ب : زانا دبێژن: سیله‌ت ره‌حم.. ئه‌وه: (إيصال ما أمكن من الخير ودفع ما أمكن من الشر بحسب الطاقة) ھندی مرۆڤی شیان ھه‌بن خێرێ و باشيیێ بگه‌ھینیته مرۆڤێت خۆ، و ئه‌ڤه به‌س نینه، دڤێت ھندی بشێت خرابيیێ ژی ژ وان بده‌ته پاش، و دڤێت ئه‌م بزانین خێر و باشی ئه‌وه یا موسلمانه‌تيیێ وه‌سا دانایی، نه یا تو وه‌سا دبینی، و خرابی ئه‌وه یا موسلمانه‌تيیێ خرابی دانایی، نه یا تو وه‌سا دبینی؛ چونکی دبیت پیڤه‌رێ ته یێ خه‌له‌ت بیت، باشيیێ خرابی ببینیت، یان به‌روڤاژی، و سیله‌ت ره‌حم ئه‌و نینه ھه‌که ئه‌و د باش بن، تو ژی یێ باش بی، و ھه‌که د خراب بن تو ژی یێ خراب بی، به‌لکی سیله‌ت ره‌حم ئه‌وه، ئه‌و د خراب بن، یان د باش بن تو هه‌ر یێ باش بی، و خرابيیا وان ته ژ باشیکرنا وان نه‌ده‌ته پاش، و دڤێت تو بێھنا خۆ ل سه‌ر خرابيیا وان فره‌ھکه‌ی، به‌رێ خۆ بدێ کا پێغه‌مبه‌ر (سلاڤێت خودێ ل سه‌ربن) د ڤه‌گێرا بوخاریدا ژ عه‌بدوللایێ کورێ عه‌مرێ کورێ عاسی (خودێ ژ ھه‌ردویان رازی بیت) چ دبێژیت: (لَيْسَ الْواصِلُ بِالمُكافئ وَلكِنَّ الواصِلَ الَّذي إِذا قَطَعتْ رَحِمُهُ وصلَهَا) یێ بۆ مرۆڤانيیێ باش نه‌ئه‌وه یێ قه‌نجی و باشيیێ ل جھی دانیت، به‌لێ یێ بۆ مرۆڤانيیێ باش ئه‌وه ھه‌که مرۆڤێت وی بۆ خراب ژی بن، ئه‌و ھه‌ر بۆ وان یێ باش بیت، و قه‌تیعه‌ت ره‌حم ئه‌وه تو باشيیێ د گه‌ل مرۆڤێت خۆ نه‌که‌ی، و باشيیێ نه‌گه‌ھینيیه وان، و به‌س نینه تو بێژی ئه‌ز خرابيیێ ناگه‌ھینمێ، دڤێت ـ ل دویڤ شیانێت خۆ ـ تو خرابيیێ نه‌گه‌ھینيیێ و خرابيیێ ژ وان بده‌یه پاش، و ده‌ستێ ھاریکاريیێ بۆ درێژکه‌ی، و ھندی بشێی باشيیێ د گه‌ل وان بکه‌ی، ئیمامێ نه‌وه‌وی (خودێ ژێ رازی بیت) دبێژیت: سیله‌ت رحم و مرۆڤانی ئه‌ڤیه: (هي الاحسان إلى الاقارب على حسب حال الواصل والموصول، فتارة تكون بالمال وتارة بالخدمة وتارة بالزيارة والسلام) مرۆڤانی ئه‌ڤه‌یه تو باشی و قه‌نجيیێ بگه‌هینيیه مرۆڤێت خۆ دویڤ ره‌وشا خۆ (ئانكو ل دویڤ شیان و ده‌سهلات و ده‌ستفره‌هيیا خۆ) و ل دویڤ ره‌وشا مرۆڤێ خۆ كا پێدڤى چییه، دڤێت وێ د گه‌ل بكه‌ی، ڤێجا ئه‌ڤ باشيیه هنده جاران دڤێت ب پاره‌ی بیت، چونكی هه‌وجه‌یا وی پاره‌یه، و هنده جاران دڤێت ب خزمه‌تكرنێ بیت هه‌كه هه‌وجه‌یی بۆ هندێ هه‌بیت، و هنده جاران ب سه‌ره‌دانێیه و هنده جاران ب سلاڤێیه، ئانكو هه‌وجه‌ی چییه دڤێت وێ د راستا ویدا بكه‌ی، و هشیاربی چرویكی و به‌خیلی وه‌ل ته نه‌كه‌ن، مرۆڤانيیێ ببری، ب راستی بارا پتر یێت پشتا خۆ داینه مرۆڤانيیێ ئه‌گه‌رێ وان قه‌لسی و چرویكییه؛ دا مرۆڤێت وی خۆ هه‌وجه‌نه‌كه‌نێ، و هه‌وجه‌یا مرۆڤێت خۆ نه‌قه‌تینیت، ڤێجا دا خۆ ژ ڤێ ته‌نگاڤيیێ بده‌ته پاش، پشتا خۆ دده‌ته مرۆڤانيیێ، به‌رێ خۆ بدێ كا پێغه‌مبه‌ر (سلاڤێت خودێ ل سه‌ربن) چ د ڤه‌گێرا ئیمام ئه‌حمه‌دیدا دبێژیت: (إياكم والشح فإن الشح أهلك من كان قبلكم أمرهم أن يقطعوا أرحامهم فقطعوا) هشیارى قه‌لسيياتييێ بن، ب راستی قه‌لسيیاتیيێ یێت به‌ری هه‌وه د هیلاك برن، فه‌رمانا وان كر ئه‌و مرۆڤانيیێ ببرن و نه‌پارێزن، ئینا نه‌پارازت و برین.
هنده‌ك سیله‌ت ره‌حمێ تێ دگه‌هن به‌س سلاڤكرنه، و ته‌له‌فۆنكرنه، و سلاڤ هنارتنه، و نامه و مه‌سج هنارتنه، نه‌خێر ب ڤێ چه‌ندێ ئه‌و ژ وان ناهێته هه‌ژمارتن یێت مرۆڤانی پارازتین، مرۆڤانی پارازتن هاریكاری و هه‌وجه‌یی قه‌تاندنه، ڤێجا كا ئه‌و هه‌وجه‌ی چییه و ب چ دقه‌تیێت ئه‌و دڤێت بێته‌كرن، مرۆڤانی پارازتن، سیله‌ت ره‌حم به‌ری هه‌می تشتان ب مالی دهێته كرن، ژ به‌ر هندێ چه‌ند جاران ئه‌ڤ رامانه د قورئانێدا هاتیيه به‌رچاڤكرن، وه‌كێ: (إِنَّ اللَّهَ يَأْمُرُ بِالْعَدْلِ وَالإْحْسَانِ وَإِيتَاءِ ذِى الْقُرْبَى) و (وَءَاتَى الْمَالَ عَلَى حُبِّهِ ذَوِى الْقُرْبَى) و (وَلاَ يَأْتَلِ أُوْلُواْ الْفَضْلِ مِنكُمْ وَالسَّعَةِ أَن يُؤْتُواْ أُوْلِى الْقُرْببَى) ڤێجا مرۆڤانی به‌ری هه‌می تشتان ب مالی و دراڤی دهێته پارازتن، پاشی دبیت ب سه‌ره‌دانێ بیت، یان به‌رسڤدانا ڤه‌خوازتنێ، یان ب پیرۆزكرنا خۆشيیان، یان ب دله‌دلیدانێدا د نه‌خۆشیاندا، یان ب سه‌ره‌دانێ د نه‌خۆشیاندا، یان ب پشكداریكرنێ د ده‌وات و خۆشيیاندا، یان ب هاریكرنێ د ده‌ینیدا، یان ب برنا وی بۆ نوژداری هه‌كه شیا، ئه‌ڤه هه‌می دویڤ هه‌وجه‌يییا مرۆڤێ ته، و هنده‌ك تێ دگه‌هن سیله‌ت ره‌حم و مرۆڤانی به‌س سلاڤ و مه‌رحه‌بایيیه، و گه‌له‌كان هه‌كه تو بێژيیێ تو بۆ مرۆڤانيیێ یێ چاوانێ؟ دێ بێژیت: چ قوسیری ل من نینن، و ئه‌ز كێماسییێ ناكه‌م، و هه‌كه تو به‌رێ خۆ بده‌یه باشيیا وی، ژ سلاڤ و مه‌رحه‌با و سه‌ره‌دانێ نابۆريت، خه‌ما نه‌ساخی و ته‌نگاڤی و ده‌ینداری و هه‌وجه‌یا مرۆڤێ خۆ د بنیرا ناخۆت، و ئه‌ڤه بۆ وی خه‌م نینه، به‌س پسیار دكه‌ت چ ل هه‌وه هات و هه‌و چ كر و هه‌ر هند، و دبێژێت: كه‌س وه‌كی من نینه بۆ مرۆڤانیيێ، و ئه‌ز یێ بێ كێماسیمه، نه‌خێر وه‌سا نینه، وه‌كی تو دبێژی، به‌لكی تو هه‌می كێماسی، هه‌ر ژ كولوڤانكا سه‌رێ خۆ هه‌تا پانيیا پێت خۆ، ته نه‌زانيیه مه‌خسه‌د ژ سیله‌ت ره‌حم و مرۆڤانێ پارازتنێ چيیه، و ته ئه‌مرێ خودێ ب جهـ نه‌ئینایه، و تو ژ وان نابی یێت رۆژا قیامه‌تێ به‌رامبه‌ر مرۆڤانيیێ سه‌ركه‌فتی و سه‌رفه‌راز؛ چونكی مرۆڤانی رۆژا قیامه‌تێ دێ شه‌هده‌یێ ب پارازتنێ یان نه‌پارازتنێ بۆ مرۆڤێ خۆ ده‌ت، ئبن عه‌باس (خودێ ژێ رازی بیت) دبێژیت: پێغه‌مبه‌ر (سلاڤێت خودێ ل سه‌ربن) دبێژیت: (كل رحم آتية يوم القيامة أمام صاحبها تشهد له بصلته إن كان وصلها وعليه بقطيعته إن كان قطعها) هه‌می مرۆڤانی رۆژا قیامه‌تێ دێ هێن شاهده‌یێ ب پارێزیێ ده‌ن هه‌كه مرۆڤانی پارازتبیت، و ب نه‌پارازتنێ ئه‌گه‌ر پشتا خۆ دابیته مرۆڤانيیێ و بری بیت، و یێ تێگه‌هشت بیت مرۆڤانی سلاڤكرنه و به‌س و پسیاركرنه ژ ساخی و سلامه‌تيیا وان و به‌س ئه‌و دێ ژ وان بیت یێت مرۆڤانی شه‌هده‌یێ دژی وی دده‌ت نه بۆ وی دده‌ت، چونكی مرۆڤانی نه‌ئه‌وه یا وی هزر دكر، به‌رێ خۆ بده ئبن جوره‌یج (خودێ ژێ رازی بیت) د راڤه‌كرنا ڤێ ئایه‌تێدا (ويقطعون ما أمر الله به أن يوصل) چ دبیژیت: و ئه‌و مرۆڤانيیا خودێ فه‌رمان ب پارازتنا وێ كری دبرن دبیژیت: (بلغنا أن النبي صلى الله عليه وسلم، قال: إذا لم تمش إلى ذي رحمك برجلك ولم تعطه من مالك فقد قطعته) گه‌هشته مه پێغه‌مبه‌ر (سلاڤێت خودێ ل سه‌ربن) دبێژیت: هه‌كه تو ب پێت خۆ نه‌چی سه‌را مرۆڤێت خۆ بده‌ی، و ژ مالێ خۆ نه‌ده‌یێ، ته پشتا خۆ دایێ، و مرۆڤانی نه‌پارازت، ڤێجا كورت و كرمانج، مرۆڤانی و باشی ئه‌وه هه‌می ره‌نگێت باشيیێ د گه‌ل مرۆڤێت خۆ بكه‌ی، و باشيیا وی هه‌وجه‌یی بۆ هه‌ی، و خرابیێ ژ وان بده‌یه پاش، هه‌ر خرابيیه‌كا گه‌هشتيیه وان، و هه‌كه تو بشێی ل سه‌ر وان راكه‌ی و ته نه‌كر، ته مرۆڤانی نه‌پارازت، و به‌س نینه تو بێژی ئه‌ز خرابيیێ ناگه‌ھینمێ، دڤێت ـ ل دویڤ شیانێت خۆ ـ تو خرابيیێ ژ وان بده‌یه پاش و ده‌ستێ ھاریکاریيێ بۆ درێژکه‌ی.
