ب / ديتنا پێغەمبەرى (سلاڤێت خودێ لێ بن) د خەونێدا نيعمەتەكە ب دەست هەمي كەسان ناكەڤيت و هيڤى و خوزيك و مەخسەد و مرادێت گەلەكانن، چونكى پێغەمبەرآ خودێ (سلاڤێت خودێ لێ بن) دبێژيت: يێ من د خەونێدا ببينيت ئەوى راستى ئەز ديتم، چونكى ب راستى شەيتان نەشێت خۆ بينيتە سەر خولكێ من. بەلێ هەكە ل سەر وى خولكى نەهاتە ديتن ئەوێ بۆ مە د كتێبێت حەديسێدا هاتيە ڤەگوهاستن و سەر خولكەكێ دى و رەوشەكا دى هاتە ديتن ئەو نەپێغەمبەرە (سلاڤێت خودێ لێ بن) بلا د خەونێدا هزركربيت ئەو پێغەمبەرە (سلاڤێت خودێ لێ بن) و خۆ وى ژى ئەوێ د خەونێدا ديتى گۆتبيتێ ئەز پێغەمبەرم مادەم ئەو كەسێ ديتى سالۆخەت و رەوشا پێغەمبەرى (سلاڤێت خودێ لێ بن) ل سەر ناهێت، بەلگە ل سەر ڤێ چەندێ زانايێ خەونزان موحەممەد بن سيرين (خودێ ژێ رازی بیت) هەكە ئێكى گۆتبايێ من پێغەمبەر (سلاڤێت خودێ لێ بن) يێ دخەونا خۆدا ديتى.. دابێژيتێ كا بۆ من رەوشا وى بكە، هەكە رەوشا وى كربا دا بێژيت راستە، و هەكە رەوشا وى نەكربا دا بێژيتێ تە نەديتيە. ديسا حاكم ڤەدگێريت ئێكى گۆتە ئبن عەباس (خودێ ژێ رازی بیت): من پێغەمبەر (سلاڤێت خودێ لێ بن) يێ دخەونا خۆدا ديتى، گۆتێ: بۆ من رەوش بكە، پشتى رەوشكرى گۆتێ راستە، و خودێ چێتر دزانيت.
