ب / ب راستى ڤيانا دورست يا مريێ مرۆڤى ئەڤەيە ئەز د هزرا ويدابم كا دێ چاوا جهي وى د قەبرێ ويدا خۆشكەم و كا دێ چاوا چەنتكا وى يا خێرا گرانكەم و كا چاوا دێ خێرێ گەهينمێ.. ئەڤەيە ڤيان و دلسۆزى و حەژێكرنا دورست نە ب خۆدادان و گرى و نەخشاندنا گۆرێ وى و مەزنكرن و هەلاويستنا وێنێت وى، ئها دڤێت مرۆڤ هۆسا د خێرا مريێ خۆدا بيت، و هۆسا هزرێ تێدا بكەت كا دێ چاوا خێر و خێراتان گەهينمێ. جارا ئێكێ بەرێ خۆ بدێ و پسيار بكە كا دەين ل سەر هەنە دەينێت وى پێشڤە بدە، چونكى گونەها دەينى نەخاسمە هەكە خەمسارى تێدا هاتبيتەكرن ناهێتە ژێبرن.
هەروەكى موسلمى ڤەگێراى.. پێغەمبەرێ خۆشتڤى (سلاڤێت خودێ لێ بن) دبێژيت: خودێ هەمى تشتان بۆ شەهيدى ژێ دبەت دەين نەبيت، پاشى بەرێ خۆ بدێ كا چ دەينێ خودێ ل سەرە، هەكە حەج ل سەر بيت و حەج نەكربيت بۆ هەرە حەجێ، و بەرێ خۆ بدێ كا چ وەسيەت كريە، هەكە وەسيەتا خێرێ بيت ب جه بينە، و پاشى چاڤێ خۆ باش بدە زارۆكێت وى، پەروەردەكا باش بدە بەر وان، چونكى هەكە ئەڤ زارۆكە باش پەروەردەبين هەر خێرا ئەو دكەن وان بڤێت و نەڤێت دێ گەهيتە برايێ تە. پێغەمبەرێ خۆشتڤى (سلاڤێت خودێ لێ بن) دبێژيت: هەكە مرۆڤ مر كار و كريارێت وى دهێنە برين سێ تێ نەبن: سەدەقەكا بەردەوام يان زانينەكا مفادار يان كورەكێ باش دوعا بۆ بكەت. و هەكە تە شيان هەبن خێرەكا بەردەوام بۆ بكە وەكى مزگەفتەكێ ب ئنيەتا وى ئاڤاكەى يان پشكداريێ تێدا بكەى، هندە كتێبێت دينى ب خێرا وى چاپكەى و بەلاڤكەى، رێكەكێ ببەيە جهەكى، خەستەكێ ئاڤاكەى، چاڤدێريا شاگردێت علمى بكەى، و بزانە هەر خێرا تو بۆ برايێ خۆ دكەى هند خێر بۆ تەيە ژى بێ كێماسى، و خودێ چێتر دزانيت.
