ب / دەستپێكرنا سلاڤێ جهێ نەلێكيا زانايانە، و گەلەك دبێژن نەدورستە و پالپشتيا ڤەگێرا موسلمى ژ ئەبو هورەيرە (خودێ ژێ رازی بیت) دكەن ئەوا دبێژيت: پێغەمبەرێ خودێ (سلاڤێت خودێ لێ بن) گۆت: دەست ب سلاڤكرنا جوى و فەلەيان نەكەن، و هەكە هەوە ئێك ژ وان د رێكەكێدا ديت نەچاركەنە رێكا تەنگتر. بەلێ ئەز نە ل وێ باوەرێمە ئەڤە فەرمانەكا گشتيە، دڤێت تايبەت بيت ب كراسەكێڤە، چونكى نەبەرئاقلە، پێغەمبەرى (سلاڤێت خودێ لێ بن) و سەحابێت وى، ئەڤێت داخوازكرينە ئيسلامێ دەستپێكێ كێمكربن و سلاڤ نەكربيتە وان و پاشى داخوازكربنە دينێ خودێ، باشە ئەو سەردانا پێغەمبەرى (سلاڤێت خودێ لێ بن) بۆ مالا جويەكێ كورێ وى خزمەتا پێغەمبەرى (سلاڤێت خودێ لێ بن) كرى ب چ دهێتە هەژمارتن؟! بوخارى ژ ئەنەسى (خودێ ژێ رازی بیت) ڤەدگێريت دبێژيت: لاوەكێ جوهى ل دەف پێغەمبەرى بوو (سلاڤێت خودێ لێ بن) خزمەتا وى دكر، نەساخ بوو پێغەمبەر (سلاڤێت خودێ لێ بن) هات سەرا ويدا، ل دەف سەرێ وى روينشتە خوارێ و گۆتێ: موسلمان ببە، بەرێ خۆ دا بابێ خۆ ل دەف وى بوو؟ گۆتێ: گوهێ خۆ بدە بابێ قاسمى (ئانكو پێغەمبەرى) ئينا موسلمان بوو، پێغەمبەر (سلاڤێت خودێ لێ بن) دەركەفت و وى دگۆت: شوكر بۆ خودايێ ئەو ژ ئاگرى رزگاركرى. ئەرێ تو بێژى پێغەمبەر (سلاڤێت خودێ لێ بن) بێ سلاڤ يێ چۆيە د مالا ويڤە، و هەكە وەسابا تو بێژى دا بابێ وى بێژيتێ گوهێ خۆ بدە پێغەمبەرى، ژ ئەڤا بۆرى ئەز دبێژم: ئەو حەديسێت دبێژن دەست ب سلاڤێ نەكەن دگەل وان.. ئەم دانينە سەر سەرێ خۆ بەلێ دبيت د گرێداينە ب كراسەكێ تايبەتڤە ئەو ژى هەكە ئەم دگەل وان د كراسێ شەريدا بين، و فەرمان و حوكمێ ڤێ حەديسێ يێ گرێدايە ب ڤى كراسيڤە و نەيێ گشتيە. و يێت ژێ هاتيە ڤەگوهاستن دورستە موسلمان بەرى سلاڤكەت: ئبن عەباس و ئەبى ئومامە و ئبن موحيريز و ئيمام ئەوزاعي دبێژن: هەكە تە بەراهيێ و دەستپێكێ سلاڤكر، مرۆڤێت سالح يێت وەكرين. و هەكە تە وەنەكر مرۆڤێت سالح يێت وەكرين، وەسا ديار دبيت دەستپێكرن جائيزە و دورستە و نەحەرامە و سلاڤ ڤەگێران كەسێ نەگۆتيە نەڤەگێرە، بەلێ هەكە تە زانى سلاڤەكا خراب دكەت وەكى جوهيا سلاڤ دكرنە پێغەمبەرى (سلاڤێت خودێ لێ بن) دگۆتنێ (السام عليكم) شوينا (السلام عليكم) و مەخسەدا وان مرن بۆ تە بيت، هنگى بێژێ ل سەر هەوە بيت، ئانكو ئەو تشتآ هوين دبێژن بۆ هەوە بيت، و خودێ چێتر دزانيت.
