ب / بەلێ زڤراندنا مافێت خەلكى ئێكە ژ مەرجێت تەوبێ، يان ژى دڤێت مرۆڤ گەردەنا خۆ پێ بدەتە ئازاكرن. بەلێ هەكە مرۆڤى شيان نەبن بۆ بزڤرينيت يان ژى هەكە بۆ بزڤرينى دێ نەخۆشى پەيدا بيت و تو نەشێى داخوازا لێبۆرينێ ژى ژێ بكەى. هنگى زانايێت مە دبێژن: هەكە مالێ وى ل دەف تە بيت دڤێت تو ب رێكەكێ هەر رێكا هەبيت، و مەرج نينە تو ب خۆ بگەهينيێ، و هەكە هەر تو نەشياى هنگى پارێت وى دێ بۆ كەيە خێر و رۆژا قيامەتێ خودێ مەزن دێ وى رازى كەت و تۆبا تە يا دورستە، و هەكە زيان گەهاندبيتە ئێكى يان نەكاميا وى كربيت و نەشيا بچيتە دەف و بێژيتێ گەردەنا من ئازاكە من ئەڤ خەلەتيە د راستا تەدا يا كرى، هنگى دێ هند دوعا بۆ كەى هەتا تو دزانى تە هەقێ وى ژ سەر خۆ راكر، و ب ڤێ چەندێ ئەڤ مەرجە ب جه هات، و خودێ چێتر دزانيت.
