چو بەرتەنگى ل سەر هەوە نينە، نينە جانەك خودێ دابيت هەتا رۆژا قيامەتێ و نەبيت. بەرێ خۆ بدێ ئەڤەيە تێگەهشتنا دورست، پێغەمبەرى (سلاڤێت خودێ لێ بن) نەگۆتە وان وەنەكەن يا خودێ نڤێسى هەر دێ هێت.. بەلێ گۆتێ: چو نينە هوين وەبكەن و نەگونەهە و دگەل وێ ژى بزانن ئەو روحا خودێ ڤياي هەبيت دێ هەبيت، و خودێ چێتر دزانيت.
