ب / پەشێمانى تۆبەيە، هەكە ژ دل هوين د پەشێمان بن و نەزڤرنەڤە ڤى كارى ب ئانەهيا خودێ.. خودێ دێ ل گونەهێت هەوە بۆريت، بەلێ دڤێت موسلمان يێ هشيار بيت و ئاگەهـ ژ خۆ هەبيت و بزانيت ئەو يێ د ئمتيحان و ئەزموونێدا و د هەمى كراساندا د خێر و خۆشياندا و د خرابى و نەباشياندا، و دڤێت ئەم بزانين تشتێ دلێ مە پێ خۆش و نەخۆش يێ خودێ ددەتە مە بۆ جەرباندنێيە، يێ دلخۆشكەر كا دێ سوپاسى و شوكرا خودێ تێدا كەين يان نە، و يێ مە پێ نەخۆش كا دێ بێهنا خۆ فرەكەين، و سەبرى كێشين يان نە، د ڤێ رامانێدا خودێ مەزن دبێژيت: ((كُلُّ نَفْسٍ ذَائِقَةُ الْمَوْتِ وَنَبْلُوكُمْ بِالشَّرِّ وَالْخَيْرِ فِتْنَةً وَإِلَيْنَا تُرْجَعُونَ)) ب راستى هەر نەفسەكا هەبيت دێ مريت، و ئەم هەوە ب قەنجى و خرابيان دجەربينين، و هەر هوين دێ ب بال مەڤە زڤرن. ڤێجا دڤێت ئەڤ راستيە ل دەف مە يا ئاشكرا و ئامادەبيت دا سەرەدەريا دورست دگەل قەدەرا خودێ بكەين هەر قەدەرا هەبيت، ڤێجا دڤێت يێ هەژار ب قەدەرا خۆ رازى بيت و هەژارى ل دەف خودێ نەكێماسيە پيڤەرێ نێزكبوونێ ژ خودێ.. پارێزكاريە نەزەنگينيە. خودێ مەزن دبێژيت: ((يَا أَيُّهَا النَّاسُ إِنَّا خَلَقْنَاكُمْ مِنْ ذَكَرٍ وَأُنْثَى وَجَعَلْنَاكُمْ شُعُوبًا وَقَبَائِلَ لِتَعَارَفُوا إِنَّ أَكْرَمَكُمْ عِنْدَ اللَّهِ أَتْقَاكُمْ إِنَّ اللَّهَ عَلِيمٌ خَبِيرٌ)) گەلى مرۆڤان، ب راستى مە هوين ژ نێر و مێيەكێ ئانكو: زەلام و ژنەكێ كو ئادەم و حەوانە يێت داين، و مە هوين يێت كرينە ملەت ملەت و عەشير عەشير دا ئێك و دوو بنياسن؛ ب راستى يێ ژ هەوە هەميان پتر ب رێز و رويمەت ل دەف خودێ، ئەوە يێ ژ هەوە هەميان تەقواتر، ئانكو: يێ ژ هەوە هەميان پتر ژ خودێ دترسيت، و خودێ زێدە زانا و شارەزايە، و هەكە هەژارى كێماسى نەبيت بۆچى ئەز دێ شەرمێ ژێ كەم ئەز ل سەر خۆ ئاشكرا نەكەم تشتەكە و ئەز درەوان بكەم تشتەكێ ديە، ئەز ل سەر خۆ ئاشكرا نەكەم و ژ خۆ نەگرم يێ هەژاربم ڤێجا درەوان بكەم تشتەكێ ديە، خودێ مەزن پەسن و مەدحێت وان هەژاران دكەت هندى هند د پاك و پاقژن دگەل هەژاريا خۆ خوازخوازۆكيێ ناكەن و حەسويديێ ژى ب كەسێ نابەن، خودێ مەزن بۆ ڤان رەنگە هەژاران دبێژيت: ((لِلْفُقَرَاءِ الَّذِينَ أُحْصِرُوا فِي سَبِيلِ اللَّهِ لَا يَسْتَطِيعُونَ ضَرْبًا فِي الْأَرْضِ يَحْسَبُهُمُ الْجَاهِلُ أَغْنِيَاءَ مِنَ التَّعَفُّفِ تَعْرِفُهُمْ بِسِيمَاهُمْ لَا يَسْأَلُونَ النَّاسَ إِلْحَافًا وَمَا تُنْفِقُوا مِنْ خَيْرٍ فَإِنَّ اللَّهَ بِهِ عَلِيمٌ)) ئانكو: هوين خێرا خۆ بدەنە وان دەست تەنگ و ژاران، ئەوێت د رێكا خودێدا هاتينە گرێدان. ئەوێت ماينە ب جيهادێڤە و خۆ فرۆتينە خودێ و نەشێن ژبەر جيهادێ دەركەڤنە بازرگانيەكێ يان شۆلەكى، يێ نەشارەزا هزرا دەولەمەندان ژ وان دكەت، (چونكى) ژ پاقژيا خۆ، ل خۆ دەرنائێخن دەست تەنگ و ژارن. تو دێ وان ب رەنگ و سيمايێ وان نياسى كو دەست تەنگ و ژارن تشتى ژ كەسێ ناخوازن و خوازۆكيێ ناكەن، هەر تشتەكێ باشێ هوين بدەن و بمەزێخن، خودێ ژێ ب ئاگەهە. بەلێ هەژارێ دفن بلند و ژ خۆ نەگريت و خۆ مەزن دكەت پێغەمبەر (سلاڤێت خودێ لێ بن) هەروەكى ئيمام موسلم ژ ئەبى هورەيرە ڤەدگێريت: (ثلاثة لاَ يُكَلِّمُهُمُ اللَّه يوْمَ القِيامَة، وَلا يُزَكِّيهِمْ، وَلاَ ينْظرُ إِلَيْهِمْ، وَلهُمْ عَذابٌ أَلِيمٌ: شَيْخٌ زانٍ، ومَلِكٌ كَذابٌ، وعائلٌ مُسْتَكْبِرٌ) سێ كەسان خودێ رۆژا قيامەتێ ئاخفتنا دلۆڤانيێ و رازيبوونێ دگەل نائاخڤيت، و گونەهێت وان ژێ نابەت و كريارێت وان قەبويل ناكەت، و ب چاڤێ دلۆڤانيێ بەرێ خۆ نادەتێ، و ئيزايەكا گران بۆ وانە: پيرەمێرێ زناكەر، و مەلكێ درەوين، و هەژارێ خۆمەزنكەر. و زەنگين ژى دڤێت ژ خودێ بترسيت و ئەزيەتا هەژاران نەكەت و ل دەف وان بەحسێ خۆشى و نيعمەتێت خۆ نەكەت هەكە وەكر و ئنيەتا وى ئێشاندنا دلێ هەژارى بيت يێ گونەهكارە و بلا بزانيت پێغەمبەر (سلاڤێت خودێ لێ بن) دبێژيت: يێ باوەرى ب خودێ و رۆژا قيامەتێ هەبيت بلا ئەزيەتا جيرانێ خۆ نەكەت و ئاخفتن ب ئنيەتا خۆمەزنكرنێ و دياركرنێ ئەم د زەنگينين و هوين د فەقيرن ئەزيەتە، و يێ باوەريەكا راست و دورست ب خودێ و رۆژا قيامەتێ هەبيت ئەزيەتا جيرانێ خۆ ناكەت ب هەر رەنگەكێ هەبيت، و خودێ چێتر دزانيت.
