ب / ب هەر رێكا سلاڤ بگەهيتێ دڤێت بەرسڤا سلاڤێ بدەت هەكە بەرسڤ نەدا يێ گونەهكارە، چونكى سلاڤكرن سونەتە دويف گۆتنا پتريا زانايان بەلێ بەرسڤدان واجبە، لەوا دڤێت هەرگاڤا سلاڤ گەهشتێ ئەو بەرسڤا سلاڤێ بدەت هەكە بەرسڤ نەدا گونەهكاربوو، د ڤەگێرا بوخارى و موسلميدا ژ عائيشايێ دەيكا مە موسلمانان (خودێ ژێ رازی بیت) هاتيە دبێژيت: (قال لي رسولُ الله صلى الله عليه وسلم: هذا جِبريلُ يقرَأُ عَلَيْكِ السَّلَامَ قالَتْ: قُلتُ: وَعَلَيْه السَّلامُ ورحْمَە الله وَبَرَكَاتُهُ) پێغەمبەرێ خودێ (سلاڤێت خودێ لێ بن) گۆتە من: ئەڤە جبريلە سلاڤان ل تە دكەت، گۆت: من گۆت: سلاڤێت خودێ و دلۆڤانيا وى و بەرەكەت و زێدەيى و پيرۆزيا وى ل سەر بن، و خودێ چێتر دزانيت.
