ب / راستە گەلەك جاران دبێژيت ئەز نوزانم چ بكەم؟!!! هەر مەلايەك تشتەكى دبێژيت، ڤان دين ل بەر مە بەرزەكر!!، ئەم نوزانين گوهێ خۆ بدەينە كێ؟!، و ئەو نەيا مافدارە خۆ بێخيتە د ڤى كراسيدا؛ چونكى بۆچۆنێت مەلايان د ژێك جودانە؛ و ئەو يا فەرمانكريە گوهدانا وى مەلاى بكەت يێ وێ باوەرى ب زانين و تێگەهشتن و خودێترسيا وى هەى، نەهەركەسێ هەبيت، هنگى ئەو ناكەڤيتە د ڤى كراسێ شەپرزەكريدا، و پەريشان و دوودل نابيت، و ل بەر بەرزە نابيت، هەروەكى دەمێ ئەو هەوجەى دوختۆرێ دبيت.. ئەرێ ما ئەو دچيت پسيارا دەهان دكەت، يان قەستا وێ دوختۆرێ دكەت يا وێ باوەرى ب زانين و زيرەكيا وێ هەى، و هەكە دوختۆر د ئێشا وێدا جودابوون.. ئەو دبێژيت: ڤان دوختۆران ل بەر مە بەرزەكر!!!! و ئەز نوزانم چ بكەم؟!!!!!، يان پسيار دكەت كا كيژ دوختۆرە زانا و زيرەكترە؟ و گوهێ خۆ ددەتە وێ، هۆسا دڤێت ئەم د راستا ئەحكام و فەرمانێت دينێ خۆدا ژى بين، بلا هەر مەلايەك تشتەكى بێژيت، بەلێ دڤێت ئەز بزانم كا ئەز دێ گوهێ خۆ دەمە كێ؟ ئەز دێ گوهێ خۆ دەمە وى، يێ زانا و خودێترستر، و نە خۆ دوودل دكەم، و نە ل بەر خۆ بەرزە دكەم، و كا ئەز د پرسا دوختۆراندا يێ چاوا بووم، دڤێت د پرسا فەرمان و ئەحكاماندا ژى يێ وەسابم، و خۆزى موسلمانان ئەڤ ئەزمان و ئەڤ لەهجە و ئەڤ ئاوايە هێلابايە (ئەز نوزانم چ بكەم، هەر ئێك تشتەكى دبێژيت!!!!) ئەڤ گۆتنە نەيا قەبويلە و نەيا رەوايە و نەيا راستە، و ناهێتە وەرگرتن، و دڤێت بزانم دينێ خۆ ژ هەميان و ژ هەر مەلايەكێ هەبيت ناوەرگرم، و ئەز نەداڤا گيايمە دا هەر بايەكێ بهێت بچەمينيت، و هەر ئاخفتنا مەلايەكێ هەبيت كار ل من بكەت، و دوودلى و شەپرزەييێ ل دەف من پەيداكەت ـ دگەل رێز و حورمەتا هەژى بۆ هەمى زانا و مەلايان، مەخسەدا مە كێمكرن و برينداركرنا كەسێ نينە، هەمى ب رێز و حورمەتن، بەلێ هەمى نەموفتينە و هەمى نەئێكن د زانين و خودێترسيا خۆدا ـ ئەز دێ بۆ خۆ ئێكى ژێ گرم ل سەر بنياتێ هندێ خۆش دئاخڤيـت، و فەتوايێت وى د خۆش و ساناهينە، و كاروباران ساناهى دكەت، نە.. ئەڤە يا خەلەتە، و نەيا دورستە، بەلێ ل سەر بنيات و پيڤەرێ كا ئەو چەندێ زانا و شارەزايە، و كا چەندێ خودێترسە، و كا بەلگەيێت وى پالپشتى بۆ كرين چەند د دورست و ب هێزن، و تێگەهشتنا وى بۆ وى بەلگەى چەندا راست و دورست و د جهێ خۆدايە، چەند ل چەرخێ خۆ دژيت، چەند ئاگەه ژ مەبەست و مەقاسدێت شەريعەتى هەيە، چەند ئاگەه ژ جان و روحا شەريعەتى هەيە، چەند شارەزايى د فقهێ بەرامبەركريدا (موقارن) هەيە، چەندێ نێزيك و دويرى روح و جانێ شەريعەتيە، چەند ئاگەه ژ تەكنۆلۆجيا هەڤچەرخ و گوهۆرينێت هەڤچەرخ هەيە، و چەند د چەرخ و زەمانێ خۆ دگەهيت، من چ باوەرى ب زانين و تێگەهشتن و خودێ ترسيا وى هەيە. هەكە من ئەڤ شەنگست و پيڤەرە زانين دێ دانمە بەرامبەر خودانێ هەر فەتوايەكا هەبيت، يان خودانێ هەر فەتوايەكا هەبيت، دێ دانمە بەرامبەر ڤان شەنگست و پيڤەران؛ دا بۆ من دەستنيشان و ئاشكرا ببيت، كا دێ ئاخفتنا كێ وەرگرم، و يا كێ ناوەرگرم، هۆسا ئەز دوودل و شەپرزە نابم، و ب چو رەنگان ل بەر من بەرزە نابيت، نەبەس د پرسێت تايبەت ب ژنانڤە، بەلكى د هەمى پرساندا. ب راستى زانا و مەلايێ دادپەروەر ئەوە يێ هەمى بۆچۆنان دگەل بەلگەيێت وان بەرچاڤ دكەت، و ب ئاوايەك و رێكەكا دورست بەرامبەركرنێ دكەت، و ب هەلسەنگاندنەكا زانستى دگەهيتە ئەنجامەكێ دورست، دگەل هندێ ژى نابيت بۆچۆنان شكەستى و سڤكى بدەتە نياسين، و نابيت سڤكيێ ب چو زانايان بكەت، و خودێ چێتر دزانيت.
