ب / دەستپێكێ ئەز ئلتيزاما تە ب ئيسلامێ ل تە پيرۆز دكەم، و دوعا ژ خودێ دكەم مە هەميان پێكڤە راگريت و دويماهيكا خێرێ و يا باش ب رزقێ مە هەميان بكەت. ئەز دبێژم رێكا جگارە هێلانآ نەئەوە مرۆڤ سويندان بخۆت، بەلكى رێكا دورست يا جگارە هێلانآ ئەڤەيە مرۆڤى باوەريەكا موكم هەبيت كو جگارە يا حەرامە و نەيا دورستە، و ئەز نابێژم حەراميا وێ دگەهيتە زنايێ و عەرەقێ، بەلێ پا يا حەرامە، و هەمى دەليل و بەلگە دگەل هندێنە كو نەيا دورستە، ئەز دبێژم رێكا كاريگەر و يا ژ هەميان باشتر بۆ جگارە هێلانێ ئەڤەيە: مرۆڤى باوەرى هەبيت، و باوەرى بۆ مرۆڤى چێ ببيت كو جگارە يا حەرامە، وەكى ئەڤ باوەريە بۆ مرۆڤى چێ بوو، هنگى باوەريا مرۆڤى ناهێليت مرۆڤ نێزيكى حەرامى ببيت، و دێ مرۆڤى ژ حەرامى دەتە پاش، بەلكى گەلەك تشت ژ جگارێ خۆشتر يێت هەين هەكە ئەم بينينە بەرامبەر خۆشيا جگارێ بەلێ باوەريا مرۆڤى ژبەر حەراميا وان مە ژێ ددەتە پاش، ڤێجا بزڤرە باوەريا خۆ، وێ باوەريێ بۆ خۆ چێكە؛ دا بشێى بهێلى و بەرهنگارى سويند خوارنێ و شكاندنا وان نەبى، چونكى هەر شكاندنا سويندەكێ كەفارەتەك دكەڤيتە سەر تە، وەكى تو دبێژى سەد جاران تە سويندا خوارى جگاران بهێلى و تو نەشيايە و تە سويندا خۆ يا شكاندى، و جارەكا دى تو يێ زڤريەڤە جگاركێشانێ، تو دزانى ب ڤى كارى تە سەد كەفارەت يێت ئێخستينە سەر خۆ، پاشى تو دبێژى ما ئەڤە ئيدمانە! بەلێ ئيدمانە، ما ئيدمان يا ب شاخە تو هند سويندان دخۆى و دشكێنى، و چارەسەركرنا ڤێ ئيدمانێ ژى ئەڤەيە پيچ پيچە و ل دويف نەخشەكآ موكم و هوير جگاران كێم كەي، هەتا ب دورستى بهێلى يان ژى باوەريەكا موكما موكم بۆ خۆ چێ كەى كو جگارە يا حەرامە؛ دا بشێى ئێكجارى خۆ ژێ بدەيە پاش و هەوجەي سويندان نەبى، ب راستى هێلانا هەمى رەنگێت حەراميان ب باوەريێڤە د گرێداينە، هەكە باوەريا موكم و بنەجه هەبيت پەيڤەك ب تنێ بەسى مەيە، ئەم حەرامى بهێلين، و خۆ ژێ بدەينە پاش خۆ ئەم چەند ژى پێڤە د گرێداى بين. بەرێ خۆ بدە خەلكآ مەدينآ گەلەك ژ وان ل سەر ڤەخوارنا عەرەقێ د مودمن بوون، بلێ دەمێ عەرق حەرام بووى خودێ مەزن گۆتە وان ((فَهَلْ أَنْتُمْ مُنْتَهُونَ)) ، ئێكسەر ئامانێت خۆ يێت عەرەقآ شكاندن و عەرەقا تێدا رژاندن و گۆتن: (انتهينا ربنا)، ڤێجا ئێك ئاخفتن بەسى مرۆڤيە هەر تشتەكآ هەبيت مرۆڤ بهێليت هەكە مرۆڤى باوەرى هەبيت يا حەرامە، دوعا ژ خودێ مەزن دكەم هاريكاريا مە هەميان بكەت ئەم خۆ ژ هەمى حەراميان دوير بێخين، و حەرامى ب هەمى رەنگانڤە ل بەر دلێ مە رەشكەت، و خودێ چێتر دزانيت.
