ب / ئەز نەشێم حوكمەكى بدەم بێژم ئەڤ داخوازنامە د حەرامن، ئەڤە يا خەلەتە، چونكى عادەتەكە و يێ بەلاڤە و دبيت پيچەكێ مرۆڤ ل سەر حەلاليا وان ژى راوەستيت نەخاسمە بۆ وى ئەوێ كارتا بۆ يێ بنياسيت و نەنياسيت بەلاڤدكەت بۆ مرۆڤێت خۆ و بۆ يێت وى جارەكێ سلاڤ ژى كريێ، و ب راستى رازيبوونا خەلكى گەلەكا ب زەحمەتە، هەكە خودانێ دەواتێ داخوازنامەيان فرێكەت يان نەفرێكەت هەر گازندە دێ بۆ چن، هەكە فرێكر دێ بێژن: مانێ ئەم مەجبوورين، و هەكە نەفرێكر نابێژيت: ئەز مەمنوونم چاڤدێريا من كر، نەخێر.. دێ كۆمەكا گازندەيان بۆ فرێكەت و نەدويرە بۆ خۆ بكەتە هێجەت پشتا خۆ بدەتێ و دلێت وان ژێك بمينن. و ب راستى يا پێدڤى ئەو بوو مە هەميان هاريكاريا ئێك و دوو د ڤان كراساندا كربا و پشكدارى خەمێت و خۆشيێت ئێك و دوو باين، بەلێ عەدەت يێ وەلێهاتى يێت ژ هەميان نێزيكتر حازر نابن هەكە داخوازنامە بۆ نەچن، ڤێجا خودانێ دەواتێ يێ مەجبوورە داخوازنامەيان فرێكەت، ڤێجا چەوا چێدبيت ئەم ژ دەف خۆ حەرامكەين، مخابن گەلەك جاران من يا گوه لێ بووى هندەكان يا سويند خوارى پارێت ب داخوازنامەيانڤە دهێن حەرامن، بەلێ دەمێ بوويە گەها وى تەخسيرى نەكريە د فرێكرنا داخوازنامەياندا، ئەرێ ئەڤە بۆچى؟! بۆ خەلكى حەرامن، بەلێ هەكە بوو دۆرا تە حەلالن؟! دێ بێژيت: مانێ ئەز ژى وەكى خەلكى! نەخێر، هەكە د حەرام بن و هۆسا يێ پشتراست بى دڤێت تو نێزيك نەبى، تە شۆلەب خەلكى نينە. ڤێجا دڤێت ئەم تەقوا خودێ مەزن بكەين و ل سەر پێ نەبينە مفتيێت زەمانى ڤى تشتى حەلالكەين و ڤى تشتى حەرامكەين. بێ داخوازنامە خودانێ دەواتێ نەشێت دەواتا خۆ بكەت، بەلێ دڤێت ئەو ژى بازنێ داخوازنامەيان زێدە بەرفرەه نەكەت بۆ هەڤال و برا و دۆستێت خۆ يێت دورستى فرێكەت و ئنيەتا وى ئەو نەبيت بێن پارا بدەن. ژبەر ئەڤا بۆرى ئەز دبينم ب شريعەت چو د داخوازنامەيێت دەواتاندا نينە:
1ـ هەكە ئنيەت يا دورست بيت.
2ـ ئيحراجا هەژاران تێدا نەبيت.
3ـ بازنێ بەلاڤكرنێ زێدە فرەه نەبيت هەتا يێت نياس و نەنياس بگريت، و خودێ چێتر دزانيت.
