ب : دڤێت ئه‌م باش بزانین، و هه‌ده‌م ل بیرا مه بیت، و ژبیرا مه نه‌چیت، و به‌رده‌وام مه ئاگه‌ھ ژ خۆ هه‌بیت، هه‌ر تشتێ ئه‌م دبێژین و دهێته سه‌ر زار و ئه‌زمانێ مه، ئه‌م ژێ به‌رپرسین، و هه‌می دهێته نڤیسین، و چو به‌رزه‌نابیت، هویر بیت گر بیت بچویك بیت مه‌زن بیت، خودایێ مه‌زن دڤێ راستێدا دبێژیت : (مَا يَلْفِظُ مِن قَوْلٍ إِلاَّ لَدَيْهِ رَقِيبٌ عَتِيدٌ) ئانكو: ملیاكه‌ت یێت ئامه‌ده‌باشیێدا و به‌ر ته‌ڤه یێت راوه‌ستیاینه، چ بێژی دێ نڤیسین، ب مژانه بیت، یان ترانه بیت، ل گه‌ل به‌رێ خۆ بده گۆتنا خودێ؛ دا مه‌هه‌میا های ژ خۆ هه‌بیت، و به‌س گونه‌هان ل خۆ زێده‌كه‌ین، (ما) و (من قول) (ما) ل ڤێرێ گشتگیر و گشتخوازه هه‌می گوتن و سوحبه‌تان دگریت، یا ب ترانه و یا مژانه، و (من قول) رامانا هندێ دده‌ت هه‌می گۆتن و بێژه‌یان د چ كراس و رو‌شدا بێنه گۆتن دهێنه نڤیسین، و دڤێت ئه‌م بزانین گونه‌ھ و تشتێ پتر هه‌میان خه‌لكی دبه‌ته جهنه‌مێ ئه‌زمان و ئاخفتنه، و باراپتر خه‌لك ژ ئه‌گه‌ر و ئه‌نجامێ ئه‌زمانێ خۆ سه‌روسه‌ر دچنه جهنه‌مێ، و مخابن ترازیا گه‌له‌كان بۆ هه‌لسه‌نگاندا ئاخفتنێ یا كوره و له‌واز و خه‌له‌ته، ژ به‌رهندێ خۆ ژ چ ئاخفتنا ناده‌نه پاش، و ئه‌و ب خۆ دبیت ئه‌م چ بهایی نه ده‌ینه هنده ئاخفتنان به‌لێ ل ده‌ف خودێ دمه‌زنن، و ب وان ئاخفتنان یان دێ هه‌ژی جهێت كویر یێت ژ جهنه‌مێ یان دێ هه‌ژی خه‌لاتێ به‌حه‌شتێ بیت، دڤێ راستێدا پیغه‌مبه‌ر سلازڤێت خودێ ل سه‌ربن دبێژیت : (إِنَّ الْعَبْدَ لَيَتَكَلَّمُ بِالْكَلِمَةِ من رِضْوَانِ اللَّهِ لَا يُلْقِي لها بَالًا يرفع الله بها دَرَجَاتٍ وَإِنَّ الْعَبْدَ لَيَتَكَلَّمُ بِالْكَلِمَةِ من سَخَطِ اللَّهِ لَا يُلْقِي لها بَالًا يهوى بها في جَهَنَّمَ) ئیمامێ بوخاری ڤه‌گێرایه، به‌رێ خۆ بدێ كا چاوا ئاخفتن خودانێ خۆ سه‌ر دئێخیت یان بن دئێخیت، و هه‌ردوكان خودانێ وێ ب چڤه وه‌رنه‌گرت، و چ بها بۆ نه‌ددانا، و نوكتا كرێت نابیت ب كه‌ڤیته سه‌ر ئه‌زمانێ موسلمانی، موسلمان تشتێ پاك و پاقژ پێڤه‌تر نا وه‌رگریت، و ژ پاك و پاقژی ژی ژ ئه‌زمانێ وی نا ده‌ركه‌ڤیت، ئه‌و یێ وه‌سایه وه‌كی پێغه‌مبه‌ری سلاڤێت خودێ ل سه‌ربن گۆتی : (مَثَلُ الْمُۆمِنِ مَثَلُ النَّحْلَةِ لا تَأْكُلُ إِلا طَيِّبًا وَلا تَضَعُ إِلا طَيِّبًا) مه‌ته‌لا وی وه‌كی مێشا هنگڤینییه ژ پاك و پاقژی پێڤه‌تر نا راكه‌ت و ه‌رگریت، و هه‌ر ژ پاك و پاقژی پێڤه‌تر نا ده‌ت، و دڤێت ئه‌م بزانین مه‌لا و ئیمامێت مزگه‌فتان قه‌در زانینا وان ژ قه‌در زانینا دینییه، و یێ رێزو و حورمه‌تا هه‌ژێ نه ده‌ته وان، بلا ژ خۆ بترسیت، و ب زانیت ئه‌و ل سه‌ر راسته‌رێكا ئیسلامێ یێ ته‌حسی و یێ ژێ ده‌ركه‌فتی، و بلا زوی ل خۆ ب زڤریت، هێشتا گه‌له‌ك دویر نه‌كه‌فتی، هه‌كه پاشی زڤرین دێ یا ب زحمه‌ت بیت، ئه‌ڤه نه ئاخفتن و فه‌رمانا منه، به‌لكی ئه‌ڤه ئاخفتن و فه‌رمان و بریارا خوشتڤی و پێشاهیێ من و ته‌یه پێغه‌مبه‌رێ خوشتڤی سلاڤێت خودێ ل سه‌ربن دبێژیت: (ليس منا من لم يجل كبيرنا ويرحم صغيرنا ويعرف لعالمنا) هه‌لبه‌ت ئیمام حاكمی ڤه‌گێرایه، به‌رێ خۆ بدێ چه‌ند جاركێ وان مافی ل سه‌ر مه‌هه‌ی، و دڤێت ئه‌و ماف یێ پارازتی بیت و نه هێنه شكاندن، پێغه‌مبه‌رێ خوشتڤی سلاڤێت خودێ ل سه‌ربن دبێژیت نه‌ژ مه‌یه یێ رێزگرتنێ ل مه‌زنێت مه نه‌گریت، و ئه‌و ژ مه‌زنێت موسلمانان دهه‌ژمارتینه؛ چونكی دینی و دینداریێ نیشا مه دده‌ن، و یا دوویێ دبێژیت نه ژ مه‌یه یێ مافێ زانایێ مه نه زانیت، و ئه‌و زانایێت م موسلمانانن، و ترانه پێكرن ب وان و ببنه جهێ كه‌نی و نوكتان، نه شكاندنه بۆ وان ب تنێ، به‌لكی شكاندنه بۆ وی دینێ ئه‌و نوینه‌راتیێ بۆ دكه‌ن، و ب راستی نوكته‌چێكرن و ڤه‌هاندن ل سه‌ر مه‌لایان ئه‌ز دبێژم ده‌ستیت پشترا و یا مه‌به‌ستداره، بلا ئه‌م نه هێنه خاپاندن و نه ئه‌و و كه‌ساتیا وان یا مه‌به‌ستكریه ب وێ پله‌یا دینێ ئه‌و نوینه‌راتیێ بۆ دكه‌ن مه‌به‌ستداربیت، و بارا پتر مرۆڤێت دین سست مه‌لا دكه‌نه جهێ ترانێت خۆ، هشیار بن دویف تایێ وان نه‌چن، و هه‌وه نه كێشنه تایێ خۆ، و ب راستی ترانه‌كرن ب مه‌لایان و هێما و ره‌مزێت دینی كاری مونافق و دوورویانه، به‌رێ خۆ بدێ مونافقا ده‌مێ ڤیایی پاڤێژنه دینی هاڤیتنه ره‌مزێت دینی گۆتن: (ما رأينا مثل قرائنا هۆلاء لا أرغب بطونا ولا أكذب ألسنة ولا أجبن عند اللقاء) مه وه‌كی قورئانزانێت خۆ (ده‌ربرینا ئه‌ڤرۆ مه‌لایێت خۆ) زكینتر و ئه‌زمان دروه‌ینتر و ترسینوكتر دریبریبونێدا نه دیتینه، زه‌لامه‌كێ ئه‌ڤه ژ وان گولێ بوو، گۆتێ: تۆ دره‌وان دكه‌ی تۆ مونافقی، چۆ دا بێژته پێغه‌مبه‌ری سلاڤێت خودێ ل سه‌ربن، دیت وه‌حیا دراستا واندا هاتیه خوارێ، و دبێژیت من خودانێ وێ ئاخفتنێ دیت یێ ل دویف حێشترا پێغه‌مبه‌ریرا سلاڤێت خودێ ل سه‌ربن دچیت و به‌ر یێت پێت وی دكه‌ڤن و دبێژیت: یا پێغه‌مبه‌رێ خودێ مه ترانه دكرن، و پێغه‌مبه‌ری دبێژتێ: هه‌وه ترانه بۆ خۆ ب خودێ و ئایه‌تێت وی و پێغه‌مبه‌رێ وی دكرن، ڤێجا دڤێت مه ئاگه‌ھ ژ خۆ هه‌بیت ئه‌م زانا و هێمای و ره‌مزێت دینێ خۆ نه‌كه‌ینه جهێ نوكتا و ترانه‌یان و خودێ چێتر دزانیت.
