ب / ب راستى دڤێت مە هەلويست و راوستيان و هەڤكاريەكا دورست هەبيت، بەرامبەر بەلا و رويدان و نەخۆشيەكا دهێتە سەرێ مە، چ مرن بيت چ هەرتشتێ هەبيت، و دڤێت بزانين تشتێ دلێ مە پێ خۆش و نەخۆش يێ خودێ ددەتە مە بۆ جەرباندنێيە.. يێ دلخۆشكەر، كا دێ سوپاسى و شوكرا خودێ تێدا كەين يان نە، يێ مە پێ نەخۆش كا دێ بێهنا خۆ فرەكەين و سەبرى كێشين يان نە، د ڤێ رامانێدا خودێ مەزن دبێژيت: ((كُلُّ نَفْسٍ ذَائِقَةُ الْمَوْتِ وَنَبْلُوكُمْ بِالشَّرِّ وَالْخَيْرِ فِتْنَةً وَإِلَيْنَا تُرْجَعُونَ)) ب راستى هەر نەفسەكا هەبيت دێ مريت، و ئەم هەوە ب قەنجى و خرابيان دجەربينين، و هەر هوين دێ ب بال مەڤە زڤرن. ڤێجا دڤێت ئەڤ راستيە ل دەف مە يا ئاشكرا و ئامادەبيت؛ دا سەرەدەريا دورست دگەل قەدەرا خودێ بكەين هەر قەدەرا هەبيت، خودێ مەزن دبێژيت: ((وَلَنَبْلُوَنَّكُمْ بِشَيْءٍ مِنَ الْخَوْفِ وَالْجُوعِ وَنَقْصٍ مِنَ الْأَمْوَالِ وَالْأَنْفُسِ وَالثَّمَرَاتِ وَبَشِّرِ الصَّابِرِينَ))(( الَّذِينَ إِذَا أَصَابَتْهُمْ مُصِيبَةٌ قَالُوا إِنَّا لِلَّهِ وَإِنَّا إِلَيْهِ رَاجِعُونَ))(( أُولَئِكَ عَلَيْهِمْ صَلَوَاتٌ مِنْ رَبِّهِمْ وَرَحْمَةٌ وَأُولَئِكَ هُمُ الْمُهْتَدُونَ)) گەلى خودان باوەران ب راستى ئەم دێ هەوە ب هندەك ترسێ و برسێ، و كێمكرنا مال و مالداريێ و جان و بەر و بەرهەمان، جەربينين. و تو هەى موحەممەد مزگينيێ بدە بێنفرەه و سەبركێشان. ئەوێت هەرگاڤەكا بەلايەك و ئاتافەك ب سەرێ وان هات، دبێژن: ب راستى ئەم هەر يێت خودێينە و بەندەيێت وينە، و هەر دێ ب بال ويڤە زڤرين. سلاڤ و لێنەگرتن و گونەه ژێبرن و دلۆڤانيا خودێ بۆ ئەڤانە، و هەر ئەڤەنە راستەرێ و دورستەرێ. ئها دڤێت هۆسا ئەم پێشوازيا بەلايێ بكەن بێژين: ((قَالُوا إِنَّا لِلَّهِ وَإِنَّا إِلَيْهِ رَاجِعُونَ)). و بەردانا رهان يان كرنەبەرا جلكێت رەش چو بنيات بۆ نينە و گونەهە، نەخاسمە دەمەكێ درێژ وەكى پسياركەر دبێژيت سالەكێ بكێشيت، و نابيت نيشانێت بەهيێ ل سەر مرۆڤى سێ رۆژان پێڤەتر ديارببن، چونكى ژ پێغەمبەرێ خودێ (سلاڤێت خودێ لێ بن) هاتيە زانين دەمێ بەهى راكرنێ سێ رۆژ تنێنە بۆ ژنێ نەبيت هەكە زەلامێ وێ بمريت چار هەيڤ و دەه رۆژ دەمێ بەهيا وێنە، و د ڤێ رامانێدا بوخارى و موسلم ژ زەينەبا كچا ئەبى سەلەمە ڤەدگێريت دبێژيت: ئەز چۆمە دەف ئوم حەبيبە (خودێ ژێ رازی بیت) كابانيا پێغەمبەرێ خودێ (سلاڤێت خودێ لێ بن) دەمێ بابێ وێ ئەبو سوفيانێ كورێ حەربى (خودێ ژێ رازی بیت) ئەمرێ خودێ كرى، داخوازا گولاڤەكێ كر زەراتيا خەلوقێ تێدا بوو (خەلوق: گيايەكە بۆ بێهن خۆشيێ دهێتە ب كارئينان رەنگێ زەر ددا) جاريەكێ د خۆ دا، پاشى ژ وێ هندەك ل بن هەردوو گوهێت خۆ دا، پاشى گۆت: ب خودێ من دل سەر نينە، بەلێ من گول پێغەمبەرێ خودێ بوو (سلاڤێت خودێ لێ بن) ل سەر مينبەرێ دگۆت: دورست نينە بۆ ژنەكێ باوەريێ ب خودێ و رۆژا قيامەتێ بينيت، ئەو تازيێ ل سەر مريەكى سێ رۆژان زێدەتر راكەت، ل سەر هەفسەرى نەبيت چار هەيڤ و دەه رۆژان. زەينەبێ گۆت: پاشى ئەز چۆمە دەف زەينەبا كچا جەحشى (خودێ ژێ رازی بیت) دەمێ برايێ وێ مرى داخوازا گولاڤەكێ كر و ل خۆ كر، پاشى گۆت: بزانن ب خودێ من دل ل سەر گولاڤێ نينە بەلێ من گول پێغەمبەرێ خودێ بوو (سلاڤێت خودێ لێ بن) ل سەر مينبەرێ دگۆت: دورست نينە بۆ ژنەكێ باوەريێ ب خودێ و رۆژا قيامەتێ بينيت، ئەو تازيێ ل سەر مريەكى سێ رۆژان زێدەتر راكەت، ل سەر هەفسەرى نەبيت چار هەيڤ و دەه رۆژان. زەينەبێ گۆت: پاشى ئەز چۆمە دەف زەينەبا كچا جەحشى (خودێ ژێ رازی بیت) دەمێ برايێ وێ مرى داخوازا گولاڤەكێ كر و ل خۆ كر، پاشى گۆت: بزانن ب خودێ من دل ل سەر گولاڤێ نينە. ژبەر ئەڤا بۆرى هندە زانا بەردانا رهان و كرنەبەرا جلكێت رەش دەرڤەى دەمێ بەهيێدا ژ خودانێ مرى دانن رەنگەكآ نەرازيبوونێيە ب قەدەرا خودێ، و ئەڤە وەكى ويە يێ ب خۆ داددەت و جلكێت خۆ دبەر خۆدا درينيت و ئاخفتنێت خەلەت دبێژيت، و پێغەمبەرێ خودێ (سلاڤێت خودێ لێ بن) د راستا ڤاندا هەروەكى بوخارى و موسلمى ژ ئبن مەسعودى ڤەگێراى دبێژيت: (لَيْسَ مِنَّا مَنْ ضرَبَ الخُدُودَ، وشَقَّ الجُيُوبَ، ودَعا بِدَعْوَى الجَاهِلية) ئبن مەسعود (خودێ ژێ رازی بیت) دبێژيت: پێغەمبەرێ خودێ (سلاڤێت خودێ لێ بن) گۆت: نە ژ مەيە يێ د بەلا و نەخۆشياندا ل رويێت خۆ بدەت و يێ بەرويكان بدرينيت و يێ ئاخفتنێت نەزانان بێژيت. ديسا هەردوو ژ ئەبى بوردەى (خودێ ژێ رازی بیت) ڤەدگێرن دبێژيت: ئەبى موسايێ ئەشعەرى (خودێ ژێ رازی بیت)، نەساخ بوو و هاى ژ خۆ نەما، و سەرێ وى ل سەر چۆكا كابانيا وى بوو، بەرێ خۆ دايێ و ب دەنگەكێ خەمگين كرە گازى، نەشيا لێ بزڤرينيت، ڤێجا دەمێ هشيار بووى، گۆت: ئەزێ بەريمە ژ وى يێ پێغەمبەرێ خودێ (سلاڤێت خودێ لێ بن) بەرائەتا خۆ ژێ كرى، بەرائەت كر: ژ ئەوا دەنگێ خۆ ب پێ گۆتنێ بلندكەت و سەرێ خۆ د نەخۆشيێدا دتراشيت و يا جلكێت بەر خۆ ددرينيت. ڤێجا نابيت چو تشت نەئاخفتن نەكريار ژ مرۆڤى ديارببن كو مرۆڤ ب قەدەرا خودێ نەيآ رازيە، نەخاسمە بۆ دەمەكێ درێژ، و خودێ چێتر دزانيت.
