ب / ئەڤێ ئاخفتنێ چو بنياتێ خۆ نەيێ لاواز نەيێ دورست د دينێ ئيسلامێدا نينە، و چو دەقێت دورست بەردەستێ مە نين كو ئەڤ چەندە يا چێ بووى، و دايكا مە حەوا ئەگەرێ سەردابرنا ئادەم پێغەمبەرى بوو (سلاڤێت خودێ لێ بن) و وێ د بەرا كر و گۆت هەتا ژ وى فێقى خوارى، بيت ئەڤە د ژێدەرێت ئيسرائيلياندا هاتبيت ـ جوهى و فەلان ـ بەلێ ئەڤە د ژێدەرێت ئيسلامێدا نەهاتيە و ژن د ئيسلامێدا نفشێ خرابيێ نينە، و ئەو زەلامێ ژنا خۆ ب ڤان ئاخفتنان بێشينيت گونەهەكێ دكەت و تشتەكێ بێ بنيات و نەدورست دبێژيت، و خودێ مەزن ئەمرێ هەردووكان وەكى ئێك كربوو ئەو ژ وێ دارێ و فێقيێ وێ دارێ نەخۆن. خودێ مەزن د سۆرەتا بەقەرەدا دبێژيت: ((وَقُلْنَا يَا آدَمُ اسْكُنْ أَنْتَ وَزَوْجُكَ الْجَنَّةَ وَكُلَا مِنْهَا رَغَدًا حَيْثُ شِئْتُمَا وَلَا تَقْرَبَا هَذِهِ الشَّجَرَةَ فَتَكُونَا مِنَ الظَّالِمِينَ))(( فَأَزَلَّهُمَا الشَّيْطَانُ عَنْهَا فَأَخْرَجَهُمَا مِمَّا كَانَا فِيهِ وَقُلْنَا اهْبِطُوا بَعْضُكُمْ لِبَعْضٍ عَدُوٌّ وَلَكُمْ فِي الْأَرْضِ مُسْتَقَرٌّ وَمَتَاعٌ إِلَى حِينٍ))(( فَتَلَقَّى آدَمُ مِنْ رَبِّهِ كَلِمَاتٍ فَتَابَ عَلَيْهِ إِنَّهُ هُوَ التَّوَّابُ الرَّحِيمُ))ئانكو: و مە گۆت: هەى ئادەم تو و كابانيا خۆ د بەحەشتێدا ئاكنجى ببن و ژ هەر جهێ هەوە بڤێت بێ منەت بەرفرەه ژێ بخۆن، بەلێ خۆ نێزيكى ڤێ دارێ نەكەن، هوين دێ ژ ستەمكاران ئێنە هەژمارتن. بەلێ پاشى شەيتانى ئەو پێ هنگاڤتن د بەر خەلەتيێرا كرن و دەرئێخستن ژ بەحەشتێ ژ وێ يا ئەو تێدا، مە ژى گۆتە وان: ژێ دەركەڤن هەرنە خوارێ، هندەك ژ هەوە ل هندەكان نەيار و دژمن، و هەتا دەمەكێ دياركرى ل دەف خودێ د عەرديدا ئاكنجى ببن و مفايى ژێ وەرگرن.
و د سۆرەتا ئەعرافدا ب درێژى ديار دكەت كا چاوا شەيتانى ئەو سەردابر و ب چ رێك شەيتان هاتە ئادەم پێغەمبەرى (سلاڤێت خودێ لێ بن) و هەڤسەرا وى و سويند بۆ وان خوار وى خێرا وان دڤێت و ئەو بۆ وان يێ دلبێش و دلسۆزە د شيرەتكرنا خۆدا دبێژيت: ((وَيَا آدَمُ اسْكُنْ أَنْتَ وَزَوْجُكَ الْجَنَّةَ فَكُلَا مِنْ حَيْثُ شِئْتُمَا وَلَا تَقْرَبَا هَذِهِ الشَّجَرَةَ فَتَكُونَا مِنَ الظَّالِمِينَ))(( فَوَسْوَسَ لَهُمَا الشَّيْطَانُ لِيُبْدِيَ لَهُمَا مَا وُورِيَ عَنْهُمَا مِنْ سَوْآتِهِمَا وَقَالَ مَا نَهَاكُمَا رَبُّكُمَا عَنْ هَذِهِ الشَّجَرَةِ إِلَّا أَنْ تَكُونَا مَلَكَيْنِ أَوْ تَكُونَا مِنَ الْخَالِدِينَ))(( وَقَاسَمَهُمَا إِنِّي لَكُمَا لَمِنَ النَّاصِحِينَ))(( فَدَلَّاهُمَا بِغُرُورٍ فَلَمَّا ذَاقَا الشَّجَرَةَ بَدَتْ لَهُمَا سَوْآتُهُمَا وَطَفِقَا يَخْصِفَانِ عَلَيْهِمَا مِنْ وَرَقِ الْجَنَّةِ وَنَادَاهُمَا رَبُّهُمَا أَلَمْ أَنْهَكُمَا عَنْ تِلْكُمَا الشَّجَرَةِ وَأَقُلْ لَكُمَا إِنَّ الشَّيْطَانَ لَكُمَا عَدُوٌّ مُبِينٌ)) ئانكو: و هەى ئادەم، تو و كابانيا خۆ د بەحەشتێدا ئاكنجى ببن، و ژ هەر جهێ هەوە بڤێت بێ منەت ژێ بخۆن، بەلێ خۆ نێزيكى ڤێ دارێ نەكەن، هوين دێ ژ ستەمكاران ئێنە هەژمارتن، بەلێ شەيتانى وەسواس و گۆمان ئێخستە دلێ وان و د بەر خەلەتيێرا كرن دا شەرمگەها (عەورەتا) وان يا ڤەشارتى بۆ وان ديار بكەت، و گۆت (گۆتە وان): خودايێ هەوە هوين ژ ڤێ دارێ نەداينە پاش ژبەر هندێ نەبيت دا هوين هەردوو نەبنە ملياكەت يان ژى هەروهەر د بەحەشتێدا نەمينن، و شەيتانى بۆ وان سويند خوار كو ب راستى من خێرا هەوە دڤێت، ڤێجا ب فند و فێلان ئەو خاپاندن و نزم كرن و ئينانە خوارێ و د بەر خەلەتيێرا كرن، ڤێجا وەختێ ژ دارێ خوارين شەرمگەها وان بۆ وان دياربوو، و دەست هاڤێتنێ بەلگێت بەحەشتێ ژێڤەكرن و خۆ پێ نخافتن، و خودێ وان گازى كرە وان: ما من هوين ژ وێ دارێ نەدابوونە پاش و نەهيا هەوە ژێ نەكربوو، و ما من نەگۆت بوو هەوە، ب راستى شەيتان دژمنەكێ ديار و ئاشكەرايە.
و د سۆرەتا تاهادا ئاشكرا دكەت شەيتانى ئێكسەر ئادەم پێغەمبەر(سلاڤێت خودێ لێ بن) خاپاند و ب وەسواس و ئاوازا خۆ سەردابر، و حەوايێ دەست د سەردابرنا ويدا نەبو، بەلێ شەيتانى هەردوو وەكى ئێك سەردابرن و هەردوو كەفتنە داڤێت شەيتانى ئەوێ ب كراسێ شيرەتكارى و دلسۆزى و خێرخوازيێ هاتيێ، خودێ مەزن دبێژيت: ((وَلَقَدْ عَهِدْنَا إِلَى آدَمَ مِنْ قَبْلُ فَنَسِيَ وَلَمْ نَجِدْ لَهُ عَزْمًا))(( وَإِذْ قُلْنَا لِلْمَلَائِكَةِ اسْجُدُوا لِآدَمَ فَسَجَدُوا إِلَّا إِبْلِيسَ أَبَى))(( فَقُلْنَا يَا آدَمُ إِنَّ هَذَا عَدُوٌّ لَكَ وَلِزَوْجِكَ فَلَا يُخْرِجَنَّكُمَا مِنَ الْجَنَّةِ فَتَشْقَى))(( إِنَّ لَكَ أَلَّا تَجُوعَ فِيهَا وَلَا تَعْرَى))(( وَأَنَّكَ لَا تَظْمَأُ فِيهَا وَلَا تَضْحَى))(( فَوَسْوَسَ إِلَيْهِ الشَّيْطَانُ قَالَ يَا آدَمُ هَلْ أَدُلُّكَ عَلَى شَجَرَةِ الْخُلْدِ وَمُلْكٍ لَا يَبْلَى))(( فَأَكَلَا مِنْهَا فَبَدَتْ لَهُمَا سَوْآتُهُمَا وَطَفِقَا يَخْصِفَانِ عَلَيْهِمَا مِنْ وَرَقِ الْجَنَّةِ وَعَصَى آدَمُ رَبَّهُ فَغَوَى)) ب سويند بەرى نوكە مە قەوياتى ل ئادەمى كربوو كو ژ دارەكێ نەخۆت، ڤێجا وى قەوياتيا مە ژبيركر، و مە سەبر و خۆراگرتن ژ نەخوارنا وێ دارێ ل دەف نەديت، و بێژە وان: وەختێ مە گۆتيە ملياكەتان سوجدەيێ بۆ ئادەمى ببەن (سوجدەيا سلاڤ و رێزگرتنێ، نەسوجدەيا پەرستنێ)، ئبليس تێ نەبيت، يێت دى هەمى بۆ ئادەمى چۆنە سوجدەيێ، ڤێجا مە گۆت: هەى ئادەم، ب راستى ئەڤە دژمنێ تە و ژنا تەيە، ڤێجا هشيار بن هەوە ژ بەحەشتێ دەرنەئێخيت، ئەگەر دێ زەحمەت و وەستيانێ بينى ب ژيانا خۆ يا دنيايێڤە، تە ئەو بيت، نە تو تێدا ـ د بەحەشتێدا ـ برسى ببى، و نە ژى تێدا رويس ببى، و نە تێدا تێنى دبى، و نە ژى گەرما هەتاڤێ ل تە ددەت، ڤێجا شەيتانى وەسواس و گۆمان ئێخستە دلێ وى و د بەر خەلەتيێرا كر، گۆت: هەى ئادەم ئەز دارا هەرمانێ و ملكێ بێ ڤەبرين، نيشا تە بدەم؟ ڤێجا ب فندوفێلي خاپاندن و د بەر خەلەتيێرا كرن، وان ژ وێ دارێ خوار ئەو دارا خودێ نەهيا وان ژێ كرى، ڤێجا وەختێ خوارين شەرمگەها وان (عەورەتا وان) بۆ وان دياربوو، و دەست هاڤێتنێ بەلگێت بەحەشتێ ژێڤەكرن و شەرمگەها خۆ پێ نخافتن، و ئادەمى نەگوهداريا خودايێ خۆ كر، ڤێجا نەگەهشتە ئارمانجا خۆ يان ژى ژيانا وى نەخۆش بوو، ب هاتنەخوارا وى بۆ دنيايێ، پاشى ئادەم ژ كريارا خۆ پەشێمان بوو، و تۆبە كر و خودايێ وى ئەو بۆ پێغەمبەراتيێ هەلبژارت، و تۆبە ژێ قەبوول كر و ل سەر قايم كر.
ڤێجا ئەڤە قورئانا پيرۆزە بۆ مە ديار دكەت چو راستى بۆ وێ ئاخفتنێ نينە دايكا مە حەوا بوو ئەگەرا سەرداچۆنا باب ئادەم پێغەمبەرى (سلاڤێت خودێ لێ بن)، و هەكە تشتەك بۆ ڤێ هەبيت د ژێدەرێت ئيسرائيلياندا يا هاتى و ئەڤە بۆ مە نابيتە ژێدەر و نابيت ئەم دويف بچين نەخاسمە هەكە د ژێدەرێت مە بەروڤاژى وێ چەندێ هاتبيت، و خودێ چێتر دزانيت.
