ب/ پێغەمبەرآ خۆشتڤى (سلاڤێت خودێ لێ بن) ئەم گەلەك و گەلەك ژ نەساخي و خرابيا دلى يێت ترساندين، و يا بۆ مە دياركرى ساخلەميا لەشآ يا د ساخلەميا دليدا و خرابيا لەشى يا د خرابيا دليدا، و دبێژيت: (ألا ان في الجسد مضغة اذا صلحت صلح الجسد كله واذا فسدت فسد الجسد كله) بزانن لەشى پارچەيەكا تێدا، هەكە باش بوو، ئەڤە لەش هەمى باش بوو، و هەكە خراب بوو ئەڤە لەش هەمى خراب بوو ((ألا وهي القلب)) و بزانن ئەو پارچە ـ ئەوا خرابى و باشى پێڤە گرێدايى ـ دلە.
ڤێجا هەكە دل يێ پاقژ بيت، ئەڤ لەشە هەمى دێ يێ پاقژ بيت، و هەكە خراب بوو و خرابى گەهشتێ، ئەڤە لەش هەمى خراب بوو، و كێر نەهات. ژبەر هندێ پێدڤيە مرۆڤ گەلەك و گەلەك هاى ژ دلێ خۆ هەبيت، و يێ لێ هشيار بيت، و نەهێليت خرابى ب چو رەنگان، رێكا خۆ بۆ ببينيت. و دڤێت بزانين چو تشت د لەشێ مرۆڤيدا هندێ فەر و ستراتيجى نينە وەكى دلى، ژبەر هندێ دڤێت گەلەك و گەلەك ئاگەه ژێ هەبيت، و هەر ژبەر هندێ ژى ئێك ژ زانايان دبێژيت: هنديكە دلە كەلهەكا گەلەك گرنگە، دڤێت زێرەڤانێ ڤێ كەلهێ چو جاران چاڤێت خۆ نەدانيتە سەرێك و غافل نەبيت، چونكى چاڤێت دژمنى يێ ل دلى، كا كەنگى چاڤێت زێرەڤانى دێ چنە سەرێك و غافل بيت؛ دا ئێكسەر هێرشێ ببەتە سەر و داگيركەت و بێخيتە بن دەستێ خۆ، چونكى هندى هند ئەو جهەكێ ستراتيجى و گرنگە، و ئەو نەيارێ چاڤێ وى بەردەوام يێ لێ زل؛ شەيتانە و هەكە وى ئەو جه گرت، جهێت دى هەمى گەلەك و گەلەك ب ساناهينە، زێرەڤانێ دلى چ تشتە؟ دڤێت هەر يێ هشيار بيت و چاڤێت وى نەچنە سەرێك، چونكى دژمنێ هشيارە و بەر راوەستياى خۆ ل هيڤيا گاڤەكا غەفلەتێ دگريت.. ئەو زێرەڤان باوەريە، ئەو باوەريا دلى هەردەم دهێليتە هشيار، ژبەر هندێ دڤێت ئەڤ باوەريە چو جاران سست و لاواز نەبيت، چونكى هەر لاوازيەك لاوازيە بۆ زێرەڤانى، و هەكە زێرەڤانێ دلى لاواز بوو، شەيتان ب ساناهى دێ جهێ خۆ تێدا كەت. و ئێك ژ نيشانێت ئاشكرا مرۆڤ بزانيت كا دلێ مرۆڤى يێ نەساخە يان يێ ساخلەمە، بەرێ خۆ بدەتە دلێ خۆ دگەل موسلمانان يآ چاوايە و دگەل گونەهكاران يآ چاوايە، بەرآ خۆ بدەتە خۆ كا ڤان هەردوو هەست و مەشاعران (ڤيان و نەڤيانان) ددەتە كێ و ل سەر چ بنياتى هەكە نەڤيانا خۆ دا هندەكان ل سەر چ بنيات و شەنگستە، و هەكە ڤيانا خۆ دا هندەكان ل سەر چ بنيات و شەنگستە، هەكە گەهشتە بەرسڤەكا راست و دورست و نەيا خاپينۆك دێ بۆ دياربيت كا دلێ وى يێ چاوايە، هۆسا ديار دبيت پيڤەرێ زانينا نەخۆشى و ساخلەميا دلى ئەڤ هەردوو هەستە (ڤيان و نەڤيان) بۆ جهێ هەژى دەردكەڤن و راستيا ڤێ چەندێ ئەڤەيە: پێغەمبەرێ خۆشتڤى (سلاڤێت خودێ لێ بن) دبێژيت: (من أَحَبَّ لِلَّهِ وَأَبْغَض لِلَّهِ وَأَعْطى لِلَّهِ وَمَنَعَ لِلَّهِ فَقَدْ اسْتَكْمَلَ الإيمَانَ) هەركەسێ بۆ خودێ ڤيا و بۆ خودێ نەڤيا و بۆ خودێ دا و بۆ خودێ ڤەگرت و نەهێلا ب راستى وى باوەريا خۆ تمامكر، ديسا پێغەمبەر (سلاڤێت خودێ لێ بن) دبێژيت: (أوثق عري الإسلام الحب في الله والبغض في الله) تشتێ ژ هەميا موكمتر مرۆڤ خۆ پێڤەبگريت د ئيسلامێدا حەژێكرنە بۆ خودێ و نەڤيانە بۆ خودێ، ديسا دگەل من بەرێ خۆ بدێ كا پێغەمبەرێ خۆشتڤى (سلاڤێت خودێ لێ بن) چ دوعا دكر دا بزانين كا ئەڤ مرۆڤە چەندێ دويرى رێكا پێغەمبەريە (سلاڤێت خودێ لێ بن) ئەڤ دوعايە دكر: (اللهم اجعلنا هادين مهديين غير ضالين ولا مضلين عدوا لأعدائك وسلما لأوليائك نحب بحبك الناس ونعادي بعداوتك من خالفك من خلقك) يا خودێ مە بكە راستەرێكريێت راستەرێكەر نە يێت بەرزە و نە يێت بەرزەكەر، دژمن بۆ دژمنێت خۆ و دۆست و ئاشت بۆ مرۆڤێت خۆ، ب حەژێكرنا تە حەژ خەلكى بكەين و ب ئەگەرێ دژمنيا تە دژمنيا وى بكەين يێ نەگوهداريا ئەمرێ تە دكەت، ڤێجا بلا ئەڤە بەرێ خۆ بدەنە خۆ و هەلويستێ خۆ كا ئەو چەند پێگرى ڤى بنەماي و مەبدەئينە، و دڤێت بزانن ڤيان بۆ خودێ و نەڤيان بۆ خودێ ژ ئيمانێيە هەروەكى ئيمامێ بوخارى ڤى شەنگستى د كتێبا خۆدا ئەوا پشتى قورئانا پيرۆز دهێت ل دەف هەمى زانايان بنەجه دكەت دبێژيت: ڤيان بۆ خودێ و نەڤيان بۆ خودێ ژ ئيمانێيە، و ئەڤێت ڤيان و نەڤيانا وان بەروڤاژى ڤيانا خۆ ددەنە وان ئەوێت ڤيابا نەڤيان دابا وان، و نەڤيانا خۆ ددەنە وان ئەوێت ڤيابا ڤيانا خۆ دابايێ، چونكى موسلمانن و خودێ نياسن و ئارمانجا وان سەركەفتنا دينآ خودێيە، و دينێ خودێ بۆ ببيتە رێباز و ياسا و دستور و مەنهەجێ ژيانێ. خودێ مەزن دبێژيت: ((لَا تَجِدُ قَوْمًا يُؤْمِنُونَ بِاللَّهِ وَالْيَوْمِ الْآخِرِ يُوَادُّونَ مَنْ حَادَّ اللَّهَ وَرَسُولَهُ وَلَوْ كَانُوا آبَاءَهُمْ أَوْ أَبْنَاءَهُمْ أَوْ إِخْوَانَهُمْ أَوْ عَشِيرَتَهُمْ أُولَئِكَ كَتَبَ فِي قُلُوبِهِمُ الْإِيمَانَ وَأَيَّدَهُمْ بِرُوحٍ مِنْهُ وَيُدْخِلُهُمْ جَنَّاتٍ تَجْرِي مِنْ تَحْتِهَا الْأَنْهَارُ خَالِدِينَ فِيهَا رَضِيَ اللَّهُ عَنْهُمْ وَرَضُوا عَنْهُ أُولَئِكَ حِزْبُ اللَّهِ أَلَا إِنَّ حِزْبَ اللَّهِ هُمُ الْمُفْلِحُونَ)) نينە هندەك باوەريێ ب خودێ و رۆژا قيامەتێ بينن، و حەژ وان بكەن ئەوێت نەيارەتى و دژمناتيا خودێ و پێغەمبەرێ وى دكەن، خۆ ئەگەر ئەو باب و باپيرێت وان بن، يان زارۆكێت وان بن، يان برايێت وان بن، يان عەشيرەتا وان بيت، ئەڤان خودێ باوەريا د دلێت واندا نڤێسى و بنەجهكرى، و ب هاريكارى و پشتەڤانى و سەركەفتنا خۆ ئەو يێت ب هێز ئێخستين، و دێ وان بەتە بەحەشتێت رويبار د بنرا دچن و هەروهەر دێ تێدا بن، خودێ ژ وان رازى بوو و ئەو ژى ژ خەلاتێ خودايێ خۆ رازى بوون، و ئەڤە كۆما خودێنە و باش بزانن يێت سەرفەراز هەر كۆما خودێنە. پاشى ئەو ل كێرينە ژ ئاخفتنا خودێ ((إِنَّمَا الْمُؤْمِنُونَ إِخْوَةٌ)) هندى خودان باوەرن برايێت ئێكن. ئەڤەيە براينى، نەڤيانا وان راكەن ژبەر چ؟! ژبەر خرابيا وان؟! ژبەر نەباشيا وان؟! ژبەر كێرنەهاتنا وان؟! ژبەر كێم و كاسيێت وان؟! نەخێر پا ژبەر چ! ژبەر هندێ چونكى نڤێژكەرن و ئيسلامخوازن، ئەز دترسم هەلويستآ ڤان وەكى هەلوستآ ملەتێ (لوط) پێغەمبەرى بيت (سلاڤێت خودێ لێ بن) كەرب ژ وان هەلگرتن ئەڤێت باوەرى ب پێغەمبەرێ خۆ ئيناين و دويفچۆنا وى كرين ژبەر چ؟! نە ژبەر چو ئەگەران ژبلى هندآ دەهمەن پاقژيخواز بوون گۆتن: ((خْرِجُوهُمْ مِنْ قَرْيَتِكُمْ إِنَّهُمْ أُنَاسٌ يَتَطَهَّرُونَ)) و ملەتێ وى چو بەرسڤ نەبوون ژبلى كو گۆتن (لوط)ى و يێت باوەرى پێ ئيناين: ڤان ژ گوندێ خۆ دەربێخن، ب راستى ئەو خۆ پاقژ ددانن. بەرسڤا وان ژى ئەڤێت نەڤيانا ئيسلامخوازان دكەن هەر ئەڤەيە: ڤان دڤێت هەمى تشتان بێخنە بن شەريعەتێ خودێڤە و هەمى كاروبارێت مە بزڤريننە خودێ و پێغەمبەرێ وى و بكەنە بن سيبەرا خودێ و پێغەمبەرێ ويڤە، يان ئەو ل كيرێنە ژ نياسينا پێغەمبەرى (سلاڤێت خودێ لێ بن) دايە موسلمانى، بلا بەرێ خۆ بدەنە خۆ كا ئەو پێناس و نياسينە وان دگريت. پێغەمبەر (سلاڤێت خودێ لێ بن) د ڤەگێرا بوخارى و موسلميدا دبێژيت: (المُسْلِمُ أَخو المُسْلِمِ) موسلمان برايێ موسلمانيە، ئەرێ ما ئەڤەيە برايني كەربێ ژ وان راكەت؟! و نەڤيانێ ژ وان راكەت؟! و حەژ وان نەكەت؟! نەژ بۆ چو سويچ و سەبەبان.. بۆ هندێ نەبيت ئيسلامخوازن. زانايێت مە دبێژن ژ وان شافعي (خودێ ژێ رازی بیت): ئەو كەسێ نەڤيان و كەربا ئێكى د دليدا شەهدەييا وى د راستا ويدا قەبويل نابيت، باشە هەكە هۆسابيت بێژە شەهدەييا ڤان د راستا چەنداندا قەبويل نابيت، زانايێ ناڤدار ئبن كەسير (خودێ ژێ رازی بیت) د تەفسيرا خۆدا دبێژيت: موسلمان ئەهلێ سوننەتێ ئەون يێت رازيبوونا خودێ بۆ وان دخوازن، ئەوێت خودێ ژ وان رازى و پشتەڤانيا وان دكەن ئەوێـت پشتەڤانيا خودێ دكەن، و دژمنيا وان دكەن ئەوێت دژمنيا خودێ دكەن، بەرێ خۆ بدێ ئها موسلمان و ئەوێت دويف رێكا پێغەمبەرى دچن ئەڤنە، بەلێ مخابن ئەڤ مرۆڤە ب دورستى بەروڤاژى ڤێنە، هاريكارێت نەيارێت خودێنە و نەيارێت مرۆڤێت خودێنە، ديسا ئبن تەيميە (خودێ ژێ رازی بیت) دبێژيت: واجبە ل سەر هەر موسلمانەكى ڤيانا وى و نەڤيانا وى و پشتەڤانيا وى دويف فەرمانا خودێ و پێغەمبەرێ وى بيت، حەژ وى بكەت يێ خودێ و پێغەمبەر حەژێ دكەن، و ئەو نەڤێت يێ خودێ و پێغەمبەرآ وى نەڤێت، و پشتەڤانيا وى بكەت يێ پشتەڤانيا خودێ و پێغەمبەرێ وى دكەن، و دژمنيا وى بكەن يێ دژمنيا خودێ و پێغەمبەرێ وى دكەن، و خودێ چێتر دزانيت.
