ب / زكرەشى و حەسويدى ژ گونەهێت زيانكارن، و گەلەگ زانا ژ گونەهێت مەزن و كەبائير ددانن، و گونەها ئێكێ بوو هاتيەكرن، شەيتانى حەسويدى ب ئادەمى (سلاڤێت خودێ لێ بن) بر و ژ زكرەشى ئەو هەلويست هەلگرت و فەرمانا د راستا ويدا دايى ب جهنەئينا و خۆ بۆ نەشكاند، لەوا ژ دلۆڤانيا خودێ هاتە دويرئێخستن و دەرێخستن، و حەسويدى و زكرەشى زيانێ دگەهينتە دين و دنيا زكرەشى.. د دنيايێدا نەرەحەتى و ئالۆزى و كەرب و كينێ دئێخيتە د دلێ ويدا و هەست ب ڤەهسين و رەحەتيێ ناكەت، و نەڤيانێ د راستا نێزيكترين كەسدا رادكەت و دلرەقيێ ل دەف پەيدا دكەت و خۆشيا وى دبيتە نەمانا خۆشي و خێرێت خەلكى و شوينا خێرخواز بيت خرابيخوازە، و ژ چارا زكرەشيێ ئەوە:
ئێك: باش بزانيت هەتا ئەو خێرێت كێم يێت هەين ژى بۆ نامينن و زكرەشى دخۆت و پويچ دكەت و ناهێليت. پێغەمبەرێ خۆشتڤى (سلاڤێت خودێ لێ بن) د ڤەگێرا داووديدا ژ ئەبو هورەيرە (خودێ ژێ رازی بیت) دبێژيت: (إياكُمْ والحسدَ، فإنَّ الحسدَ يأكُلُ الحسناتِ كَما تَأْكُلُ النًارُ الحطبَ، أوْ قال العُشْبَ) هشيار بن حەسويديا ئێك و دوو نەكەن، ب راستى حەسويدى خێران پويچ دكەت و دخۆت هەروەكى ئاگر داران دخۆت و دسۆژيت.
دوو: ب قەزا و قەدەرا خودێ د راستا خۆدا و خەلكيدا يێ رازى بيت و خۆ نەرازى نەكەت، و هەلگرتنا زكرەشى و حەسويديێ نەرازيبوونە و دژاتيا قەزا و قەدەرێيە، و يێ ب دورستى باوەريێ ب قەزا و قەدەرێ نەئينيت وى باوەرى نەئينايە. د ڤەگێرا موسلميدا پسيار ژ پێغەمبەرى (سلاڤێت خودێ لێ بن) هاتكرن ئيمان و باوەرى چيە گۆت: (أَنْ تُؤمِن بِاللَّهِ وملائِكَتِهِ، وكُتُبِهِ ورُسُلِهِ، والْيومِ الآخِر، وتُؤمِنَ بالْقَدَر خَيْرهِ وشَرهِ) باوەرى ئەڤەيە: تو باوەريێ ب خودێ و ملياكەتێت وى و كتێبێت وى و پێغەمبەرێت وى و رۆژا قيامەتێ بينى، و تو باوەريێ ب قەدەرێ بينى يا (بۆ تە) باش و (بۆ تە) خراب. (ئانكو يا ب دلێ تە و يا نە ب دلێ تە).
سێ: گازندا ژ خۆ بكەى و زێرەڤانيا خۆ بكەى و كار بكەى خۆ فێركەيە خێرخوازيێ و وەل خۆ بكەى كا چاوا تە خێر بۆ خۆ بڤێت.. وەسا تە بۆ غەيرى خۆ ژى بڤێت، و كا چاوا تە نەڤێت خرابى بگەهيتە تە.. وەسا تە نەڤێت بگەهيتە غەيرى تە، پێغەمبەر (سلاڤێت خودێ لێ بن) د ڤەگێرا بوخارى و موسلميدا ژ ئەنەسآ كورێ مالكى (خودێ ژێ رازی بیت) دبێژيت: (لاَ يُؤمِنُ أَحَدُكُمْ حَتَّى يُحِبَّ لأَخِيهِ مَا يُحِبُّ لِنَفْسِهِ) كەس ژ هەوە ب دورستى باوەريێ نائينيت هەتا وى خێر بۆ برايێ خۆ نەڤێت كا چاوا بۆ خۆ دڤێت.
چار: هەڤالينيا مرۆڤێت باش و خێرخواز و دوير ژ حەسويديێ و زكرەشيآ بكەت، ئەڤێت بەردەوام بەرێ وى بدەنە خێرخوازيێ و نەهێلن ئەو حەسويدى و زكرەشيێ د راستا كەسێدا راكەت، و هەڤالينى و ژينگەها زكرەش تێدا بهێليت، ئەوێت بەردەوام ئاگرێ زكرەشيآ دئێخنە د دليدا و گەش دكەن، چونكى پێغەمبەر (سلاڤێت خودێ لێ بن) د ڤەگێرا ئەبو داوود و ترمزيدا ژ ئەبو هورەيرە (خودێ ژێ رازی بیت) دبێژيت: (الرَّجُلُ عَلَى دِينِ خَلِيلِهِ، فَلْينْڤرْ أَحَدُكمْ مَنْ يُخَالِلُ) مرۆڤ يێ ل سەر دينێ هەڤالێ خۆ، ڤێجا بلا هەرئێك ژ هەوە بەرێ خۆ بدەتێ كا دێ هەڤالينيا كێ كەت.
پێنج: بەردەوام زكرێ خودێ بكەت و دوعا بكەت خودێ وى ژ حەسويدى و زكرەشيێ بپارێزيت، و بزانيت حەسويدى ژ شەيتانيە، ڤێجا دڤێت هەمى رێك و دەرگەه و پەنجەرێت شەيتانى ل خۆ بگريت و نەهێليت بشێت دلێ وى بغولغولينيت و حەسويديێ بهەلگريت، و خودێ چێتر دزانيت.
