ب / زانا ل سەر مافداريا زەلامى ل سەر نەهێلانا سەرەدانا ژنا وى بۆ دايبابێت خۆ جهێ نەلێكيێنە ل سەر دوو بۆچۆنان:
ئێك: بۆ زەلامى هەيە نەهێليت ژنا وى دەركەڤيت سەردانا دايبابێت خۆ بدەت چ د نەساخ بن يان نە، و دڤێت ژن گوهداريا زەلامێ خۆ بكەت، و هەكە گوهداريا وى نەكر يا گونەهكارە، و ئەڤە بۆچۆنا شافعي و حەنبەليانە، و بەلگەيێ وان حەديسا ئەنەسيە يا بن بەتتە د كتێبا (احكام النساء)دا ئيناى، ئەنەس (خودێ ژێ رازی بیت) دبێژيت: (أن رجلاً سافر ومنع زوجته الخروج، فمرض أبوها فاستأذنت رسول الله صلى الله عليه وسلم في حضور جنازته فقال لها: اتقي الله، ولا تخالفي زوجك، فأوحى الله إلى النبي صلى الله عليه وسلم أني قد غفرت لها بطاعة زوجها) زەلامەكى وەغەركر و نەهێلا ژنا وى دەركەڤيت، بابێ وێ نەساخ بوو، دەستويرى ژ پێغەمبەرى (سلاڤێت خودێ لێ بن) خواست سەرا بابێ خۆ بدەت گۆتێ ژ خودێ بترسە و بێ ئەمريا زەلامێ خۆ نەكە، بابێ وێ مر.. دەستورى ژ پێغەمبەرى (سلاڤێت خودێ لێ بن) خواست ل سەر جەنازێ وى بەرهەڤ ببيت گۆتێ: ژ خودێ بترسە و بێ ئەمريا زەلامێ خۆ نەكە، ئينا خودێ وەحى بۆ پێغەمبەرى (سلاڤێت خودێ لێ بن) هنارت: من گونەهێت وێ ژێبرن ژبەر گوهداريا وێ بۆ زەلامێ وێ.
دوو: ل دويف بۆچۆنا دووێ يا حەنەفى و مالكى و زاهريان زەلامى ئەو ماف نينە ژنا خۆ ژ سەرەدانا دايبابێت وێ ڤەگريت و بۆ وێ هەيە دەم دەم سەرا دايبابێت خۆ بدەت زەلامى بڤێت نەڤێت و بۆ وى نينە نەهێليت، و حەنەفى دبێژن: بۆ وێ هەيە هەر حەفتيێ جارەكێ سەرا دايبابێت خۆ بدەت، و ئەڤ بۆچۆنە دورستترە، چونكى ئەو بەلگەيێ خودانێت بۆچۆنا ئێكێ پشتبەستى بۆ كرى يێ لاوازە و كەسێ ژ خودانێت كتيبَت بەرنياس ژ سونەنان نەئينايە و نەڤەگێرايە، و ئەڤ حەديسە د ئەحيائى و مەنارولسەبيل و د ئەوسەتا تەبەرانيدا هاتيە، و دوو كەس د رێكا وێدا د لاوازن: عسمەتێ موتەوەكل و زافرێ كورێ سولەيمانێ قەهستانى، و ئيمامێ عيراقي د تويژاندنا ئەحيائێدا و زانا ئەلبانى د (ارواء الغليل)ێدا لاواز دانايە، و خودێ چێتر دزانيت.
