ب / پێدڤيە مرۆڤ ل سەر دەعوێ يێ رژد و هشيار بيت، و مرۆڤ نوزانيت كا دلێ وى كەنگى دێ ڤەبيت، و كەنگى دێ ئاخفتنا من كارتێكرنآ لێ كەت، و بيتە كليلا دلێ وى، و دڤێت ئەم شيرەتێت خۆ نەبرين، بەلێ دڤێت بەرى ئەز شيرەتان ل وى بكەم، وان شيرەتان بۆ خۆ بكەمە بەرنامە، و ب جه بينم، پاشى شيرەتێ ل وى بكەم، و دڤێت ئەو شيرەت ژى بكەڤيتە د قالبێ خۆ يێ دورستدا، و بكەڤيتە د وەختێ خۆ يێ دورستدا، و ئەز بزانم كەنگى و چاوا دێ شيرەتێ لێ كەم، خودێ مەزن دبێژيت: ((قُلْ هَذِهِ سَبِيلِي أَدْعُو إِلَى اللَّهِ عَلَى بَصِيرَةٍ أَنَا وَمَنِ اتَّبَعَنِي)) هەى موحەممەد بێژە: ئەڤەيە رێكا من، رێكا من بانگهەلدێرى و دەعوە و گازيا دينێ خودێ، و ئەڤ گازيە ژى دڤێت (على بصيرة) بيت ئانكو: يا ب پەيرەو و پرۆگرام بيت و شارەزايى تێدا بيت، و دڤێت بزانين كا چاوا دێ دەعوێ كەين، دڤێت دەعوەيەكا ب نەخش بيت و دەعوەيەكا ب سەروبەر و مەنهەجى بيت و ل سەر بناخەيەكێ موكوم و نەخشەكرى بيت. و خودێ مەزن د ئايەتەكا ديدا دبێژيت: ((ادْعُ إِلَى سَبِيلِ رَبِّكَ بِالْحِكْمَةِ وَالْمَوْعِظَةِ الْحَسَنَةِ)) ب حيكمەت ئانكو: ب ئاخفتنا بنەجه و موكوم و ب دەليل و نيشان و ب نەرمى و ب ئاوايەكێ كارلێكەر و شيرەتا قەنج كو پێ بزانن تە ب وان شيرەتان خێرا وان دڤێت، و تە چو مەرەمێت دى نينن يان ژى ب قورئانێ ئەوا كو ئەو ب خۆ حيكمەت و شيرەتكارەكا قەنج، بانگهلدێرە بۆ رێكا خودايێ خۆ كو ئيسلامە، ڤێجا دڤێت شيرەت و ئاوايێ وێ بێتە ژێگرتن، ديسا هەر د وى وەختيدا دڤێت دەمێ گۆتن و بەرچاڤكرنا شيرەتێ ژى بێتە هەلبژارتن، و دڤێت ئەم دەستا ژ وان نەبەردەين ب هێجەتا ئاخفتنا دبێژن و شيرەتێت مە جهێ خۆ ناگرن، و ئەم بۆ ڤێ چەندێ پێغەمبەرێ خودێ (سلاڤێت خودێ لێ بن) بۆ خۆ بكەينە پێشەوا و رێبەر و چاڤلێكرى كەس و كارێت وى چەند ئێشاند و ئاخفتنێت گران و زڤر و نەخۆش گۆتنێ و نەخۆشى بۆ چێكرن بەلێ دگەل هندێ ژى ئەڤێ نەخۆشيێ هەميێ ئەو نەدا پاش و بێهيڤى نەكر بەردەواميێ نەدەتە شيرەت و بانگهەلدێريا خۆ، و خودێ چێتر دزانيت.
