ب / دڤێت هەرئێك مافێ خۆ و ئەركێ خۆ ژى بزانيت، نە ئەركێ خۆ بهێليتە عەردى و سستيێ تێدا بكەت، و نە ژ مافێ خۆ زێدەتر بخوازيت، و يا دورستتر ئەوە دايكا تە قەدرێ خەسويا خۆ ژبەر خۆ گرتبا؛ دا پاشەرۆژێ بويكێت وێ قەدرێ وێ گرتبان، چونكى وەكى مەزن دبێژن: يا ڤى دەستى بۆ ڤى دەستى ناچيت، و د ڤى بابەتيدا ئەنەس (خودێ ژێ رازی بیت) دبێژيت: پێغەمبەرێ خودێ (سلاڤێت خودێ لێ بن) گۆت: نينە جەحێلەك قەدرێ دانعومرەكى بگريت، هەكە خودێ وى بۆ پەيدا نەكەت، يێ قەدرێ وى ل ژيێ وى دانعومرى بگريت. ڤێجا هەركەسێ ئەڤرۆ گازندان ژ بويك و زارۆكێت خۆ دكەت بلا هزرا خۆ بكەت كا ئەو دگەل دايبابێت خۆ و بويكێت خۆ يێ چاوا بوو، و هەركەسێ دڤێت داكەفتنێ قەدرێ وى بێتەگرتن بلا حەديسا پێغەمبەرى (سلاڤێت خودێ لێ بن) ب جه بينيت و قەدرێ داكەفتيا بگريت دەمێ ئەو ل سەر خۆ؛ دا خودێ وان بۆ پەيداكەت يێت قەدرێ وان بگريت دەمێ دادكەڤن، و بۆ هەوە هەيە هوين ب نەرمى و جوان بێژنە دايكا خۆ: ئەڤە يا خەلەتە و نەيا دورستە، بەلێ نابيت هوين دايكا خۆ پاشڤە ببەن و زڤر دگەل باخڤن، و هەكە هوين ژ چارچۆڤێ سنج و تۆر و ئەدەبان نەدەركەفتن و دايكا هەوە دلێ خۆ هێلا هنگى هوين نە دگونەهكارن، و خودێ چێتر دزانيت.
