ب / هەكە نڤێژان ژ بێ باوەرى نەكەت، ئێك گۆتن ل دەف هەمى زانايان بێ جوداهي نەموسلمانە.. بلا د ناسنامێدا موسلمان هاتبيتە نڤێسين و نابيت چو كچێت موسلمان شوى پێ بكەن، چونكى خودێ مەزن دبێژيت: ((لَا هُنَّ حِلٌّ لَهُمْ وَلَا هُمْ يَحِلُّونَ لَهُنَّ)) نە ژنێت موسلمان بۆ گاوران حەلالن و نە ئەو بۆ ژنێت موسلمان حەلالن، بەلێ هەكە ژ خەمسارى نەكەت و باوەريا هەى.. دويف بۆچۆن و گۆتنا دورستتر ژ گۆتنێت زانايان نەگاورە و ژ ئيسلامێ نادەركەڤيت، و هەكە ڤى ژن ئينا و ئێكێ شوى پێ كر ماركرن يا دورستە و حەرام نينە، بەلێ بريارەكا دورست نينە و هەلبژارتنەكا باش نينە، چونكى تشتێ ژ هەميان پێدڤيتر كچ چاڤێ وێ لێ بيت و دەست ژێ بەرنەدەت سنج و ئەخلاق و ديندارى و چاكى و كێرهاتن و جوامێريە، چونكى ئيسلامێ ئەمرێ كچ و كوران يێ كرى خەما چاكى و باشى و دينداريێ بخۆن. پێغەمبەر (سلاڤێت خودێ لێ بن) دبێژتە كچان و يێت ژ وان بەرپرس ژ باب و برايان: (إذا جاءكم من ترضون دينه وخلقه فأنكحوه إلا تفعلوه تكن فتنە في الأرض وفساد عريض) گەلى دايبابان و سەركارێت كچان.. هەكە ئەو هات كچێت هەوە بخوازيت يێ هوين ژ دين و ئەخلاقێ وى رازى.. بدەنێ، و هەكە وەنەكەن دێ بەلا و خرابيەكا مەزن د عەرديدا چێبيت. هەژيە بێژين پێغەمبەرى (سلاڤێت خودێ لێ بن) سێ جاران ئەڤ ئاخفتنە دوبارەكر.
ڤێجا خويشكا هێژا بلا داخازا تە كۆرەك بيت دنيا تە و ئاخرەتا تە مسۆگەركەت، و چو ژ وان ژ دەستێ تە نەبەت، ما بۆچيە تو شوى ب ئێكى بكەى تژى تل و دەست و ستۆيێ تە زێركەت و ب زێرى بوەرينيت و قيامەتا تە ژ دەستێت تە ببەت و تو ژ ئاخرەتا خۆ خوسارەت ببى، هەكە تە وەكر ب راستى ئەڤە نەخۆش هەلبژارتن و ژێ گرتنە، و خودێ چێتر دزانيت.
