ب / ئەمرێ مە موسلمان يێ هاتيەكرن مە تايبەتمەنديا خۆ هەبيت، و ناسناما مە يا جڤاكى و ئەخلاقى و ئابۆرى و هەر لايەكێ دى د چو ناسنامێت ديدا حەلنەبين، و دڤيت ئەم تايبەتمەنديا خۆ بپارێزين، و دڤێت بزانين مە هندە سنج و ئەخلاق و رێز و سەروبەرێت تايبەت يێت هەين و نابيت ئەم چاڤ ل رێز و سەروبەر و عەدەتێت غەيرى خۆ بكەين، چونكى پێغەمبەرێ خۆشتڤى (سلاڤێت خودێ لێ بن) دبێژيت: (من تشبه بقوم فهو منهم) هەچيێ خۆ وەكى غەيرى خۆ لێ بكەت و ژ تايبەتمەنديێت خۆ دەركەڤيت ئەو ژ وانە يێت خۆ وەكى وان لێكرى، و ئەڤ كارە پتر جهێ مەترسيێيە هەكە ئەو چاڤلێكرن ژ حەژێكرنێ بيت، هنگى دێ حەشرا مرۆڤى دگەل وان بيت ئەوێت مە چاڤ لێ كرين، چونكى پێغەمبەرێ خۆشتڤى (سلاڤێت خودێ لێ بن) دبێژيت: (يحشر المرء مع من احب) مرۆڤ دێ دگەل وى رابيت يێ حەژێ دكەت، بەلێ هەكە مرۆڤ رۆژا بوونا خۆ يان يا عەيالێ خۆ بينيتە بيرا خۆ؛ دا شوكرا خودێ بكەت كو ئەڤە هندە سال ژ ژيێ وى يان يێ عەيالێ وى ب سلامەتى و بێ بەلا بۆرين، و خودێ ژ ئێش و نەخۆشى و ئاتاف و رويدانێت نەخۆش پاراست و هزرا خۆ بكەت ئەڤە هندە سال ژ ژيێ من چۆن، كا من چ تێدا كريە ئەرێ ئەز تێدا يێ خوسارەتم يان يێ فايدەمە خێر و گونەهێت خۆ بينيتە بەرێك و هەلسەنگاندنەكێ بكەت و جەردەكا هوير بۆ كار و كريارێت خۆ بكەت چونكى دزانيت رۆژا قيامەتێ پسيارەكا تايبەت دێ ل سەر ژيێ وى هێتەكرن نەخاسمە ژيێ گەنجينيێ، پێغەمبەرێ خۆشتڤى (سلاڤێت خودێ لێ بن) دبێژيت: ((پێت چو بەندەيان ناهێن و بچن (ئانكو مرۆڤ هەمى نە بۆ بەحەشتێ نە بۆ جەهنەمێ دچن هەتا ئەڤ پسيارە ژێ نەهێنەكرن) هەتا پسيار ژ وى نەئێتە كرن: ژ ژيێ وى كا د چدا بۆرانديە، و ژ زانينا وى كا چ كار پێ كريە، و ژ مالێ وى كا ژ كيرێ ئينايە و د چدا مەزاختيە، و ژ لەشێ وى كا د چدا كەڤنار كريە (هەروەكى وەختێ ئەو يێ جەحێل يێ ب هێز و نوى بوو، بەلێ ئەڤ نوياتيە كەڤن دبيت هەروەكى جلكێ نوى كەڤن دبيت)). دا بزانيت كا ئەو بۆ چ راست د ژيێ خۆدا دچيت، بەلكى ل خۆ بزڤريت و حسێبەكا دى بكەت يان يا عەيالێت خۆ دا بيرا وان بينيتە شوكرا خودێ و بيرا وان بينيتە هندێ چەند سالەك ژ ژيێ مە دچيت هند ئەم نێزيكى دويماهيك و مرن و گۆرێ خۆ دبين. ئەڤ رەنگە ساخكرنە باشە و چو تێدا نينە، چونكى پێغەمبەر (سلاڤێت خودێ لێ بن) دبێژيت: (إنَّما الأَعمالُ بالنِّيات، وإِنَّمَا لِكُلِّ امرئٍ مَا نَوَى) ب راستى هەمى كار و كريار ب ئنيەتانە، و ب راستى بۆ هەر مرۆڤەكى كا چ ئنيەت ئينايە دێ ئەو بيت، بەلێ ئەڤا دهێتەكرن ئاهەنگگێران و مەزخاندنا پارەكێ مەزن و كرنا گونەهان و دورستكرنا تێكەهەليا حەرام و ئەڤە هەمە هەر بۆ چاڤلێكرن و تەقليد ئەز نابينم يا دورستە، چونكى هەر كارەكآ هەبيت ب ئنيەتا خۆڤە يێ گرێدايە، و خودێ چێتر دزانيت.
