ب / ئەخلاق و بازرگانى و ئابۆر د ئيسلامێدا پێكڤە دگرێداينە و نابيت ژێك بێنە جوداكرن، بۆ نموونە: بازرگانيا حەرام نابيت بێتەكرن خۆ چەند مفا ژى تێدا هەبيت، راستى و ئەميناتى دڤێت بەردەوام ل دەف بازرگانى هەبيت، حيلە و تەشقەلە و سەختەيى دڤێت ب چو رەنگان نەكەڤيتە د بازرگانيێدا، دڤێت بازرگان ژ خودێ بترسيت و تەقوا خودێ ل دەف هەبيت؛ دا ب چو رەنگان نەكەڤيتە خەفكا خەمخوارنا ژ مفاى ب تنێ، و هەر رێكا هەبيت دڤێت بازرگان رێكێت شەرعى پێڤەتر بۆ زێدەكرنا مالێ خۆ نەگريت. مە د ئيسلامێدا ئەڤ باوەريە نينە (الغاية تبرر الوسيلة) ئانكو: ئارمانج رێكێ دورست دكەت، نەخێر د ئيسلامێدا ئارمانج دڤێت يا شەرعى بيت و رێك ژى دڤێت يا شەرعى بيت. و پێغەمبەرێ مە (سلاڤێت خودێ لێ بن) بەردەوام بازرگان ل سەر ڤێ پەروەردێ رادكرن كو بازرگانيێ و ئەخلاقى ب چو رەنگان ژێك جودا نەكەن هەكە سەرفەراز نابن، بەلكى نابيت بازرگانێ موسلمان بازرگانيا خۆ ژ ئارمانج و رامانێت ئاخرەتێ رويت بكەت.
بەرێ خۆ بدێ ئەوێ ب رێكەكا خەلەت دگەهيتە فايدەى كا پێغەمبەر (سلاڤێت خودێ لێ بن) د راستا ويدا چ دبێژيت، ئەبو زەر (خودێ ژێ رازی بیت) دبێژيت: پێغەمبەر (سلاڤێت خودێ لێ بن) دبێژيت: (ثلاثة لاينظر الله اليهم يوم القيامة ولايزكيهم ولهم عذاب اليم، المنان والمسيل ازاره تكبرا والمنفق سلعته بالحلف الكاذب) سێ كەسان رۆژا قيامەتێ خودێ بەرێ خۆ نادەتە وان و گونەهێت وان ژێ نابەت و ئيزايەك دژوار ژى بۆ وانە، ئێك: ئەوە يێ تشتێ خۆ ل سەر خەلكى دكەتە منەت، دوو: يێ جلكێ خۆ ژ مەزناتى درێژ دكەت. سێ: يێ تشتێ خۆ ب سويندێت درەو بفرۆشيت.
سەبارەت ديعايەت و راگەهاندنێ.. هەكە راستيێ بەرزەكەت و ب دەهان مەدحێت نەوەيى تێدا بن و ببيتە ئەگەرێ خاپاندنا خەلكى و زيان گەهاندنێ هنگى ئەڤە نەيا دورستە.
بەلێ هەكە ديعايەت د تخويبێت خۆ يێت بەرعاقلدا بيت و نەيا وەسا بيت خەلك پێ بێتە خاپاندن و ئەو ب خۆ يا وەسا بيت دورستە و چو تێدا نينە. پێغەمبەر (سلاڤێت خودێ لێ بن) دبێژيت: (بازرگانێ باش ئەڤەيە: اذا باعوا لم يمدحوا واذا اشتروا لم يذموا) ئانكو: تشتێ دفرۆشيت زێدە مەدحێت وى تشتى ناكەت و هەكە كرى هند كێم ناكەت و ناهاڤێژيتێ دا بهايێ وى بينيتە خوارێ، و خودێ چێتر دزانيت.
