ب / ڤيان و نەڤيانا مرۆڤ هەلدگريت بۆ هەركەسێ هەبيت، دڤێت وەل مرۆڤى نەكەت مرۆڤ زۆردارى و نەهەقى و نەعەدالەتێ د راستا واندا بكەت، و ڤيان و نەڤيان دوو هەستێت مەترسيدارن دڤێت ئەم بكەينە د جهێ وان يێ هەژيدا، و بدەينە وان يێت خودێ ئەمرێ مە كرى ئەم بدەينێ، و ئەم رێكێ نەدەينە شەيتانى ياريێت خۆ ب ڤان هەردوو هەستان بكەت، و بەروڤاژى لێ بكەت، و يێ هەژى ڤيانێ نەڤيانێ بدەتێ، و بەروڤاژى يێ هەژى نەڤيانێ ڤيانآ بدەتێ، هەروەكى ئەم ڤێ ل دەف گەلەك موسلمانان دبينين، ب راستى ئەڤە نە دگەل ئيمان و باوەريا دورستە. پێغەمبەرێ خۆشتڤى (سلاڤێت خودێ لێ بن) دبێژيت: ( من أَحَبَّ لِلَّهِ وَأَبْغَض لِلَّهِ وَأَعْطى لِلَّهِ وَمَنَعَ لِلَّهِ فَقَدْ اسْتَكْمَلَ الايمَانَ) هەركەسێ بۆ خودێ ڤيا و بۆ خودێ نەڤيا و بۆ خودێ دا و بۆ خودێ ڤەگرت و نەهێلا ب راستى وى باوەريا خۆ تمامكر. ديسا پێغەمبەر (سلاڤێت خودێ لێ بن) دبێژيت: (أوثق عرى الإسلام الحب في الله والبغض في الله) تشتێ ژ هەميا موكمتر مرۆڤ خۆ پێڤە بگريت د ئيسلامێدا حەژێكرنە بۆ خودێ و نەڤيانە بۆ خودێ. ديسا دگەل من بەرێ خۆ بدێ كا پێغەمبەرێ خۆشتڤى (سلاڤێت خودێ لێ بن) چ دوعا دكر دا بزانين كا ئەڤ مرۆڤە چەندآ دويرى رێكا پێغەمبەريە (سلاڤێت خودێ لێ بن)، ئەڤ دوعايە دكر: (اللهم اجعلنا هادين مهديين غير ضالين ولا مضلين عدوا لأعدائك وسلما لأوليائك نحب بحبك الناس ونعادي بعداوتك من خالفك من خلقك) يا خودێ مە بكە راستەرێكرى يێت راستەرێكەر نەيێت بەرزە و نەيێت بەرزەكەر، دژمن بۆ دژمنێت خۆ.. و دۆست و ئاشت بۆ مرۆڤێت خۆ، ب حەژێكرنا تە حەژ خەلكى بكەين و ب ئەگەرێ دژمنيا تە دژمنيا وى بكەين يێ نەگوهداريا ئەمرێ تە دكەت. ڤێجا فەرە و ب رەنگەكێ زێدە مەزن ئەم زێرەڤانيا ڤان هەردوو هەست و مەشاعران (ڤيان و نەڤيانان) بكەين و بزانين كا بۆ كێ دچن و ل سەر چ بنياتن و هەكە مە نەڤيانا خۆ دا هندەكان ل سەر چ بنيات و شەنگستە و هەكە نەڤيان دا هندەكان ل سەر چ بنيات و شەنگستەيە، هەكە ئەم گەهشتينە بەرسڤەكا راست و دورست و نەيا خاپينۆك ڤيان نەڤيانێت من يێت جهێ دورست و يێت ئاڤانە سەر بنيات و شەنگستآ دورست بلا هنگى كەيفا مە بهێت ئەم يێت ل سەر رێكا سەرفەرازيێ و دلێ مە يێ ساخلەمە، چونكى پيڤەرێ زانينا نەخۆشى و ساخلەميا دلى ئەڤەيە هەردوو هەست (ڤيان و نەڤيان) بۆ جهآ هەژى دەركەڤن و ل سەر بنياتێ دورست بن، و هەكە من نەڤيان ژى بۆ ئێكى هەبيت ـ چونكى يێ خرابە يان يێ گونەهكارە ـ دڤێت نەڤيانا وى وەل من نەكەت ئەز مافێ وى بخۆم و عەدالەتێ د راستا ويدا نەكەم و ڤيانا من بۆ وى دڤێت وەل من نەكەت ئەز مافەكێ نەيێ وى بدەمە وى. خودێ مەزن دبێژيت: ((يَا أَيُّهَا الَّذِينَ آمَنُوا كُونُوا قَوَّامِينَ لِلَّهِ شُهَدَاءَ بِالْقِسْطِ وَلَا يَجْرِمَنَّكُمْ شَنَآنُ قَوْمٍ عَلَى أَلَّا تَعْدِلُوا اعْدِلُوا هُوَ أَقْرَبُ لِلتَّقْوَى وَاتَّقُوا اللَّهَ إِنَّ اللَّهَ خَبِيرٌ بِمَا تَعْمَلُونَ)) ئانكو: گەلى خودان باوەران ل بەر فەرمانا خودێ د راوەستياى بن و هەمى تشتان ژبۆ خودێ پێ رابن، و ب راستى شادەييێ بدەن، و بلا نەڤيانا هەوە بۆ دەستەكەكێ، هەوە پال نەدەت هوين دادوەريێ (عەدالەتێ) نەكەن، بلا هەوە نەڤێن ژى و هەكە هوين دادوەريێ بكەن نێزيكترى پارێزكاريێيە، و پارێزكاريا خودێ بكەن، ب راستى كارێ هوين دكەن خودێ پێ ئاگەهە. بەرێ خۆ بدێ دڤێت موسلمان وەكى عەبدوللايێ كورێ رەواحە بيت (خودێ ژێ رازی بیت) هنارتيێ پێغەمبەرى (سلاڤێت خودێ لێ بن) بۆ جوهيان، خەلكێ خەيبەرێ دەرامەتێ وان پيڤان، ڤيان بۆ لايآ خۆ بكێشن و د پيڤانێدا بۆ وان كێم بكەت بەرتيل بۆ ئينان ئينا گۆتە وان: هوين حەرامى ددەنە من دا هاري هەوە بكەم، و گۆت: (وَاللَّهِ لَقَدْ جِئْتُكُمْ مِنْ عِنْدِ أَحَبِّ النَّاسِ إِلَي وَلأَنْتُمْ أَبْغَض إَلَي مِنْ عِدَّتِكُمْ مِنَ الْقِرَدَة وَالْخَنَازِير وَلا يحْمِلُنِي بُغْضي إِياكُمْ وَحُبِّي إِياهُ عَلَى أَنْ لا أَعْدِلَ عَلَيْكُمْ فَقَالُوا بِهَذا قَامَتِ السَّمَاوَاتُ وَالأَرْض) ئەز ب خودێ كەم ئەز يێ ژ دەف خۆشڤيترين مرۆڤ بۆ من ل سەر رويێ عەردى هاتيم و هوين ل دەف من رەشترن ژ هژمارا هەوە ژ مەيموينك و بەرازان، بەلێ نەڤيانا من بۆ هەوە و ڤيانا من بۆ پێغەمبەرى (سلاڤێت خودێ لێ بن) وەل من ناكەت ئەز عەدالەتێ دگەل هەوە نەكەم. ئينا گۆتن: ئها ب ڤێ عەرد و عەسمان يێت ئاڤابووين، و خودێ چێتر دزانيت.
