ب / ب رێكا قورئانێ و حەديسێ ئەم دێ جيهانا ئەجنان نياسين و زانين، و دڤێت ئەم ژ نيشان و زانينێت قورئانێ و حەديسێ د دەرهەقێ ئەجناندا دەرباز نەبين. و سۆرەتەكا ب ناڤێ وان هاتيە ناڤكرن دبێژنێ: سۆرەتا (الجن) و درێژيا ژيانا وان جوين و پشكێت وان يێت تێدا و كا د باشن يان خرابن، و كا وان چ هەلويست بەرانبەر نامەيا پێغەمبەرى (سلاڤێت خودێ لێ بن) هەبوو. پێدڤيە ئەم بزانين ئەو ژى بەندە و عەبدن وەكى مە، و كا چەوا دڤێت ئەم پەرستنا خودێ بكەين وەسا پێدڤيە ئەو ژى خودێ بپەرێسن. خودێ مەزن دبێژيت: ((وَمَا خَلَقْتُ الْجِنَّ وَالْإِنْسَ إِلَّا لِيَعْبُدُونِ)) و خودێ ئەو نەداينە بۆ پەرستنا خۆ نەبيت. و پێغەمبەرێ مە (سلاڤێت خودێ لێ بن) هەر پێغەمبەرێ وانە ژى، لەوا ئەو دهاتن گوهداريا پێغەمبەرێ مە دكرن. و پێدڤيە بێژين رێكا ب تنێ و يا ئێكانە بۆ نياسينا ڤێ جيهانێ قورئان و حەديس ب تنێيە. و ئەم دبينين ڤێ دويماهيێ كەنالێت عەسمانى زێدە بەرفرەه ل سەر دئاخڤن و كتێب ل سەر دئێنە نڤێسان، بەلێ ئەڤ بەرفرەهيا ژ تخويبێت قورئانێ و حەديسێ دبۆريت نەيا دورستە. و هەر تشتێ پێدڤى ئەم ل ڤێ جيهانێ بزانين د قورئان و حەديسێدا يا هەى و هەركەسێ بڤێت بەرفرەهتر زانينا ل دۆر ئەجنان بزانيت بلا بزڤريتە كتێبا (عالم الجن والشياطين) يا (عمر سليمان الاشقر)، و خودێ چێتر دزانيت.
