ب / د كەڤندا فەيلەسووفان يا گۆتى: نەبێژە من تو كى، بێژە من كا تو دگەل كآ دگەرى.. ئەز دێ بێژمە تە تو كى. لەوا پێدڤيە مرۆڤ يێ هشياربيت ژ ڤآ راستيێ و هەڤالينيا هەركەسەكێ هەبيت نەكەت و هەڤالينيا مرۆڤێ خراب نەكەت و دگەل نەگەريت و بهێت و بچيت و دگەل وى رابيت و روينيت، هەكە چەند خۆ بپارێزيت بڤێت و نەڤێت خرابيا وى دێ گەهيتێ. لەوا پێغەمبەرێ خودێ (سلاڤێت خودێ لێ بن) ئەم يێت ژ ڤێ راستيێ هشيار و ئاگەهداركرين دبێژيت: مرۆڤ يێ ل سەر دينێ هەڤالێ خۆ، ڤێجا بلا ئێك ژ هەوە بەرێ خۆ بدەتێ كا دێ هەڤالينيا كێ كەت. ديسا (سلاڤێت خودێ لێ بن) دبێژيت: هەڤالينيا كەسێ نەكە موسلمان و باوەردار نەبيت، و مخابن هندەك باشى و باوەرداريا هەڤالى بەرچاڤ ناوەرگرن و دبێژن: خرابيا وى بۆ ويە و باشيا وى بۆ من، هەروەكى ئەو يێ پاراستيە ژ خرابيا وى و خرابى ناگەهيتە وى، و بۆ زانين پێغەمبەرى (سلاڤێت خودێ لێ بن) ئەم يێ ژ هەڤالێ خراب ترساندين، چونكى هەكە چاوابيت دآ هەر زيانآ گەهينيتە مە، و هەڤالێ خراب ب خودانێ كويرهێ نموونە دكەت و هەڤالێ باش ب گولاڤ فرۆشى نموونە دكەت، (سلاڤێت خودێ لێ بن) هەروەكى بوخارى و موسلمى ژ ئەبى موسايآ ئەشعەرى (خودێ ژێ رازی بیت) ڤەگێراى دبێژيت: ب راستى نموونەيا هەڤالێ راستكار و باش و هەڤالێ خراب، وەكى هەلگر و خودانێ مسكێيە، و خودانێ كويرهێيە، هنديكە هەلگرێ مسكێيە، يان دێ دەتە تە، يان دێ ژێ كرى، يان دێ بێهنەكا خۆش ژ وى بينى (ئانكو دێ گەهيە هەوجەييا خۆ، چ ئەو بدەتە تە، چ بكرى، چ بێهن خۆشى بگەهيتە تە) و خودانێ كويرهێ، يان دێ جلكێت تە سۆژيت، يان دێ بێهنەكا گەنى ژ وى بينى. و دڤێت مرۆڤ بزانيت ئەڤێ ئەز دنيايێ بۆ هەڤالينيێ هەلدبژێرم و حەژێ دكەم رۆژا قيامەتێ دێ حەشرا من دگەل وى هێتەكرن و ملێ من دێ ب ملێ ويڤەبيت، چونكى پێغەمبەر (سلاڤێت خودێ لێ بن) دبێژيت: مرۆڤ رۆژا قيامەتێ يێ دگەل وى يێ حەژێ دكەت، ڤێجا كێ دڤێت رۆژا قيامەتێ دگەل خرابكاران بيت بلا هەڤالينيا وان بكەت و هەڤالينيا وان نەهێليت، يێ بڤێت رۆژا قيامەتێ دگەل چاك و باش و كێرهاتيان بيت بلا تێكەلى و هەڤالينيا وان بكەت، و ئەڤێت هەڤالينيا وان نە بۆ خودآ و ل سەر بنياتێ بەرژەونديا دنيايێ هەڤالينى كرين بلا بزانن رۆژا قيامەتێ خودێ مەزن د دەرهەقێ واندا يێ هەڤالينى ل سەر بنياتێ دنيايێ كرى و چو بۆ باشيآ نەداناى دبێژيت: ((الْأَخِلَّاءُ يَوْمَئِذٍ بَعْضُهُمْ لِبَعْضٍ عَدُوٌّ إِلَّا الْمُتَّقِينَ)) . رۆژا قيامەتێ هەڤالێت ئێك ئەوێت د دنيايێدا خۆشڤيێت ئێك دژمنێت ئێكن، ئەو نەبن ئەوێت ژبۆ خودێ گەهشتينە ئێك هەڤالينى و ڤيانا وان د ئاخرەتێ ژيدا هەر دێ مينيت. بۆچى دژمنێت ئێكن؟! چونكى هەرئێك خرابيا خۆ دكەتە سويچێت يێ دى، دێ بێژتێ هەكە تو يێ باشباى ئەز ژى دا يێ باش بم بەلێ تو يێ خراب بووى و تە ئەز ژى خرابكرم، ڤێجا ژبەر هندێ دبنە نەيارێت ئێك بەلێ فايدە ناكەت، بەروڤاژى وان يێت ل سەر بنياتێ حەژێكرنا خودێ گەهشتينە ئێكدوو، دۆست و خۆشتڤيێت ئێكن، چونكى سوپاسدارێت ئێك و دوونە، ئێك بوو پارێزەر بۆ يێ دى هەتا ئەڤرۆ هەردوو هەژى دلۆڤانيا خودێ بووين، و هەكە ئنيەتا مرۆڤى چێكرن و گوهۆرينا وى بيت دورستە مرۆڤ دگەل بيت هندى من ئومێد هەبيت چێ ببيت، بەلێ هەكە مرۆڤ بێ هيڤى بوو؛ و نابيت مرۆڤ بێ هيڤى ببيت.. هنگى ئەز هەڤالينيێ وەكى هەڤالينى دگەل ناكەم بەلێ ئەز د بنيرا پەيوەنديان دگەل نابرم هيڤيا هندێ خرابيا وى ل تخويبەكێ راوەستينم هەكە نەشێم راكەم و نەهێلم و ئەڤە ژى وەكى زانايێت مە دبێژن پلەيەكا گوهۆرينا خرابيێيە، و خودێ چێتر دزانيت.
