ب / نەخێر دڤێت هوين پشتا خۆ نەدەنێ و مرۆڤانيا وان نەبرن، و ئەز دبێژم يا فەرە هوين هەردوو ل دەف زانايەكى دينى رويننە خوارێ، دبيت هوين د نەحەق بن، مەرج نينە هوين د حەق و دورست بن، و دبيت خەلەتى ژ لايي هەوە بيت، و هەوە هاى ژ خۆ نە، هنگى هوين ئەگەرێ وێ سلبوونى و مرۆڤى برينێنە و هوين دێ د گونەهكار بن، بەلێ هەكە وەبيت وەكى تو دبێژى هەلويستێ شەرعى هوين هەر ل سەر باشيا خۆ بمينن، و وەكى وان نەكەن و هەر باشيێ ل شوينا خرابيێ دانن، خودێ مەزن دبێژيت: ((وَلَا تَسْتَوِي الْحَسَنَةُ وَلَا السَّيِّئَةُ ادْفَعْ بِالَّتِي هِيَ أَحْسَنُ فَإِذَا الَّذِي بَيْنَكَ وَبَيْنَهُ عَدَاوَةٌ كَأَنَّهُ وَلِيٌّ حَمِيمٌ))(( وَمَا يُلَقَّاهَا إِلَّا الَّذِينَ صَبَرُوا وَمَا يُلَقَّاهَا إِلَّا ذُو حَظٍّ عَظِيمٍ)) باشى و خرابى وەكى ئێك نابن؛ يا چێتر، خرابيێ پێ نەهێلە، ئەگەر تە ئەڤە كر، هنگى دێ بينى ئەوێ دژمنايى د ناڤبەرا تە و ويدا هەى، دێ وەكى هەڤالەكێ نێزيك و خۆشتڤى لێ ئێت. و كەس ناگەهيتە ڤێ پلەيێ كو باشيێ شوينا خرابيێ دانيت، ئەو نەبن ئەوێت سەبركێش، و كەس وەناكەت، خودان خێرەكێ مەزن نەبيت.
مرۆڤەك هاتە دەف پێغەمبەرى (سلاڤێت خودێ لێ بن) گازندا خۆ د راستا مرۆڤێت خۆ يێت خرابدا گەهاندە پێغەمبەرى (سلاڤێت خودێ لێ بن)، بەلێ پێغەمبەرى (سلاڤێت خودێ لێ بن) نەگۆتآ تو ژى وەكى وان بكە. ئەبو هورەيرە (خودێ ژێ رازی بیت) دبێژيت: زەلامەك هاتە دەف پێغەمبەرێ خودێ (سلاڤێت خودێ لێ بن) گۆت: يا پێغەمبەرێ خودێ، من هندە مرۆڤێت هەين ئەز خۆ دگەهينمێ ئەو خۆ ژ من دوير دئێخن، و ئەز قەنجيێ لێ دكەم، ئەو خرابيێ دگەهيننە من، و ئەز بێهنا خۆ ل وان فرەه دكەم.. ئەو ئاخفتنا دبێژنە من، گۆت: هەكە تو يێ وەسابى وەكى تە گۆتى، هەروەكى تو تۆزا گەرم ددەيێ، و بەردەوام دێ تە هاريكارى ژ خودێ ل سەر وان هەبيت هندى تو ل سەر ڤێ بى.
دگەل من گوهێ خۆ بدێ كا مرۆڤانى ل كيرێيە و كا چ دبێژيت دەرهەقێ ويدا يێ باشيێ بكەت و بگەهينيت و يێ خرابيێ بكەت و ببريت. پێغەمبەرێ خۆشتڤى (سلاڤێت خودێ لێ بن) دبێژيت: مرۆڤانى يا ب عەرشێ خودێڤە هەلاويستيە، دبێژيت: يێ بۆ من باش بيت خودێ دێ وى گەهينيتە دلۆڤانيا خۆ، و يێ من ببريت و دگەل من يێ خراب بيت خودێ دێ ژ دلۆڤانيا خۆ بريت. و يێ مرۆڤانيێ ببريت بلا بترسيت ئەو يێ گونەهەكا مەزن دكەت و شوينا بەرێ خۆ بدەتە بەحەشتێ بەرێ خۆ ددەتە جەهنەمێ و خۆ ژ بەحەشتێ زرباردكەت. پێغەمبەرێ خۆشتڤى (سلاڤێت خودێ لێ بن) دبێژيت: مرۆڤانى بر، ناچيتە بەحەشتێ.
و مزگينى بۆ وى يآ مرۆڤانيآ نەبريت، خودێ دێ د دنيايێدا دەتێ بەرى ئاخرەتێ. پێغەمبەرێ خۆشتڤى (سلاڤێت خودێ لێ بن) دبێژيت: هەركەسێ بڤێت رزقێ وى بۆ بێتە بەرفرەهكرن، و ژيێ وى و دويماهيا وى بۆ بێنە گيرۆكرن بلا خۆ بگەهينيتە مرۆڤيت خۆ (ئانكو بلا دگەل مرۆڤێت خۆ يێ باش بيت). بەس گەلەك كەس باشيا دگەل كەس و كاران خەلەت تێدگەهن، تێدگەهن هەكە دگەل تە د باش بن تو ژى دگەل وان باش بى و قەنجيێ بدانيە شوينا قەنجيێ، و هەكە د باش نەبن دگەل تە و چو قەنجيا دگەل تە نەكەن تو ژى وەكى وان بي، نە ئەڤە نە باشيا دورستە، لەوا پێغەمبەرێ خۆشتڤى (سلاڤێت خودێ لێ بن) هەروەكى د بوخاريێدا هاتى دبێژيت: (لَيْسَ الْواصِلُ بِالمُكافئ وَلكِنَّ الواصِلَ الَّذي إِذا قَطعتْ رَحِمُهُ وصلَهَا) يێ بۆ مرۆڤانيێ باش نەئەوە يێ قەنجى و باشيێ ل جهى بدانيت، بەلێ يێ بۆ مرۆڤانيێ باش ئەوە هەكە مرۆڤێت وى بۆ د خراب بن و ئەو بۆ وان هەر يێ باش بيت، و خودێ چێتر دزانيت.
