ب / چو گۆمان تێدا نينە هەر تەنگاڤيەكا ژ تەنگاڤيێت دنيايێ ئەم ژ سەر موسلمانەكى راكەين خودێ بەرامبەر وێ دێ مە ژ تەنگاڤيەكا دژوارتر يا رۆژا قيامەتێ رزگاركەت، و هەر گراني و نەخۆشيا ئەم ل سەر موسلمانەكى راكەين و ل بەر سڤك و ساناهي بكەين، خودێ دێ دنيا و ئاخرەتێ ساناهيێ دەتە مە، و د ڤێ رامانێدا هەروەكى بوخارى و موسلم ژ ئبن عومەرى خودێ ژ هەردوويان رازى بيت ڤەدگێرن دبێژن پێغەمبەرى (سلاڤێت خودێ لێ بن) گۆت: (المُسْلِمُ أَخو المُسْلِمِ، لا يظلِمُه، ولا يُسْلِمهُ، منْ كَانَ فِي حَاجَە أَخِيهِ كَانَ اللَّهُ فِي حاجتِهِ، ومَنْ فَرَّج عنْ مُسْلِمٍ كُرْبە فَرَّجَ اللَّهُ عنْهُ بِهَا كُرْبَە مِنْ كُرَبِ يوْمَ الْقِيامَة، ومَنْ ستر مُسْلِماً سَتَرهُ اللَّهُ يوْم الْقِيامَە) موسلمان برايێ موسلمانيە، نە ستەمێ لێ دكەت، و نە دەستان ژێ بەرددەت، هەركەسێ د هەوجەييا برايێ خۆدا بيت، (ئانكو وەجێت وى بقەتينيت) خودێ دێ هاريكاريا وى كەت د هەوجەيێت ويدا، و هەركەسێ بەرتەنگيەكێ ژ سەر موسلمانەكى راكەت، خودێ دێ بەرتەنگيەكێ ژ بەرتەنگيێت قيامەتێ ژ سەر راكەت، و هەركەسێ موسلمانەكى پەردە و ستارەكەت، خودێ دێ وى رۆژا قيامەتێ ستارەكەت. ڤێجا هەر هاريكاريا مرۆڤ د دنيايێدا بكەت خێرە، نەخاسمە دگەل پێدڤى و خودان هەوجەيێ، و خودێ مەزن هاريكرنا ئێتيمى و هەژارى دگەلێك يێت ئيناين، دبێژيت: ((فَلَا اقْتَحَمَ الْعَقَبَةَ))(( وَمَا أَدْرَاكَ مَا الْعَقَبَةُ))(( فَكُّ رَقَبَةٍ))(( أَوْ إِطْعَامٌ فِي يَوْمٍ ذِي مَسْغَبَةٍ))(( يَتِيمًا ذَا مَقْرَبَةٍ))(( أَوْ مِسْكِينًا ذَا مَتْرَبَةٍ)) بلا ژ ئاستەنگێ ببۆريت دابگەهنە سەرفەرازيێ، و ما تو چ دزانى كا ئەو ئاستەنگ چيە؟ گەردەن ئازاكرنە، و ناندانە د رۆژا برسێدا، بۆ سێويێ ژ خزم و خوينا مرۆڤى، يان بۆ بەلنگازەكێ دەست تەنگ. ڤێجا هەردوو ب خێرن، بەلێ ل سەر خودانكرنا ئێتيمى بەلگەيێت تايبەت يێت هاتين ژبلى يێت گشتى، وەكى گۆتنا پێغەمبەرێ خۆشتڤى (سلاڤێت خودێ لێ بن) هەروەكى بوخارى ژ سەهلێ كورێ سەعدى (خودێ ژێ رازی بیت) ڤەدگێريت دبێژيت: پێغەمبەرى (سلاڤێت خودێ لێ بن) گۆت: ئەز و خودانكەرێ ئێتيمى (يێ ب كار و بارێت وى رادبيت) د بەحەشتێدا د هۆساينە، و نيشانكرە تلا خۆ يا شەهدێ و يا نيڤەكێ و ژێكڤەكرن. و د حەديسەكا ديدا دبێژيت: خودانكەرێ ئێتيمى يێ وى بيت يان يێ ئێكێ دى ئەز و ئەو د بەحەشتێدا وەكى ڤان هەردووكاينە، و ڤەگێرى، مالكێ كورێ ئەنەسى ئيشارەت كرە تلا شەهدێ و يا نيڤەكێ. هەلبەت ئيمام موسلمى (خودێ ژێ رازی بیت) ئەڤ حەديسە ڤەگێرايە. ژ بەلگە و دەليلێت بەردەست ئاشكرا دبيت هەردوو ب خێرن بەلێ خودانكرنا ئێتيمێ پێدڤى بخێرترە ژبەر وان بەلگەيێت تايبەت ل سەر هاتين و چونكى ئێتيمى باب نەمايە و ئەو بەرپرسە ژ خودانكرنا وى و سێوى دەيك نەمايە و ئەو نەبەرپرسە ژ دابينكرنا ژيانا وى، و خودێ چێتر دزانيت.
