ب / هەكە ژن هاتە بەردان يان زەلامێ وێ نەما و يا بچويك شيربيت يان بچويكێت وێ د بچويك بن و هەوجەى دلۆڤانيا وێ بن، بۆ زەلامى نينە بچويكێت وێ ژ وێ بستينيت هندى ئەو شوى نەكەت و مژويلى خزمەتا زەلامەكێ دى نەبيت، بەلگە ژى ڤەگێرا ئيمام ئەحمەدى و ئەبو داووديە ژ ژنەكێ هاتە دەف پێغەمبەرى (سلاڤێت خودێ لێ بن) گۆت: (يا رسول الله إن ابني هذا كانت بطني له وعاء، وثديي له سقاء، وحجري له حواء، وإن أباه طلقني وأراد أن ينتزعه مني، فقال لها النبي صلى الله عليه وسلم: "أنت أحق به ما لم تنكحي) ژنەك هاتە دەف پێغەمبەرى (سلاڤێت خودێ لێ بن) گۆتێ: يا پێغەمبەرێ خودێ ئەڤە كورآ منە زكێ من بۆ ئامان بوو و سينگێ من بۆ وى ئاڤدان بوو و كۆشا من بۆ وى حەواندن بوو، و بابێ وى ئەز يا بەردايم و دڤێت ژ من بستينيت، پێغەمبەرى (سلاڤێت خودێ لێ بن) گۆتێ: تو هەژيترى پێ هندى تو شوى نەكەى.
و هەكە دايك نەما، ل دەف جمهورێ زانايان دايكا وێ ئانكو داپيرا بچويكى يا دەيكێ هەژيترە بچويك ل دەف بن و پشتى وێ جهێ نەلێكيێيە د ناڤبەرا زاناياندا كا كى هەژيترە بچويك ل دەف بن.
و كا هەتا ژيێ چەندێ ئەڤ بچويكە دێ ميننە دەف دايكێ و نابيت زەلام ژێ بستينيت؟ ئەڤە جهێ نەلێكيێيە د ناڤبەرا زاناياندا، ل دەف حەنەفيان هەكە كچ بيت هەتا بالغ نەبيت بۆ زەلامى نينە بينيتە دەف خۆ، و ل دەف مالكيان هەكە كچ بيت نەبەس هەتا بالغ دبيت بەلكى هەتا شوى نەكەت، هندى شوى نەكەت دێ ل دەف دايكا خۆ بيت و بۆ بابێ نينە بينيتە دەف خۆ، و ل دەف شافعي و حەنبەليان هەرگاڤا گەهشتە ژيێ تەمييزێ و بسپۆريێ بۆ بابێ هەيە ژێ بستينيت و بينيتە دەف خۆ چ كچ بيت چ كور، چونكى ئەو ڤى ژى گەلەك هەوجەى دايكا خۆ نينن هندى باب يێ خراب نەبيت، بەلێ هەكە باب ب خرابى و بێ دينيێ يێ نياس بيت بۆ وى نينە خورتيێ ل عەيالێ خۆ بكەت و ژ دايكێ بستينيت و بينيتە دەف خۆ، و خودێ چێتر دزانيت.
