ب/ چو شك تێدا نينە ئەوێ نڤێژان نەكەت، چونكى باوەرى پێ نينە يان ترانا بۆ خۆ پێ دكەت گاورە و ژ ئيسلامێ دەردكەڤيت، و هەمى زانا ل سەر ڤێ بۆچۆنێنە. و حەديسێت پێغەمبەرى (سلاڤێت خودێ لێ بن) ئەوێت ل دۆر هێلانا نڤێژێ هاتين ژ ڤى دگرن، وەكى گۆتنا پێغەمبەرى (سلاڤێت خودێ لێ بن): ((بين الْعَبْدِ وَبَيْنَ الْكُفْر تَرْكُ الصَّلاة)) و ((إِنَّ الْعَهْدَ الَّذي بَيْنَنَا وَبَيْنَهُمُ الصَّلاة فَمَنْ تَرَكَهَا فَقَدْ كَفَرَ))، ڤێجا هەكە ئەو ژن ژ ڤى رەنگيە و ل خۆ نەزڤري و تۆبەنەكر، كافرە ل دەف هەمى زانيان، و هەكە يا نەشويكرى بيت و كچ بيت ل موسلمانى ناهێتە مارەكرن، و هەكە ياشويكرى بيت و ب ڤى رەنگى بيت و زەلامێ وێ يێ موسلمان بيت نابيت ل دەف وى بيت، و ل دەف هەمى زانايان بێ جوداهي ئەڤە نەموسلمانە بلا د ناسنامێدا موسلمان هاتبيتە نڤێسين، و نابيت چونكى خودێ مەزن دبێژيت: ((لَا هُنَّ حِلٌّ لَهُمْ وَلَا هُمْ يَحِلُّونَ لَهُنَّ)) نە ژنێت موسلمان بۆ گاوران حەلالن و نە ئەو بۆ ژنێت موسلمان حەلالن. بەلێ هەكە ژ خەمسارى نەكەت و باوەريا هەى، زانا د وێدا ژێك جودانە ل سەر سێ گۆتنان:
ئێك: گاورە، و ئيمام ئەحمەد(خودێ ژێ رازی بیت)، دبێژيت: يێ نڤێژان نەكەت چ ژ تەمبەلى يان ژ بێ باوەرى هەر گاورە. هەكە كرن؛ كرن، هەكە نەكرن دڤێت بێتە كوشتن و نڤێژ ل سەر نائێتەكرن و نائێتە گۆركرن، و ل گۆرستانا موسلمانان نائێتە ڤەشارتن.
دوو: نەگاورە و ناهێتە كوشتن: ئيمام ئەبو حەنيفە (خودێ ژێ رازی بیت)، دبێژيت: نەكرنا نڤێژان ژ تەمبەلى مرۆڤى كافر ناكەت، بەلێ دڤێت بێتە زيندانكرن هەتا ل خۆ دزڤريت.
سێ: راستە نەكافرە، بەلێ فاسقە و دهێتە كوشتن، ئيمامێ شافعى (خودێ ژێ رازی بیت)، دبێژيت: نابيتە كافر، بەلێ فاسقە، و هەكە هەر ل خۆ نەزڤرى دێ ئێتە كوشتن كو فاسقە نە كافر، و دێ ئێتە شويشتن و نڤێژ دێ ل سەر ئێتەكرن و دێ دگەل موسلمانان ئێتە ڤەشارتن.
و بۆچۆن و گۆتنا دورستتر ژ گۆتنێت زانايان نە گاورە و ژ ئيسلامێ نادەركەڤيت هەكە نەكرنا وێ ژ خەمسارى و تەمبەلى و بێخيرەتى بيت و ژ زەلامێ خۆ ناچيت بەلێ دڤێت زەلام خەمێ ژێ بخۆت و بەردەوام شيرەتان لێ بكەت و بێهنا خۆ ل سەر نەنڤێژكرنا وآ بكێشيت و دەست ژێ بەرنەدەت، چونكى كا چاوا ل سەر وى واجبە ئەو خۆ ب تاعەت و گوهداريا خودێ خۆ ژ ئاگرێ جەهنەمێ بپارێزيت.. وەسا واجبە ئەو مالا خۆ ژى ژ ئاگرێ جەهنەمێ بپارێزيت، خودێ مەزن دبێژيت: ((يَا أَيُّهَا الَّذِينَ آمَنُوا قُوا أَنْفُسَكُمْ وَأَهْلِيكُمْ نَارًا وَقُودُهَا النَّاسُ وَالْحِجَارَةُ عَلَيْهَا مَلَائِكَةٌ غِلَاظٌ شِدَادٌ لَا يَعْصُونَ اللَّهَ مَا أَمَرَهُمْ وَيَفْعَلُونَ مَا يُؤْمَرُونَ)) گەلى خودان باوەران خۆ و مالێت خۆ ژ ئاگرەكى بپارێزن، داردوويێ وى مرۆڤ و بەرن، هندەك ملياكەتێت دلرەق و دژوار و ب هێز يێت ل سەر، و ئەو ملياكەت، نەگوهداريا خودێ ناكەن ل سەر وى تشتێ ئەمرێ وان پێ هاتيەكرن، و وێ دكەن يا ئەمرێ وان پێ دئێتەكرن. ديسا خودێ مەزن دبێژيت: ((وَأْمُرْ أَهْلَكَ بِالصَّلَاةِ وَاصْطَبِرْ عَلَيْهَا)) ئانكو: ئەمرێ مالا خۆ ب نڤێژێ بكە، و تو ژى ل سەر يێ بەردەوام بە، بەلێ ئەز دبێژم: فەرە ئەڤێت هێژ خێزان پێك نەئيناين ل سەر بنياتەكێ دورست و پێغەمبەراتيێ هەڤبەشێ ژيانا خۆ هەلبژێرن دا نەكەڤنە د كراسێ هندێدا كا ژنا وى يا نەنڤێژكەر كافرە ئان نە و ژێ دچيت ئان نە، چونكى ب راستى ئەڤ ئالۆزى و گرفتە زێدە د ناف جڤاكيدا يا هەى، يان ژن نڤێژا دكەت و زەلام نڤێژان ناكەت و رۆژيان ناگريت، يان بەروڤاژى زەلام يێ پێگرە بەلێ ژن نە، و ئەڤە ئالۆزيەكا مەزنە، و ئەگەرێ وێ مسۆگەر سستكرنە د جهئينانا فەرمانێت پێغەمبەريدا (سلاڤێت خودێ لێ بن) و رێنمايێت شەريعەتى، و خودێ چێتر دزانيت.
