ب / ئەڤ دايكا ب ڤى رەنگى ب ئەركێ دايكينيێ نارابيت، و بلا بزانيت زارۆك ئەمانەتن د ستۆيێ دايباباندا، و دڤێت ڤى ئەمانەتى باش بپارێزن، هەكە رۆژا قيامەتێ دێ ژێرپسيار بن و حسێب دێ دگەل هێتەكرن، و ژ پاراستنێيە سنج و تۆر و ئەخلاقێ وان بێتە پاراستن، و دڤێت دايك پتر و تايبەتتر ژبابێ بزانيت كچ ئەمانەتن د ستۆيێ وێدا، كا چاوا دڤێت خەمێ ژ خوارن و ڤەخوارن و جلكێت وان بخۆت، دڤێت هۆسا بەلكى هێژ پتر خەمێ ژ سنج و ئەخلاقێ وێ بخۆت، و خەما وێ نەبەس شويكرنا وێ بيت هەما چاوا بيت باش بيت يان خراب، و باشە ما ئەو نابينيت ئەو گەنجێ ل كچا سەربەردايى و لنگ رويس دگەريت كێرناهێت ئەو كچا خۆ بدەتێ و بێخيتە بن بەخت و وژدانا وى، ئەرێ ئەڤەيە دلپێڤەبوونا دايكێ بۆ وێ رادەستى مرۆڤەكى بكەت رێكا خودێ نەزانيت. دايك خەما شويكرنا كچا خۆ بخۆت كارەكێ زێدە پيرۆزە، و ئەڤە مەزنترين ئەركێ وێيە بەلێ خەما دورست ئەوە رادەستى كەسێت موسلمان و خودێ ترس بكەت، هەكە وەنەكر وێ ئەمانەت نەپاراست، و بلا دايك بزانيت ئەوا كچێت خۆ نەچار دكەت شوى ب بێ سنج و ئەخلاق و بێ دين و مەى ڤەخۆران بكەت، هەر كارتێكرنا د دينێ وێدا چێدبيت گونەه د ستۆيێ وێدايە، چونكى ئەو ئەگەرێ ڤێ چەندێ بوو، و پێغەمبەر (سلاڤێت خودێ لێ بن) دايبابان ئاراستە دكەت بۆ كارەكێ بەراهيێ د خێرا واندا پاشى د خێرا كچێت واندا، دبێژيت: (إذا جاءكم من ترضون دينه وخلقه فأنكحوه إلا تفعلوه تكن فتنە في الأرض وفساد عريض) گەلى دايبابان و سەركارێت كچان.. هەكە ئەو هات كچێت هەوە بخوازيت يێ هوين ژ دين و ئەخلاقێ وى رازى بدەنێ، و هەكە وەنەكەن دێ بەلا و خرابيەكا مەزن د عەرديدا چێبيت. هەژيە بێژين پێغەمبەرى (سلاڤێت خودێ لێ بن) سێ جاران ئەڤ ئاخفتنە دوبارەكر.
و ئەڤ دايكا نەهێليت كچا وێ دەرسۆكێ بكەتێ چونكى ئەو ناكەتێ؛ دا خەلك لۆمەى وێ نەكەت و بێژنێ كچا تە دكەتێ تو بۆچى ناكەيێ، دووجاركى بێ ئەمريا خودێ دەكت: جارەكێ د راستا خۆدا و جارا دووێ د راستا كچا خۆدا، و خودێ وێ دبێژيتێ: ((يَا أَيُّهَا الَّذِينَ آمَنُوا قُوا أَنْفُسَكُمْ وَأَهْلِيكُمْ نَارًا وَقُودُهَا النَّاسُ وَالْحِجَارَةُ عَلَيْهَا مَلَائِكَةٌ غِلَاظٌ شِدَادٌ لَا يَعْصُونَ اللَّهَ مَا أَمَرَهُمْ وَيَفْعَلُونَ مَا يُؤْمَرُونَ)) گەلى خودان باوەران خۆ و مالێت خۆ ژ ئاگرەكى بپارێزن، داردوويێ وى مرۆڤ و بەرن، هندەك ملياكەتێت دلرەق و دژوار و ب هێز يێت ل سەر، و ئەو ملياكەت نەگوهداريا خودێ ناكەن ل سەر وى تشتێ ئەمرێ وان پێ هاتيەكرن، و وێ دكەن يا ئەمرێ وان پێ دئێتەكرن. ڤێجا بزانە دايكا قەلەندەر كچا تە د ستۆيێ تەدا ئەمانەتە و دڤێت بزانى كا دێ چاوا ڤى ئەمانەتى پارێزي، و رۆژا قيامەتێ دێ پسيار ژ تە د راستا وێدا هێتەكرن كا تە چاوا ئەڤ ئەمانەتە پاراست، و دڤێت رێكێت خەلەت و نەدورست نەدەيە بەر خۆ د راكرن و پەروەردەكرنا وێدا و چاوا ل سەر تە واجبە تو خۆ ب تاعەت و گوهداريا خودێ خۆ ژ ئاگرێ جەهنەمێ بپارێزى هۆسا واجبە تو مالا خۆ و كچێت خۆ ژى ژ ئاگرێ جەهنەمێ بپارێزى، و مخابن نە تە ئەڤەكر و نە ئەڤە و ئيزايێ تە دێ يێ ستوير بيت.
و دويماهيێ ئەز دبێژمە يا هۆسا: ما تو ناترسى خودێ د دنيايێدا ڤێ بۆ تە نەهێليت و تە ب وێ يا تو دكەى بێشينيت، زەلامێ تە دويف كچەكێ بكەڤيت و تو نەخۆشيێ ل سەر نەخۆشيێ ببەى، يان كورآ تە ژ مالا خۆ دويركەڤيت دويف كچەكا وەكى تە كچا خۆ ل سەر راكرى بكەڤيت و ئەڤە هەمى بۆ تە ببنە خەم و نەخۆشى، شەرێ شەريعەتێ خودێ نەكە و فەرمانا كچا خۆ بكە ئەمرێ خودێ ب جه بينيت، تو سەرناكەڤى دێ باجا ڤى شەرى دەى.. ئەڤرۆ نە سوبەهى، و خودێ چێتر دزانيت.
