ب / هەكە ژن يا گوهداربيت بۆ زەلامێ خۆ و ركى وى نەرابوويە و مافێت وى يێت داينێ و نەگوهدارى ژێ چێنەبوويە.. بۆ زەلامێ وێ نينە ئەو خۆ ژ نڤينا وآ بدەتە پاش، و چاوا دڤێت ژن زەلامێ پاك راگريت وەسا دڤێت زەلام ژى مافێ نڤينێ بدەتێ و پاك راگريت، و بەلێ هەكە ژنێ خۆ ل سەر مەزن كر و يا نەگوهداربيت و ب مافێ وى نەرابيت يان ئەمرێت خودێ و پێغەمبەرى (سلاڤێت خودێ لێ بن) سستيێ تێدا بكەت، هنگى دورستە زەلام هەلبەت پشتى قويناغا ئێكێ يا تۆرئێخستنێ بۆرى بيت، ئەو ژى وەعز و شيرەتكرنە، هەكە ب ڤێ قويناغێ راببيت و فايدە نەكربيت بۆ هەيە قويناغا دووێ خۆ ژ نڤينا ژنێ ڤەگێريت بەلێ هەتا چ دەم؟! هندە زانا دبێژن: هەكە ژن نەڤەگەريا.. بۆ هەيە هەتا هەيڤەكێ خۆ ژ نڤينێ بدەتە پاش، بەلێ ب راستى چو بەلگە بۆ مە نەهاتينە كا دەمێ ڤێ قويناغێ چەندە، و بۆچۆنا ژ هەميان دورستتر ئەڤ دەمە دويف رەوشا ژنێ دمينيت هەكە دەمەكى كێشا تێدا دێ زيان گەهيتە ژنێ و بێهنا خۆ فرەناكەت و دبيت ئەڤ خۆڤەگرتنە وێ بكێشيتە خەلەتيەكا مەزن دەرڤەى چارچۆڤ و بازنێ حەلال و ژن و مێرينيێ هنگى نابيت درێژببيت و د هەمى رەوشاندا نابيت چار هەيڤان ببۆريت، هەكە چار هەيڤان خۆ ڤەگرت بۆ ژنێ هەيە بچيتە دەف دادوەرى و شكياتێ لێ بكەت و حاكم دێ ل سەردانيت يان مافێ وێ يێ نڤينێ بدەتێ يان ژى بەردەت، و خودێ چێتر دزانيت.
