ب / خودێ بۆ وى دورست نەكريە ئەو ڤێ سەرەدەريێ دگەل تە بكەت و عەدالەتێ د ناڤبەرا هەودا نەكەت، و يێ هۆسا عەدالەتێ نەكەت يان يێ ژ خۆ ترسيا عەدالەتێ د ناڤبەرا ژناندا نەكەت بۆ نەدورستە ئەو دوو ژنان بينيت، چونكى خودێ مەزن دبێژيت: ((فَإِنْ خِفْتُمْ أَلَّا تَعْدِلُوا فَوَاحِدَة)) هەكە هوين بترسن عەدالەتێ د ناڤبەرا ژناندا نەكەن ئێكێ تنێ بينن. و د ڤێ ئايەتێدا ئاشكەرا و ديار دبيت مەرجێ فرەژنيێ ئەوە ژ خۆ يێ پشت راست بيت دێ عەدالەتێ كەت و كا عەدالەت چ رامان هەلگريت و دگريت، و يێ عەدالەت نەكر بلا رۆژا شەرمزاريێ بترسيت دەمێ گونەها وى بۆ خەلكێ مەحشەرێ و قيامەتێ هەميان ئاشكرا و ديار دبيت. پێغەمبەرێ خۆشتڤى (سلاڤێت خودێ لێ بن) بۆ ڤى مرۆڤى دبێژيت: (من كانت له امْرَأَتَانِ فَمَالَ إلا إِحْدَاهُمَا جاء يوم الْقِيامَة وَشِقُّهُ مَائِل) هەركەسێ دوو ژن هەبن و عەدالەت د ناڤبەرا واندا نەكربيت رۆژا قيامەتێ دێ هێت و يێ دوو كەرە دا خەلكێ مەيدانا قيامەتێ هەمى بزانن گونەها ڤى مرۆڤى چيە، ڤێجا بلا خودانێت دوو ژنان هزرا ڤێ رۆژێ بكەن و ژ ڤێ رۆژێ بترسن و ژ خودێ بترسن و فەرق و جوداهيێ د ناڤبەرا ژنێت خۆدا نەكەن، دا نەكەڤنە د ڤى كراسيدا، كراسێ خزى و شەرم و شەرمزارى و روى رەشيێ، و هەركەسێ زەلامێ وێ مەسرەفى ل وێ و زارۆكێت وێ نەكەت بۆ هەيە داخوازا خۆ ببەتە دەف دادگەهێ و دادوەر دێ ل سەر دانيت ئەو ب ئەركێ خۆ رابيت و مەسرەفى ل ژن و عەيالێ خۆ بكەت، و ئەڤە مافێ تەيە هەكە تە بڤێت تو شكياتێ ل دادگەهێ لێ بكەى، بەلێ هەكە تە نەڤێت ئەڤە تشتەكێ ديە و ل سەر تە واجب نينە تو شكياتێ لێ بكەى، و ئاخفتنا وى من تو يا بەرداى هەكە چەند جارى ئەڤە دووبارەكر بيت و دجهێت جودا جودا دا و سێ عادە و بێنڤێژى ب سەر تەدا يێت چۆين هنگى تو نە ژنا وى و تو بەرامبەر وى يا بيانى و تێكەلى دڤێت د ناڤبەرا هەوەدا نەبيت و هەكە جارەكێ تنێ ئەڤ گۆتنە گۆتبيت و ديسا سێ بێنڤێژى ل سەر تەرا بۆرين و تو نەزڤراندبى ديسا هنگى تو ژێ دچى و تو نازڤريەڤە وى ب مارەكرن و مەهرەكا نوى نەبيت، و خودێ چێتر دزانيت.
