ب / كەس نينە خەلەتيان نەكەت، يێ پاراستى ژ خەلەتيان بەس پێغەمبەرێ خودێيە (سلاڤێت خودێ لێ بن)، و خەلەتكارێ ژ هەميان باشتر ئەوە يێ پەشێمان ببيت و ل خۆ بزڤريت و خەلەتيێ بهێليت، هەروەكى پێغەمبەرآ خۆشتڤى (سلاڤێت خودێ لێ بن) د ڤەگێرا حاكميدا دبێژيت: (كل بني آدم خطاء وخير الخگائين التوابون) هەمى مرۆڤ خەلەت دبن و باشترين خەلەتكار ئەون يێت تۆبە دكەن و ل خۆ دزڤرن، و هەكە ئەڤێ خەلەتى ديتى بەرێ خۆ بدەتە خۆ دێ خۆ بينيت كۆمەكا خەلەتى و كێماسيان، و يا فەر ئەوە ئەم ب خەلەتى و كێماسيێت خۆڤە مژويل ببين نەيێت خەلكى، و هەكە تە كارەكێ هۆسا ديت فەرە تو وان ب دلسۆزى شيرەت بكەى، و بۆ وان دياركەى ئەڤ كارە يێ خەلەت و گونەهە و دژى رازيبوونا خودێ و پێغەمبەريە (سلاڤێت خودێ لێ بن) هەروكى پێغەمبەر (سلاڤێت خودێ لێ بن) دبێژيت: (مَنْ رَأَى مِنْكُم مُنْكراً فَلْيغيِّرْهُ بِيدهِ، فَإِنْ لَمْ يسْتَطعْ فبِلِسَانِهِ، فَإِنْ لَمْ يسْتَطعْ فَبقَلبهِ وَذلَكَ أَضعَفُ الإِيمانِ) موسلمى ژ ئەبى سەعيدآ خودەرى (خودێ ژێ رازی بیت) ڤەگێرايە ئانكو: هەركەسێ ژ هەوە گونەهـ و خرابيەك ديت بلا ب دەستێ خۆ بگوهۆريت، هەكە نەشيا بلا ب ئەزمانێ خۆ بيت، هەكە نەشيا بلا ب دلێ خۆ بيت و ئەڤە لاوازترين باوەريە.
هندى ئەو گونەها خۆ ئاشكرا نەكەت و خۆ پێ مەزن نەكەت و مەتحا پێ نەكەت و ژێ خەبەر نەدەت، ياباش ئەوە بێتە ڤەشارتن، و خەلەتيا وى نەهێتە ئاشكراكرن، و پەردە ل سەر نەهێتە راكرن. پێغەمبەرێ خۆشتڤى (سلاڤێت خودێ لێ بن) د ڤەگێرا بوخارى و موسلميدا دبێژيت: (ومَنْ ستر مُسْلِماً سَتَرهُ اللَّهُ يوْم الْقِيامَة) و هەركەسێ موسلمانەكى پەردە و ستارەكەت، خودێ دێ وى رۆژا قيامەتێ ستارەكەت. و موسلم ژ ئەبى هورەيرە ڤەدگێريت دبێژيت پێغەمبەرى (سلاڤێت خودێ لێ بن) گۆت: (لا يسْتُرُ عَبْدٌ عبْداً فِي الدُّنْيا إِلاَّ سَتَرهُ اللَّه يوْمَ الْقيامَة) چو بەندە چو بەندەيان د دنيايێدا ستارە ناكەن، هەكە خودێ وى رۆژا قيامەتێ ستارە نەكەت. ديسا د ڤەگيرا حاكميدا دبێژيت: (من رأى عورە فسترها كان كمن استحيى موؤودە من قبرها) هەركەسێ شەرمينگەهەكێ ببينيت و ڤەشێريت هەروەكى كچا ب ساخي بنگۆركرى ساخكرى، و ب رەنگەكێ گشتى باشتر ئەوە موسلمان خەلەتيا موسلمانى ڤەشێريت و پەردەكەت و ئاشكرانەكەت د ڤان كراساندا نەبيت:
ئێك: خەلەتكار خۆ ب خەلەتيا خۆ مەزن بكەت و ئەو ب خۆ ئاشكرا بكەت.
دوو: پێش چاڤێت خەلكى و ب ئاگەهـ زانينا وان گونەه بێتەكرن.
سێ: ئەو گونەه ژ وان بيت يێت جسارەت بۆ خەلكى ل سەر چێ بووى.
چار: ئەو گونەهـ يا ب جان و مالێ خەلكيڤە گرێداى نەبيت؛ هەكە يا وەسا بيت و شاهدەيى ژێ هاتە خواستن د ڤێت شەهدەييێ بدەت دا روح و مال بێنە پاراستن.
و فەرە گونەهكار ژى گونەها خۆ ڤەشێريت و ئاشكرا نەكەت هەكە بڤێت خودآ لێ ببۆريت. پێغەمبەر (سلاڤێت خودێ لێ بن) د ڤەگێرا موسلميدا ژ ئەبو هورەيرە دبێژيت: (كُلُّ أَمَّتِي مُعَافًى إِلاَّ المُجاهرينَ، وإِنَّ مِن المُجاهرة أَن يعمَلَ الرَّجُلُ بالليلِ عمَلاً، ثمَّ يُصْبحَ وَقَدْ سَتَرهُ اللَّه عَلَيْهِ فَيقُولُ: يا فلانُ عَمِلْتُ الْبَارحَة كذا وَكَذا، وَقَدْ بَاتَ يسْترهُ ربُّهُ، ويُصْبحُ يكْشفُ سِتْرَ اللَّه) هەمى ئوممەتا من ب سلامەتن يان د ئازاكرينە، گونەهـ ئاشكراكەر نەبن، و ژ ئاشكراكرنێيە زەلام ب شەڤ كارەكي، گونەهەكێ بكەت، پاشى سپێدە لێ ببيت، و خودێ يێ ستارەكرى و ڤەشارتى، دێ بێژيت: يا بێڤان دوهى من ئەڤە و ئەڤە يێ كرى، و شەڤێ يێ ماى خودێ يێ ستارەكرى، و سپێدە لێ دبيت، ستارا خودێ ئاشكرا دكەت.
ئيمامێ نەوەوى (خودێ ژێ رازی بیت) دبێژيت: يێ گونەها خۆ ئاشكراكەت دورستە بێتە ئاشكراكرن، چونكى وى بەرى غەيرى خۆ پەردە سەرخۆ راكريە، و راكرنا پەردێ ل سەر گونەهكارى يآ گونەها خۆ ڤەشارتى كرى دووجاركى گونەهە.. جارەكێ: بێ ئەمريا پێغەمبەرێ خودێ كر (سلاڤێت خودێ لێ بن)، يا دووێ: نەكامى كر، و نەكامى ئەوە تو بەحسێ برايێ خۆ ب تشتەكآ پآ نەخۆش بكەى، و خودێ چێتر دزانيت.
