ب / ب راستى زۆردارى و ستەمەكا مەزن ل ژنێ دهێتەكرن، و مخابن ب ناڤێ دينى و دين ژ ڤێ چەندێ دوير و بەريە، و زەلام وەسا هزردكەن و خۆ تێدگەهينن ئەڤە مافەكە خودێ يێ دايێ و ئەڤە ئيسلامە، نەخێر ئەڤە نەئيسلامە و مافێ زەلامى نينە هندى سەرێ دەرزيكێ ژى خورتى و ستەمێ ل خێزانا خۆ بكەت، ئەو زەلامێ ب ڤى رەنگى دوو گونەهان دكەت، ئێك: دەمێ ستەم و زۆرداريێ دكەت، دوو: دەمێ ڤێ زۆرداريێ بۆ خۆ دورست دكەت و مافەكێ شەرعى بۆ خۆ ددانيت، و دڤێت زەلام بزانيت خودێ مەزن ل دۆر ترازيا مافان دبێژيت ((وَلَهُنَّ مِثْلُ الَّذِي عَلَيْهِنَّ بِالْمَعْرُوفِ)) راستە دويفرا خودێ مەزن دبێژيت ((وَلِلرِّجَالِ عَلَيْهِنَّ دَرَجَةٌ)) بەلێ دڤێت ئەم تێبگەهين ئەو دەرجە چيە دا خەلەت نەبين. دويف بۆچۆنا ب هێزتر ئەو دەرجە قەوام و رێڤەبرنە هەروەكى د سۆرەتا نيسائدا هاتى: ((الرِّجَالُ قَوَّامُونَ عَلَى النِّسَاءِ بِمَا فَضَّلَ اللَّهُ بَعْضَهُمْ عَلَى بَعْضٍ وَبِمَا أَنْفَقُوا مِنْ أَمْوَالِهِمْ)) زەلام سەركار و سەرپەرشتێت كاروبارێت ژنانە، ئانكو دڤێت ئەو ل بەر خزمەتا وان بن و ب كاروبارێت وان رابن ژبەر كو خودێ هندەك ب سەر هندەكان ئێخستينە، و ژبەر كو زەلام مالێ خۆ د بەر واندا دمەزێخن. ئها ئەڤەيە ئەو دەرجە، دگەل كو هندە زەلام ڤێ دەرەجێ خەلەت تێدگەهن، دگەل هندێ ژى دكەنە گەلەك دەرجە نە دەرجەك ب تنێ، و قورئانا پيرۆز بۆ مە ديار دكەت كا چاوا زەلامى ماف ل سەر ژنێ هەيە هەروەسا ژنێ ژى ماف يێ ل سەر زەلامى هەى وەكى ئێك، و هۆسا دڤێت هەردوو بزانن ژن و زەلام هەكە هندە ماف هەبن ئەو ژى بەرامبەر ئەركانە د راستا يێ ديدا، هەكە ئەو ئەرك ب جه نەئينان بۆ نينە مافان بخوازيت، ماف بەرامبەر ئەركانە، هنگى دێ خەلەتى رويدەت هەكە چاڤێت هەردووكان ل سەر مافان د زل بن، و ل سەر ئەركان د نقياي بن، و هەكە د هشيار بن ل سەر مافان و پشتا خۆ بدەنە ئەركان، و هەكە هزرا خۆ د مافاندا بكەن و هزرا خۆ د ئەركاندا نەكەن، و هەكە هەرئێكى بەرێ وى ل مافێ وى ب تنێ بيت و بەرێ خۆ نەدەتە مافێ يێ بەرامبەر، ئها باراپتر خەلەتيا زەلامى يان يا ژنێ ل ڤێرێيە دەمێ ـ چ ژن چ مێر ـ بەرێ وى ل مافێ وى و چاڤەرێى مافێ خۆ، و چو هزرێ بۆ ئەركێ خۆ نەكەت بەرامبەر هەڤژينا خۆ، و فەرە زەلام بزانيت ژنێ دوو رەنگێت مافان ل سەر وى يێت هەين، مافێ ماددى و يێ دەروونى. گەلەك جاران زەلام چاڤێ خۆ ل مافێ دووێ دنقينن و دبيت ئەو گەلەك ب بهاتر بيت و دبێژيتە ژنا خۆ: كا بێژە كا چ قوسيرى و كێماسى ل تەيە! زێر من بۆ تە نەكرينە! جلكێت تە د كێمن! خوارنا تە يا كێمە! تە پارە نينن! هەروكى ماف بەس ئەڤەنە، و هەكە ئەڤە بۆ ژنێ بەردەستكرن ئەڤە وى هەمى مافێت وێ دانێ، و دبيت ژ لايێ دەروونيڤە هيچ دلۆڤانيێ پێ نابەت و بەردەوام دئێشينيت و سەرەدەريێ دگەل ناكەت هەروەكى ئەو مرۆڤ و خودان هەست و هاى و چاڤدێريا هەستێت وێ يێت دەروونى د بنيرا ناكەت و نوزانيت ژن لەش و گيانە و كا چاوا لەشى پێدڤيێت خۆ هەنە ژ خوارن و ڤەخوارن و جلكان، هۆسا گيان و روحا وێ ژى پێدڤيێت خۆ هەنە و دڤێت بەرچاڤ بێنە وەرگرتن، و هنديكە مرۆڤە ب گيان و روحێ مرۆڤە نە ب لەشى تنێ، هەروەكى هۆزانڤان دبێژيت: (فانت بالنفس لا بالجسم انسان)، و ئەڤە خەلەتيا گەلەك زەلامانە، هزر دكەن ماف بەس يێ د جه و خوارن و ڤەخوارن و جلكيدا، هەكە ئەڤە د بەردەست بن ژنێ چو ماف ل سەر نەما، و خەما دلرەحەتى و ئاراميا وێ يا دەروونى ناخۆت، و ئەڤە يا خەلەتە و نەيا دورستە، و تشتێ ژ هەميان سەرەكيتر د هەڤژينيێدا دڤێت هەبيت.. دلرەحەتى و ڤەهسيان و ئاراميا دەروونيە، لەوا خودێ مەزن دبێژيت: ((وَمِنْ آيَاتِهِ أَنْ خَلَقَ لَكُمْ مِنْ أَنْفُسِكُمْ أَزْوَاجًا لِتَسْكُنُوا إِلَيْهَا وَجَعَلَ بَيْنَكُمْ مَوَدَّةً وَرَحْمَةً)) و ژ نيشانێت مەزناتى و دەستهەلاتداريا خودێ، ئەوە وى هەر ژ هەوە ژ گيانێ هەوە بۆ هەوە هەڤسەر چێكرن، دا سەبر و هەدارا هەوە پێ بێت، و ل دەف ڤەهەسن و ڤيان و دلۆڤانى ئێخستە د ناڤبەرا هەوەدا، ب راستى ئەڤە دان و چێكرنا هەڤسەران هۆسا نيشانێت ئاشكەرانە ل سەر مەزناتى و دەستهەلاتداريا خودێ بۆ وان ئەوێت هزرا خۆ تێدا دكەن. بەلێ خودێ ژن و مێر ژ ئێك كەس ب تنێ چێكرين، و هەڤسەرا وى ژى ژێ چێكر، دا بێن و سەبرا وى پێ بێت و ل دەف ڤەهەسيێت، ئها ب راستى ئارماجا سەركى يا هەڤژينيێ و شەنگست و بناغە و بنياتێ سەرەكى ژ ژيانا هەڤسەريێ ئەڤەيە.. سەكەن و دلرەحەتى و ئارامي و ڤەهسيان و ڤيان و حەژێكرنە، كورت و كرمانج ماف هنگى دهێنە پاراستن هەكە هەڤسەنگى د ناڤبەرا مافێت ماددى و دەروونيدا هاتەكرن و هەردوو پێكڤە هاتنە پاراستن و ژ هەردوويان.
و هەكە ژنێ ژى مافێ زەلامى ل سەر خۆ ديت بەس خزمەتكرنە و وەكى خدامەكێ ب كاروبارێت وى رابيت و ژ لايێ دەروونيڤە بەرچاڤ نەهاتە وەرگرتن، هنگى وێ مافێ زەلامى ل سەر خۆ نەراكر كا چاوا پێدڤيە زەلام رامانا مافان بەرتەنگ نەكەتە د خوارن و ڤەخوارنێدا، هۆسا ژن ژى دڤێت مافێ زەلامى كۆم نەكەتە د خزمەتكرنێدا و بەس، هەردووكان مافێت دەرونى و ماددى ل سەرئێك يێت هەين و دڤێت هەرلايەكى مافێ وى بدەتێ، و خودێ چێتر دزانيت.
