ب / دويفچۆنا بەلگە و دەق و فەرمان و حوكمان بێ گۆمان ديار دبيت خودايێ مەزن چو حوكم و فەرمان نەداينە هەكە بۆ ئينانا خێرێ و پاشڤەبرنا خرابيێ نەبيت، ڤێجا ئەڤ فەرمانە د چ بواردا بيت يێ عيباداتا يان د هەڤكارياندا بيت ڤێجا مە باوەريا موكم يا هەى دەمێ ئيسلامێ بەردان كريە د دەستێ زەلاميدا و ماف دايە وى ژبۆ حيكمەت و نهێنيەكا خێرێيە، و ئەڤ خێرە بۆ هەردوويان دزڤريت زەلامى و ژنێ؛ نە زەلامى ب تنێ، و دبيت ئەم ڤێ نهێنيێ و حيكمەتێ بزانين و دبيت ئەم نەزانين، بەلێ دڤێت مە باوەرى هەبيت چو فەرمان د بێ حيكمەت و نهێنى نينن و دبيت نهێنيا مافداركرنا زەلامى تنێ ب بەردانێ بزڤريتە ڤان ئەگەرێت خوارێ:
ئێك: خودێ مەزن رێڤەبرنا ژيانا هەڤژينيێ كريە د ستۆيێ كێدا و كى ژێ بەرپرسياركريە، زەلام يێ ژێ بەرپرسياركرى و دڤێت ئەو ب رێڤەبرنا مالێ رابيت. خودێ مەزن دبێژيت: ((الرِّجَالُ قَوَّامُونَ عَلَى النِّسَاءِ بِمَا فَضَّلَ اللَّهُ بَعْضَهُمْ عَلَى بَعْضٍ وَبِمَا أَنْفَقُوا مِنْ أَمْوَالِهِمْ فَالصَّالِحَاتُ قَانِتَاتٌ حَافِظَاتٌ لِلْغَيْبِ بِمَا حَفِظَ اللَّهُ)) زەلام سەركار و سەرپەرشتێت كار و بارێت ژنانە، ئانكو: دڤێت ئەو ل بەر خزمەتا وان بن و ب كار و بارێت وان رابن ژبەر كو خودێ هندەك ب سەر هندەكان ئێخستينە، و ژبەر كو زەلام مالێ خۆ د بەر واندا دمەزێخن، ڤێجا ژنێت چاك و كار راست و گوهدارێت خودێ و زەلامێت خۆنە و ب ئەركێ خۆ رادبن د راستا خودێدا، و پاشى د راستا زەلامێت خۆدا بۆ مال و نامويسا زەلامێت خۆ د پشت ويرا، ب هاريكاريا خودێ پارێزەرن و ئەڤ چەندە پتر دخوازيت بەردان د دەستێ زەلاميدا بيت.
دوو: بەردان ب خۆ گەلەكا ب ترسە و ئەنجامێت وێ ب ترسن، چونكى دبيتە ئەگەرێ تێكدانا ژيانا هەڤژينيێ و مارەكرن دهەلوەشيت و بچويك و زارۆك د ناڤبەرا دايك و باباندا بەرزە و پەريشان دبن، ژبەر هندێ نابيت لەز لێ بێتەكرن، و هەتا بريارا بەردانێ بێتە دان دڤێت هزرەكا كوير و دوير د ئەنجام و شوينوارێت وێدا بێتەكرن، و لەزكرن ژ سروشتێ مرۆڤيە و زوى كەربگرتنا ويە و ئاريانا هەستا ويە دەمێ بەرهنگارى هەڤركى و كەربێ دبيت، و هەكە زەلام و ژن هەردوو د ڤان رەوشت و رەوشاندا د هەڤپشك بن بەلێ يا بەرچاڤ زەلام پتر ژ ژنێ دشێت بێهنا خۆ فرەهكەت و خۆ ل بەر بگريت و ژ سروشتێ خۆ نەدەركەڤيت و هەستێ خۆ دەستەسەركەت و لەزێ ل بەردانێ نەكەت و بريارا بەردانێ نەدەت و ژبەر ڤێ مافێ تەلاقێ بۆ وى بێتەدان يێ بێهن فرەهى پتر هەى دا لەز ل تەلاق و بەردانێ نەهێتەكرن دورستتر و دادپەروەريترە.
سێ: تەلاق و بەردان بارەكێ بەرپرسيا مالى دئێخيتە ستۆيێ زەلامى، ئێك: دڤێت مارێ بدەت، دوو: دڤێت نەفەقێ عيددێ بدەت و كريا دادۆكى و دايينەكێ بدەت هەكە بچويكێت ب شير هەبن. ئەڤە هەمى زەلامى پال ددەن دەه جاركى هزرا خۆ بكەت بەرى پەنابرنێ ببەتە بەردانێ ئەڤ چەندە ژى دخوازيت بەردان د دەستێ ويدا بيت نەيێ ژنێ.
چار: دگەل ئەڤا بۆرى ژى، دانا مافێ بەردانێ بۆ زەلامى وێ ناگەهينيت رێكێت خۆرزگاركرنێ بەرامبەر ژنێ د گرتينە، هەكە زيان گەهشتێ و زەلامێ وێ نەخۆشى گەهاندنێ دشێت رێكا دادگەهێ بگريت و ژ دادوەرى بخوازيت ژ زەلامێ وێ رزگاركەت، هنگى دێ گوهدانا وێ هێتەكرن و هەكە بۆ دادوەرى ديار بوو يا ستەملێكريە دێ جابا زەلامێ وێ هنێريت يان دێ وێ زيان و ستەمێ راگرن و سۆزێ دەت لێ نازڤريتەڤە يان دادوەر دێ وان ژێكڤەكەت زەلامى بڤێت يان نەڤێت.
پێنج: رێكا دى يا ماف پاراستنێ: هەكە هەر ژ دەستپێكێ ژ ستەم و زولما زەلامى بترسيت بۆ هەيە هەروەكى هندە زانا دبێژن ئەو د گرێبەستا مارەكرنێدا ل سەر زەلامى مەرج بكەت بەردانا وێ دێ د دەستێ وێدا بيت، هەكە د مارەكرنێدا زەلام ب ڤى مەرجى رازى بوو هنگى دێ ژ دەستێ زەلامى دەركەڤيت و كەڤيتە د دەستێ وێدا، و خودێ چێتر دزانيت.
