ب / هەكە ئەم گونەهێ بێخينە ستۆيێ وان يێت مرۆڤى تۆرەدكەن وى دەمى چو جار مرۆڤێ گونەهكار نابيت، چونكى بەردەوام يێ مرۆڤى تۆرە دئێخيت شەيتانە. پێغەمبەر (سلاڤێت خودێ لێ بن) د ڤێ رامانێدا دبێژيت: (إن الغضب من الشيطان) راستە دڤێت هاريكاريا شەيتانى نەكەين ل سەر برايێ خۆ و وى تۆرە نەكەين، بەلێ ئەڤە بۆ وى دورست ناكەت ئەو هاريكاريا شەيتانى ل سەر خۆ بكەت و تۆرە ببيت و ئاخفتنێت خەلەت و نەجوان بێژيت نەخاسمە ئاخفتنێت كوفرێ و ئەڤە بۆ نابيتە هێجەت بێژيت ئەز يێ تۆرەبووم يان ئەز هاتمە تۆرەكرن، باشە هندەكان تو تۆرەكرى و هاريكاريا شەيتانى كر ل سەر تە، باشە تە ژى بۆچى هاريكاريا وى كر و خۆ تۆرەكر! ما تو نوزانى دەليڤا شەيتانى يا ژ هەميان ب بهاتر ئەوە دەمێ تو تۆرە دبى، ڤێجا وێ دەليڤێ نەدێ و خۆ تۆرە نەكە، و هەكە تو تۆرە بووى ژى بزانە ژ شەيتانيە و بێژە (اعوذ بالله من الشيطان الرجيم) سولەيمانێ كورێ سردى، (خودێ ژێ رازی بیت)، دبێژيت: ئەز ل دەف پێغەمبەرى (سلاڤێت خودێ لێ بن) يێ روينشتى بووم، و دوو زەلامان خەبەر دگۆتنە ئێك و دوو، و ئێك ژ وان هەردووكان سەر و چاڤێت وى سۆر ببوون و رهێت رويێ وى پف ببوون، ئينا پێغەمبەرى (سلاڤێت خودێ لێ بن) گۆت: "ئەز پەيڤەكێ دزانم هەكە گۆتبا ئەڤا بۆ چێ بووى دا چيت، هەكە بێژيت: ئەز خۆ ب خودێ دپارێزم ژ شەيتانێ ژ رەحما خودێ دوير ئێخستى، ئەڤا دبينيت دا چيت"، گۆتنێ: پێغەمبەرێ خودێ (سلاڤێت خودێ لێ بن) گۆت: خۆ ب خودێ بپارێزە ژ شەيتانێ ژ رەحما خودێ دوير ئێخستى ئانكو بێژە: (اعوذ بالله من الشيطان الرجيم) ڤێجا هەرگاڤا تو تۆرەبووى ڤێ گۆتنێ بێژە و رێكێ نەدە شەيتانى تە سەردا ببەت و تە تۆرەكەت و ئاخفتنێت خەلەت ژى بێخيتە سەر ئەزمانێ تە، و نفرينان نە ل خۆ بكە و نە ل كەسەكێ، چونكى پێغەمبەر (سلاڤێت خودێ لێ بن) د راستا نفريناندا نەخاسمە يێت ل خۆ دهێنە كرن هەروەكى ئيمام موسلم ژ دەيكا مە ئوم سەلەمە (خودێ ژێ رازی بیت)، ڤەدگێريت، دبێژيت: (لا تَدْعُوا عَلى أَنْفُسِكُم إِلاَّ بِخَيْرٍ، فإِنَّ المَلائِكَة يُؤمِّنُون عَلى ما تَقُولونَ) دوعا ل خۆ نەكەن ب خێرێ نەبيت، ب راستى ملياكەت ل سەر يا هوين دبێژن، دبێژن: ئامين، ئانكو: يا خودێ قەبويلكە. ديسا نفرينا ل كەسێ نەكە، چونكى پێغەمبەرى (سلاڤێت خودێ لێ بن) نەهيا ل هندێ كرى هەروەكى د ڤەگێرا موسلميدا ژ جابرێ كورێ عەبدوللاى (خودێ ژێ رازی بیت)، هاتيە ڤەگێران: (لا تَدعُوا عَلى أَنْفُسِكُم، وَلا تدْعُوا عَلى أَولادِكُم، ولا تَدْعُوا على أَمْوَالِكُم، لا تُوافِقُوا مِنَ اللَّهِ ساعە يُسأَلُ فِيهَا عَطاءً، فيسْتَجيبَ لَكُم) نفرينان ل خۆ نەكەن و نفرينان ل زارۆكێت خۆ ژى نەكەن و نفرينان ل مالێ خۆ ژى نەكەن، نەكو بكەڤنە د وێدا يا خودێ دوعا تێدا قەبويل دكەت و نفرينا هەوە بێتە قەبويلكرن، و خودێ چێتر دزانيت.
