ب / ئەم دوعا ژ خودێ دكەين خودێ ئاخفتنێت باش و پاك و جوان بێخيتە سەر ئەزمانآ وێ، و يێت وەكى وێ، و ئاخفتنێت نەجوان و نەشرين و خەلەت و خراب و خوار و ڤيچ ژ سەر ئەزمانێ وێ ببەت. دڤێت ئەم باش و باش بزانين يێ ب دورستى باوەرى ب خودێ و رۆژا قيامەتێ هەبيت ژ ئاخفتنا خێرێ زێدەتر نائينيتە سەر ئەزمانێ خۆ، و ب چو رەنگان رێكێ نادەتە ئاخفتنا خراب و نادەتە شەيتانى ئەو ئاخفتنا خراب بينيتە سەر ئەزمانێ وێ، چونكى پێغەمبەرێ خۆشتڤى (سلاڤێت خودێ لێ بن) دبێژيت: هەروەكى د سەحيحەينێدا هاتى: (مَنْ كَانَ يُؤمنُ بِاللَّهِ وَالْيومِ الآخِر، فَلْيقُلْ خَيْراً أَوْ لِيسْكُتْ) يێ باوەرى ب خودێ و رۆژا قيامەتێ هەبيت بلا ئاخفتنا خێرێ بێژيت يان خۆ بێ دەنگ بكەت، ئەڤ حەديسە ئاشكرا دكەت كو دڤێت نەئاخڤى ژبلى كو ئاخفتنا خێرێ بيت، و ئاخفتنا خێرێ ئەوە: يا خێر و بەرژەوەندى لێ ئاشكرا ببيت، و هەر گاڤا گۆمان ب ئاشكراييا خێرێ چێ بوو بلا نەئاخڤيت، ڤێجا يێ ڤآ بزانيت چاوا دێ رێكا ئاخفتنا خراب دەت بێتە سەر ئەزمانێ وى، يێ بزانيت ئاخفتنا خراب و باش گرێدان و پەيوەنديا ب ئيمان باوەريا ويڤە يا هەى چاوا دێ رێكێ دەتە ئاخفتنا خراب، ديسا خودێ مەزن دبێژيت: ((مَا يَلْفِظُ مِنْ قَوْلٍ إِلَّا لَدَيْهِ رَقِيبٌ عَتِيدٌ)) و مرۆڤ چو ئاخفتنان ناكەت چ باش چ خراب، و ملياكەتەكێ كاركرى و زێرەڤانێ دگەل، نەنڤێسيت. يێ ڤێ بزانيت ئاخفتن سەر حسێبن و چو ئاخفتنان ناكەت هەكە ل سەر نەهێنە نڤێسين چاوا دێ ئاخفتنێت خراب بێژيت، مرۆڤێ ب ئاقل دڤێت بزانيت پێدڤيە ل سەر وى ئەزمانێ خۆ ژ هەمى ئاخفتنان بپارێزيت ئاخفتنەك نەبيت خێر لێ ئاشكرا ببيت، و هەر وەختێ ئاخفتن و هێلانا وێ د راستا خێرێدا وەكى ئێك لێهاتن، د ڤى كراسيدا يا سونەت نەئاخفتنە، چونكى دبيت ئاخفتنا حەلال بكێشيتە ئاخفتنا حەرام يان يا نەباش، و وەكى ڤێ گەلەكە، و چو بەرامبەرى سلامەتيێ ناگرن. و دڤێت ئەم بزانين بەحەشت و بەحەشت خوازى يا ب پاراستنا ئەزمانيڤە يا گرێدايە. پێغەمبەرآ خۆشتڤى (سلاڤێت خودێ لێ بن) دبێژيت: هەروەكى ديسا د بوخارى و موسلمێدا هاتى: (مَنْ يضمَنْ لي ما بيْنَ لَحْييْهِ وَمَا بيْنَ رجْلَيْهِ أضمنْ لهُ الجَنَّە) هەركەسێ دەمانێ ب پاراستنا مابەينا هەردوو پێت خۆ ـ مەخسەد پێ دەڤ و ئەزمانە، نە حرام ب دەڤى بێتە خوارن و نە خرابى ب ئەزمانى بێتە گۆتن ـ و مابەينا هەردوو پێت خۆ بدەتە من ئەز دێ دەمانێ ب بەحەشتێ دەمێ. ديسا دبێژيت: (مَنْ وَقَاهُ اللَّه شَرَّ مَا بيْنَ لَحْييْهِ، وشَرَّ مَا بَيْنَ رجْلَيْهِ دَخَلَ الجنَّة) هەركەسێ خودێ ئەو ژ خرابيا مابەينا هەردوو پيێت وى (ئانكو خرابيا دەڤ و ئەزمانى) و ژ خرابيا مابەينا هەردوو پێت وى پاراست ئەو چۆ بەحەشتێ. يا ئەو كەسێ تو رێكێ ژ ئاخفتنا خراب نەگرى، و رێكا خۆ ب ساناهي دبينيت بۆ سەر ئەزمانێ تە، و تو ڤێ سڤك ددانى، دگەل گوهێ خۆ بدە ڤآ حەديسێ يا مەعاز (خودێ ژێ رازی بیت) بۆ مە ژ پێغەمبەرێ خۆشتڤى (سلاڤێت خودێ لێ بن) ڤەدگوهێزيت: دبێژيت من گۆت: يا پێغەمبەرێ خودێ، كارەكى بۆ من بێژە من ببەتە بەحەشتێ و من ژ ئاگرى دوير بێخيت، گۆت: تە پسيارا تشتەكێ مەزن كر، و ئەو يا ب ساناهيە بۆ وى يێ خودێ مەزن ل سەر ساناهى كربيت: تو خودێ بپەرێسى و چو شريك و هەڤكويفان بۆ چێنەكەى، نڤێژان ب رەنگێ پێدڤى و بەردەوام بكەى، و زەكاتێ بدەى، رەمەزانێ بگرى، و بچيە حەجێ هەكە تە پێ چێبيت، پاشى گۆت: ئەز دەرگەهێت خێرێ نيشا تە نەدەم؟ رۆژى پارێزەرە (ژ ئاگرى و گونەهان) و سەدەقە شوينوارێت گونەهێ ژێ دبەت هەروەكى ئاڤ ئاگرى دڤەمرينيت، و نڤێژا مرۆڤى نيڤا شەڤێ. پاشى ئەڤ ئايەتە ((تَتَجَافَى جُنُوبُهُمْ عَنِ الْمَضَاجِع)) خواند هەتا گەهشتيە ((يَعْمَلُون)) ـ كار و كريارێت وان دكرن ـ (قەوى تەنشتێت وان ناكەڤنە سەر نڤينان ئانكو: كێم دنڤن، و رادبن شەڤنڤێژان دكەن و ب ترس و هيڤيڤە دوعايان ژ خودێ دكەن، و رزقێ مە دايە وان خێر و سەدەقەيان ژێ ددەن. كەس نوزانيت چو خەلات يێ بۆ وان هاتيە ڤەشارتن، چاڤێت وان پێ رۆن ببن و ب ديتنا وى شاد ببن، ژبەر وان كار و كريارێت وان دكرن). پاشى گۆت: ئەرێ ئەز سەرێ كارى و ستوينا وى و گوپيتكا وى بۆ تە نەبێژم؟ من گۆت: بەلێ يا پێغەمبەرێ خودێ، گۆت: سەرێ كارى ئيسلامە و ستوينا وى نڤێژە و گوپيتكا وى جيهادە، پاشى گۆت: يا ئەڤە هەمى پێڤە رادبيت بۆ تە نەبێژم؟ من گۆت: بەلێ يا پێغەمبەرێ خودێ. ئەزمانێ خۆ گرت و گۆت: ئەڤى بەسكە، من گۆت: يا پێغەمبەرێ خودێ ما دێ ل مە هێتە گرتن ل سەر ئاخفتنا ئەم دئاخڤين؟ گۆت: تو ل دەيكا خۆ بەرزەببى (نفرينە، بەلێ مەخسەد پێ نەنفرينە، بەلكى مەخسەد پێ تۆرەئێخستنا ويە و گوهشينە چاوا ڤێ پسيارێ دكەت) ما تو هزرەكا دى دكەى نە يا مە گۆتى، ما چ خەلكى سەر سەر و چاڤان دهاڤێژيتە د جەهنەمێدا ئەنجام و دورينا ئەزمانێ وان نەبيت (ئانكو ئەو نەبيت يا ئەزمان دبێژيت). دڤێت ئەم گەلەك و گەلەك هشيارى ئەزمانێ خۆ بين چونكى بۆياغ و شوين دەست و كارلێكرنا ئەزمانى ڤەددەتە هەمى لەشى و هەمى ئەندامێت لەشى لەوا پێغەمبەرێ خۆشتڤى (سلاڤێت خودێ لێ بن) دبێژيت: (إذا أَصْبح ابْنُ آدم، فَإنَّ الأعْضاءَ كُلَّهَا تُكَفِّرُ اللِّسانَ، تَقُولُ: اتِّقِ اللَّه فينَا، فَإنَّما نحنُ بِكَ: فَإنِ اسْتَقَمْتَ اسَتقَمْنا وإنِ اعْوججت اعْوَججْنَا) هەكە سپێدە ل مرۆڤى بوو هەمى ئەندامێت وى خۆ بۆ ئەزمانى دشكێنن و دبێژن: ب راستى ئەم ب تەڤە د گرێداينە، ڤێجا هەكە تو راست بووى ئەم راست بووين، و هەكە تو خوار بووى ئەم خوار بووين. و هەمى رەنگێت ئاخفتنێت خراب دڤێت ئەزمانآ مرۆڤى نەنياسن نەخاسمە جارەكا دى نەخاسمە خەبەر، چونكى پێغەمبەر (سلاڤێت خودێ لێ بن) د راستا خەبەراندا هەروەكى د بوخارى و موسلمێدا هاتى، دبێژيت: (سِباب المُسْلِمِ فُسوقٌ) خەبەرگۆتنا موسلمانى ژ رێ دەركەفتنە. ڤێجا ئەز دبێژم: هەكە تو باش هزرا خۆ د دويماهيا ئاخفتنێت خرابدا بكەى و باش هزرا خۆ د ڤان ئاخفتناندا بكەى بەسى تەيە تو رێكآ نەدەيە ئاخفتنێت خراب بگەهنە سەر ئەزمانآ تە يان ژ ئەزمانآ تە دەركەڤن، و خودێ چێتر دزانيت.
