ب / پێدڤيە مرۆڤێ گونەهكار چو جاران ژ رەحما خودێ بێ هيڤى نەبيت، خودێ مەزن د حەديسا قودسيدا دبێژيت: هەى بەندەيێ من.. هەكە گونەهێت تە بكەڤنە سەرێك هەتا بگەهنە بەرپەرێت عەسمانان يان هندى كەفزا دەريايان لێ بێن بەس تو چو شريكان بۆ من چێنەكەى ئەز دێ گونەهێت تە ژێبەم و من منەت ژى پێ نينە.
ديسا خودێ مەزن د قورئانا پيرۆزدا دبێژيت: ((وَالَّذِينَ لَا يَدْعُونَ مَعَ اللَّهِ إِلَهًا آخَرَ وَلَا يَقْتُلُونَ النَّفْسَ الَّتِي حَرَّمَ اللَّهُ إِلَّا بِالْحَقِّ وَلَا يَزْنُونَ وَمَنْ يَفْعَلْ ذَلِكَ يَلْقَ أَثَامًا))(( يُضَاعَفْ لَهُ الْعَذَابُ يَوْمَ الْقِيَامَةِ وَيَخْلُدْ فِيهِ مُهَانًا)) ئانكو: ئەوێت ژبلى خودێ دوعايان ژ كەسێ دى نەكەن و ژبلى خودێ كەسێ نەپەرێسن و ئەوێت كەسێ بێ نەهەقى نەكوژن و زنايێ و دەهمەن پيسيێ نەكەن، و هەركەسێ ڤان بكەت دێ گونەه ل سەر ستويربن و دێ پێ ئێتە ئيزادان، رۆژا قيامەتێ ئيزا دێ ل سەر بيتە دوقات و هەروهەر دێ رەزيل و شەرمزار تێدا مينيت. دويفدا خودێ مەزن دبێژيت: ((إِلَّا مَنْ تَابَ وَآمَنَ وَعَمِلَ عَمَلًا صَالِحًا فَأُولَئِكَ يُبَدِّلُ اللَّهُ سَيِّئَاتِهِمْ حَسَنَاتٍ وَكَانَ اللَّهُ غَفُورًا رَحِيمًا)) ژبلى وى يێ تۆبەكرى و باوەرى ئيناى و كار و كريارێت راست و قەنج كرين، ئەڤێت هۆسا؛ خودێ دێ گونەهێت وان كەتە خێر. دێ گونەهێت وان ژێ بەت و خێران ل شوينێ دانيت و خودێ ب خۆ گونەه ژێبەر و دلۆڤانە. و ديسا خودێ مەزن د جهەكێ ديدا دبێژيت: ((إِنَّ اللَّهَ لَا يَغْفِرُ أَنْ يُشْرَكَ بِهِ وَيَغْفِرُ مَا دُونَ ذَلِكَ لِمَنْ يَشَاءُ)) خودێ مەزن هەمى گونەهان ژێ دبەت شيرك نەبيت.
هنديكە شيركە وێ ژێ نابەت ئەوا مرۆڤ دمريت و تۆبە ژێ نەكەت، بەلێ هەكە ل خۆ زڤرى و تۆبەكر ئەو ژى دێ ئێتە ژێبرن، لەوا خودێ مەزن د ئايەتەكا ديدا دبێژيت: ((إِنَّ اللَّهَ يَغْفِرُ الذُّنُوبَ جَمِيعًا إِنَّهُ هُوَ الْغَفُورُ الرَّحِيمُ)) ژبەر هندێ خودێ مەزن ئەمرێ مە دكەت ((لَا تَقْنَطُوا مِنْ رَحْمَةِ اللَّهِ)) ژ رەحما خودێ بێ هيڤى نەبن. و د ئايەتەكا ديدا دبێژيت: ((وَلَا تَيْأَسُوا مِنْ رَوْحِ اللَّهِ إِنَّهُ لَا يَيْأَسُ مِنْ رَوْحِ اللَّهِ إِلَّا الْقَوْمُ الْكَافِرُون)) ئانكو: ژ رەحما خودێ بێ هيڤى نەبن، ب راستى ژبلى گاوران كەسێ دى ژ رەحما خودێ بێ هيڤى نابيت.
بەلێ ڤێرێ پێدڤيە تو پسيارا خۆ بكەى بۆچى تو نەشێيە خۆ و جارەكا دى هەر دكەڤيەڤە د عەينى گونەهێدا. دڤێت ئەگەرەك هەبيت وێ ئەگەرێ راكە و چارەسەركە ئانەهيا خودێ دێ ل سەر تۆبا خۆ مينى:
1ـ دبيت تە هەڤالێت خراب نەهێلابن، ئەو هەڤالێت وێ گونەهێ ل بەر تە سڤك دكەن و ترسا وێ ل دەف تە دكەنە چونە.
2ـ ديسا دبيت ئەو جهێ تە د ناڤدا گونەه كرى تە نەهێلا بيت و تو هەر يێ ل وى جهى گونەهێ دئينيتە بيرا تە و تە رادكێشيتێ.
3ـ ديسا دبيت پشتى تو ژ گونەهێ رەڤى تە خۆ نەگەهانديە جهێ ئێمن ئەو جهێ تە ژ گونەهێ بپارێزيت و بۆ تە ببيتە كەلهە.
ئەو جه ژى هەڤالێت باشن. ب راستى يێ بڤێت ل سەر تۆبا خۆ بمينيت دڤێت زوى هەڤالينى و دۆستينى و تێكەليا موسلمانان بكەت و مرۆڤێت چاك، و دگەل وان روينيت و رابيت دا ئەو بۆ وى ببنە كەلهە و وى ژ گونەهێ بپارێزن.
4ـ دبيت گەلەگ تشتێت گونەهێ دئيننە بيرا تە، تە خۆ ژێ نەخلاس كريە، وەكى: وێنا و نامەيان و تشتێت هۆسا، ڤێجا بەرێ خۆ بدە خۆ هەكە تە تۆبەكا راست و دورست كربيت خودێ دێ هاريكارێ تە بيت.
و دويماهيێ ئەز دبێژم: يێ ب راستى تۆبە بكەت دڤێت وان رێكان بگريت يێت ببنە هاريكار كو ئەو ل سەر تۆبا خۆ بمينيت، و تۆبا ب ئەزمانى تنێ بەس نينە، و خودێ چێتر دزانيت.
