ب / مافێ كچێ وەكى مافێ كوريە و چو جوداهي د ناڤبەرا هەردووكاندا نينە، چونكى پێغەمبەرى (سلاڤێت خودێ لێ بن) ل سەر هەردووكان وەكى ئێك زانين دانايە، دبێژيت هەروەكى د حەديسەكا دورستدا هاتيە (طلَبُ الْعِلْمِ فَريضة على كل مُسْلِمٍ) داخوازكرنا زانينێ واجبە ل سەر هەر موسلمانەكى ـ چ كور بيت چ ژى كچ ـ و زانين ل ڤێرێ هەمى زانستان دگريت نەبەس زانينا شەرعى ب تنێ، هەرچەندە ياشەرعى بەرى هەميان دهێت، و ژنا موسلمان ل چو ئاستا نەراوەستيايە و گەلەك ژ وان ئاستێت بلندێت بلندبوون وەكى هەڤژينێت پێغەمبەرى (سلاڤێت خودێ لێ بن) دايكێت مە موسلمانان زانينا وان ل ئاستەكێ هندێ بلند بوو سەحابى يێت مەزن هەوجەدبوونێ و پسيارێت خۆ ژ وان دكرن، ما كى دگەهشتە ئاستێ هەرچار خەليفەيان ئەبو بەكر هەتا ئيمام عەلى خودێ ژ هەميان رازى بيت، هەوجەى دايكێت مە موسلمانان دبوون و پسيارێت خۆ ژێ دكرن، و گەلەك زانايێت ناڤدار باوەرنامە ژ مامۆستايێت كچ وەرگرتينە و شانازيێ ژى پێ دبەن، و د كتێبێت خۆدا د ڤەگێران، و ڤەگوهاستنا حەديسێدا ئەڤە نەياڤەشارتيە، وەكى: خەتيبێ بەغدادى و حافز ئبن عەساكر و ئبن حەجەر و وتەقيودينێ فاسى، بەلێ دڤێت ئەم بزانين مە دوو جوينێت زانينێ يێت هەين، ئێك: ئەم هەمى ژن و مێر و كچ و كور تێدا هەڤپشكين و دڤێت هەردوو ئاستێ ئێك و دوو بزانن ئەو ژى زانينا واجب ل سەر هەر موسلمانەكى (فرض عين) وەكى ئەو عيبادەتێ ل سەر مە هەميان واجب، و نياسينا خودێ دڤێت د ڤى جوينێ زانينێدا هەردوو وەكى ئێكن، جوينێ دووێ: دبێژنێ (فرض الكفاية)، ئانكو ئەو زانينا دڤێت د ناف مە موسلماناندا هەبيت و هەكە هندەك پێ رابوون بەسە و پێدڤى ناكەت هەمى پێ رابن، وەكى: زانينا فيزيايێ دڤێت د ناف مەدا هەبيت و دڤێت هندەك هەبن بگەهنە ئاستێ دويماهيێ يێ ڤێ زانينێ و هەكە ئەڤە ب جه هات مەرج نينە هەمى موسلمان بگەهنە وى ئاستى، ڤێجا ئەڤێ پێ رابووى چ كچ بيت چ كور، و هۆسا كچ و كور د زانينا (فرض الكفاية)دا ژى وەكى ئێكن، بەلێ دڤێت كچ د رێكا زانينێدا ئەحكام و فەرمانێت شەرعى د هەڤكارى و دەركەفتنێدا بەرچاڤ وەرگريت و پێگريێ پێ بكەت، و خودێ چێتر دزانيت.
