ب / ئەم دەستخۆشيێ ل ڤى براى دكەين و دبێژينێ سەحەتا تە خۆش و بەرەكەتا خودێ ل تە بيت، ئها پێدڤيە موسلمان يێ هۆسا بيت، هەرگاڤا شەيتان شيا بۆ دەمەكێ كێم و بێ ئاگەهيێ موسلمانى سەردا ببەت، زوى ل خۆ دزڤريت و بەرێ خۆ ددەتە رێكا حەق و راستيێ، و رێكا شەيتانى دهێليت و رێكا خودێ دگريت و ل خۆ دزڤريت، هەروەكى خودێ مەزن رەوشا وان دكەت دبێژيت: ((إِنَّ الَّذِينَ اتَّقَوْا إِذَا مَسَّهُمْ طَائِفٌ مِنَ الشَّيْطَانِ تَذَكَّرُوا فَإِذَا هُمْ مُبْصِرُون)) ب راستى ئەوێت پارێزكارى كرين، هەروەختەكێ وەسواسەك ژ شەيتانى گەهشتە وان، فەرمانا خودێ هاتە بيرا وان، ڤێجا ب خۆ دحەسن، و چاڤێت وان باش رۆن دبن، و دزانن ئەڤە وەسواسا شەيتانيە، خۆ ژ گونەهێ ڤەدكێشن و گوهێ خۆ نادەنە شەيتانى. ڤێجا ئەوێت ركمان و رژدياتيێ ل سەر گونەهـ و سلبوونێ دكەن بلا ژ خودێ بترسن و بزانن پشتى بيرا وان ل گونەهێ دهێتە ئينان هەر بمينن ل سەر ركمانا خۆ ئەو نە ژ پارێزكار و خودێ ترسانە، چونكى پارێزكار و خودێ ترس ئەوە هەرگاڤا كەفتە خەلەتيآ ل خۆ بزڤريت و ل سەر خەلەتيآ نەمينيت، و ژێك سلبوون و گەلێك نەئاخفتن گونەهە و بێ ئەمريا خودێ و پێغەمبەرێ ويە (سلاڤێت خودێ لێ بن)، چونكى خودێ مەزن ئەمرێ مە دكەت ئەم برايێت ئێك بين: ((إِنَّمَا الْمُؤْمِنُونَ إِخْوَةٌ)) ئانكو: هندى خودان باوەرن برايێت ئێكن، ڤێجا دڤێت پشتا خۆ نەدەنە ئێك و دوو، و كەرب و كينێ ژ ئێك و دوو نەراكەن و ژ ئێك و دوو سل نەبن، و پێغەمبەرێ خۆشتڤى (سلاڤێت خودێ لێ بن) بۆ مە د حەديسەكێدا ديار دكەت براتيا د دينيدا دڤێت يا چاوا بيت، دبێژيت: حەسويديێ ب ئێكدوو نەبەن، و ب سەر ئێكدوو زێدەنەكن ب ئنيەتا تێئێخستنێ و خوسارەتيا هەڤالێ خۆ، و كەربێت خۆ ژ ئێكدوو ڤەنەكەن و نەڤيانا ئێكدوو نەهەلگرن، و ژ ئێكدوو سل نەبن و پشتا خۆ نەدەنە ئێكدوو، و كرين و فرۆتنێ ل سەر كرين و فرۆتنا ئێكدوو نەكەن، و بەندەيێت خودێ بن و برايێت ئێك بن، (ئانكو هەڤكاريا براينيێ دگەل ئێكدوو بكەن) موسلمان برايێ موسلمانيە، نە ستەمێ لێ دكەت، نە كێم دكەت، و نە دهێليتە ب تنێ بێ هاريكارى، تەقوا و خودێ ترسى، ئها يا ل ڤێرێ و سێ جاران ئيشارەت كرە سينگێ خۆ، بەسى مرۆڤيە خرابى ئەو برايێ خۆ يێ موسلمان كێم بدانيت. هەمى تشتێ موسلمانى ل سەر موسلمانى حەرامە، خوينا وى و مالێ وى و نامويسا وى. و د حەديسەكا ديدا دبێژيت: موسلمان برايێ موسلمانيە، نە خيانەتێ لێ دكەت، نە درەوێ لێ دكەت، و نە دهێليتە ب تنێ بێ هاريكارى، هەمى تشتێ موسلمانى ل سەر موسلمانى حەرامە، نامويسا وى و مالێ وى و خوينا وى، تەقوا و خودێ ترسى، ئها يا ل ڤێرێ (و ئيشارەت كرە دلێ خۆ) بەسى مرۆڤيە خرابى ئەو برايێ خۆ يێ موسلمان كێم بدانيت. و د حەديسەكا ديدا هەروەكى بوخارى و موسلمى ڤەگێراى دبێژيت: موسلمان برايێ موسلمانيە، نە ستەمێ لێ دكەت، و نە دەستان ژێ بەرددەت، هەركەسێ د هەوجەييا برايێ خۆدا بيت، (ئانكو هەوجەيێت وى بقەتينيت) خودێ دێ هاريكاريا وى كەت د هەوجەيێت ويدا، و هەركەسێ بەرتەنگيەكێ ل سەر موسلمانەكى راكەت، خودێ دێ بەرتەنگيەكێ ژ بەرتەنگيێت قيامەتێ ل سەر راكەت، و هەركەسێ موسلمانەكى پەردە و ستارەكەت، خودێ دێ وى رۆژا قيامەتێ ستارەكەت. ئەڤ حەديسێت بۆرى ديار دكەن دڤێت ئەم دگەلێك د چاوابين، هەروەكى خودێ مەزن ژ مە ڤياى، پشتى ڤێ پێشگۆتنێ دێ هێم بێژم: ئيسلام دينەكێ واقعيە و سەرەدەرى و تەعامولێ دگەل واقعى دكەت، و سروشتێ مرۆڤ ل سەر؛ دبيت هندەجاران كەرب دێ گريت و كەرب گرتى چيت و عەسەبى بيت، ژبەر كارڤەژەنەكێ و دێ بريارێ دەت دگەل يێ بەرامبەرى خۆ نەئاخڤيت، و دبيت ئەو مرۆڤێ وى ژى بيت يان دۆست و هەڤالەكێ نێزيك بيت، بەلێ دڤێت ئەڤ هەلويستە زێدە نەكێشيت و سێ شەڤ و رۆژان نەبۆريت، هەكە ژ سێ شەڤ و رۆژان بۆرى و هەردوو مانە ل سەر هەلويستێ خۆ و پشتا خۆ دانە ئێك و دوو.. هنگى ئەو هەردوو د گونەهكارن و دڤێت ژ هەلويستێ خۆ بێنە خوارێ و دەست ژ سلبوونا خۆ بەردەن و بهێلن، و رێكێ نەدەنە شەيتانى پتر د ناڤبەرا واندا نەخۆشكەت، چونكى ئەڤە مراد و خۆزيا شەيتانيە هەروەكى خودێ مەزن د راستا ويدا دبێژيت: ((إِنَّمَا يُرِيدُ الشَّيْطَانُ أَنْ يُوقِعَ بَيْنَكُمُ الْعَدَاوَةَ وَالْبَغْضَاءَ )) ب راستى شەيتانى دڤێت دژمناتى و نەڤيانێ بێخيتە د ناڤبەرا هەوەدا. و ئەو دەم ژى دڤێت ژ سێ رۆژان يان سێ شەڤان نەبۆريت. پێغەمبەرێ خۆشتڤى (سلاڤێت خودێ لێ بن) د حەديسا بوخارى و موسلميدا دبێژيت: كەربێت خۆ ژ ئێكدوو ڤەنەكەن و نەڤيانا ئێكدوو نەهەلگرن، حەسويديێ ب ئێكدوو نەبەن، و ژ ئێكدوو سل نەبن و پشتا خۆ نەدەنە ئێكدوو، و ئێكدوو نەهێلن و مرۆڤانيێ نەبرن، و بەندەيێت خودێ بن و برايێت ئێك بن، (ئانكو هەڤكاريا براينيێ دگەل ئێكدوو بكەن) و نەدورستە بۆ چو موسلمانان سێ رۆژان زێدەتر ژ برايێ خۆ سل ببن. و هەكە وان ژ سێ رۆژان بۆراند و دگەل ئێك و دوو نەئاخفتن هنگى ئەو يێ زيانەكا مەزن دگەهيننە ئاخراتە خۆ، و هەكە بزانن زيانا مرۆڤ ژێ بترسيت و خەمێ بۆ بخۆت هەر ئەڤەيە هەمى حەفتيا گونەهێت بەندەيان دووشەمب و پێنج شەمبان دهێنە ژێبرن ئەو نەبن ئەوێت ماينە ل سەر ركمانا خۆ و ژ ئێك و دوو سل. پێغەمبەرێ خۆشتڤى (سلاڤێت خودێ لێ بن) د راستا ڤاندا دبێژيت: دەرگەهێت بەحەشتێ رۆژا دووشەمبێ و پێنج شەمبێ دهێنە ڤەكرن، ڤێجا گونەهێت هەر بەندەيەكێ هەبيت چو شريك بۆ خودێ نەچێكربن دهێنە ژێبرن، مرۆڤەك نەبيت ئەو و برايێ خۆ (يان خويشكا خۆ) د ژێك سل بن، دێ بێژيت: ڤان هەردووكان بهێلن هەتا ژێك ئاشت دبن، ڤان هەردووكان بهێلن هەتا ژێك ئاشت دبن.
و يێ باشتر ژ هەردووكان ئەوە يێ بەرى هەڤالێ خۆ ئاشت ببيت و دگەل باخڤيت و سلاڤ بكەتي، پێغەمبەرێ خۆشتڤى (سلاڤێت خودێ لێ بن) دبێژيت: نەدورستە بۆ چو موسلمانان سێ شەڤان زێدەتر ژ برايێ خۆ سل ببيت، بگەهنە ئێك، ئەڤە بەرێ خۆ وەرگێريت و ئەڤە بەرێ خۆ وەرگێريت، و يێ باشتر ژ وان يێ بەراهيێ سلاڤ دكەت. و بلا ئەم بزانين مرنا ل پشتا گوهێ مە و ژ رها پاتكا مە بۆ مە نێزيكترە و يێ مر و ژ برايێ خۆ يان خويشكا خۆ سل وى دويماهيەكا كرێت بۆ خۆ هەلبژارت.. پێغەمبەرێ خۆشتڤى (سلاڤێت خودێ لێ بن) د راستا ڤى كەسيدا دبێژيت: نەدورستە بۆ چو موسلمانان سێ شەڤان زێدەتر ژ برايێ خۆ سل ببيت، و هەركەسێ زێدە ژ سێ شەڤان سل بوو و مر ئەو چۆ جەهنەمێ. و هەكە دوو ژ ئێك و دوو سل بوون و ئێكى ڤيا ژ گونەهآ دەركەڤيت بلا سلاڤكەتە هەڤالێ خۆ هەكە هەڤالێ وى سلاڤا وى وەرگێرا ئەڤە هەردوو ژ گونەهێ دەركەفتن، و هەكە بەرسڤا وى نەدا يێ سلاڤكرى ژ گونەهێ دەركەفت و يێ بەرسڤ نەداى ما د ناڤدا، ڤێجا يێ ژ پاشەرۆژا خۆ و چارەنڤيسێ خۆ و دويماهيا خۆ بترسيت گوهێ خۆ نادەتە شەيتانى، دێ دگەل هەڤالێ خۆ ئاخڤيت و سلاڤكەتێ ژبەر خۆ، دا خۆ ژ گونەهێ دەربێخيت. پێغەمبەر (سلاڤێت خودێ لێ بن) دبێژيت: نەدورستە بۆ چو موسلمانان سێ شەڤان زێدەتر ژ برايێ خۆ سل ببيت، ڤێجا هەكە سێ شەڤ بۆرين، بلا ببينيت و سلاڤكەتێ، و هەكە سلاڤا وى ڤەگێرا، ئەڤە هەردوو د خێرێدا پشكدار بوون، و هەكە لێ نەڤەگێرا، ئەو ب گونەهێ زڤرى، و موسلمان (يێ سلاڤكرى) ژ گونەهێ دەركەفت، و خودێ چێتر دزانيت.
