ب: مرۆڤ پارێزی و مرۆڤانی پارازتن، و پارازتنا مرۆڤانیێ، كو ب عه‌ره‌بی دبێژنێ: (صلة الرحم) ئه‌رك و واجبه، و دڤێت مرۆڤانيیێ بپارێزین، و خه‌مێ ژێ بخوین، و باشی مه بۆ مرۆڤانيیێ هه‌بیت، و دڤێت ئه‌ڤ باشيیه یا به‌رده‌وام بیت، و نه‌هێته راوه‌ستیان، و نه‌هێته برین. نه‌وه‌وی (خودێ ژێ رازی بیت) د شه‌رحا موسلمێدا ژ قازی عه‌یازی (خودێ ژێ رازی بیت)، ڤه‌دگێریت دبێژیت: نه جهێ نه‌لێكی و جودابوونێیه د ناڤبه‌را زانایاندا پارازتنا مرۆڤانیيێ ئه‌رك و فه‌رزه، و برینا مرۆڤانيیێ و نه‌پارازتنا مرۆڤانيیێ ژ گونه‌هێت مه‌زنه، ژ ئاخفتنا قازی عه‌یاز (خودێ ژێ رازی بیت) ئه‌ڤه دهێته زانین، ئێك: پارازتنا مرۆڤانيیێ (صلة الرحم) فه‌رمانه‌كا خوداییيه، و زانا هه‌می ئێك ده‌نگ و بۆچۆنن، پارازتنا مرۆڤانيیێ و باشی پێ گه‌هاندن ئه‌رك و فه‌رز و واجبه، و دڤێت ئه‌ڤ چه‌نده به‌رێ مه بده‌ته هندێ ئه‌م ل سه‌ر مرۆڤانيیێ د رژد و هشیار بین، كا چاوا ئه‌م ل سه‌ر هه‌ر فه‌رمانه‌كا دی یا خودایی د هشیارین. دوو: برینا مرۆڤانيیێ و نه‌پارازتنا مرۆڤانيیێ، نه گونه‌هه‌كا بچویكه، به‌لكی ژ گونه‌هێت مه‌زنه، و ژ كه‌بائیرانه، و ژ وان گونه‌هانه ب باشيیان نه‌هێنه ژێبرن، هه‌كه ته‌وبه‌كێ بۆ نوی نه‌كه‌ت؛ چونكی ئه‌و باشيیێت گونه‌هان ژێ دبه‌ن، وه‌كی: رۆژيیا عه‌ره‌فێ و خوتبه بۆ خوتبێ یا گرێدایه ب مه‌رجه‌كيڤه ئه‌و ژی كه‌بائیر ـ گونه‌هێت مه‌زن ـ د ناڤ گونه‌هاندا نه‌بن، پێغه‌به‌ر (سلاڤێت خودێ ل سه‌ربن) د ڤه‌گێرا موسلميدا دبێژیت: (الصَّلواتُ الْخَمْسُ، والْجُمُعَةُ إِلَى الْجُمُعةِ، ورمضانُ إِلَى رمضانَ مُكفِّرَاتٌ لِمَا بينَهُنَّ إِذَا اجْتنِبَت الْكَبائِرُ) پێنج نڤێژ، و خوتبه ھه‌تا خوتبێ، و ره‌مه‌زان ھه‌تا ره‌مه‌زانێ، گونه‌ھ ژێبه‌رن، بۆ د ناڤبه‌را خۆدا، ھه‌که ژ گونه‌ھێت مه‌زن بێته دویرئێخستن. و نه‌پارازتنا مرۆڤانيیێ ژ گونه‌هێت مه‌زنه، ته‌وبه‌كا تایبه‌ت بۆ دڤێت، و پێنج نڤێژ و خوتبه بۆ خوتبێ و ره‌مه‌زان بۆ ره‌مه‌زانێ و گرتنا رۆژیيا عاشوورایێ و رۆژیيا عه‌ره‌فێ، ڤێ گونه‌هێ و یێت وه‌كی وێ ژ گونه‌هێت مه‌زن ژێ نابه‌ت؛ ب به‌لگه‌یێ: (إِذَا اجْتنِبَت الْكَبائِرُ) ھه‌که ژ گونه‌ھێت مه‌زن بێته دویرئێخستن، خودایێ مه‌زن فه‌رمانێ دكه‌ت، ئه‌م ته‌قوا خودێ بكه‌ین و پارێزكاريیا خودێ بكه‌ین دویفرا فه‌رمانا مه كر ئه‌م مرۆڤانيیێ بپارێزین دبێژیت: (وَاتَّقُواْ اللَّهَ الَّذِى تَسَاءلُونَ بِهِ وَالاْرْحَامَ) و ھوین پارێزکارییا خودێ بکه‌ن، ئه‌وێ ھوین ب ناڤێ وی تشتان ژ ئێکدو دخوازن، و ھشیاری مرۆڤانییێ بن نه‌قه‌تینن، هه‌روه‌كی خودێ دبێژیت: پارێزكاريیا خودێ بكه‌ن، و پارێزكاريیا مرۆڤانیيێ بكه‌ن، به‌رێ خۆ بدێ كا فه‌رمانا ئێكێ یا خودێ ب پارێزكاريیێ چ بوو؟ و یا دویێ ب چ بوو؟ فه‌رمانا ئێكێ پارێزكاريیا خودێ بكه‌ن، پاشی دویڤدا خودێ گۆت: پارێزكاريیا مرۆڤانيیێ بكه‌ن.
