ب : بێ گۆمان مرۆڤێت مه هه‌می ئێك رێز نینن، ئێك فه‌رتره و نێزكتره ژ یێ دی، ئه‌بی هوره‌یره (خودێ ژێ رازی بیت)، د ڤه‌گێرا بوخاری و موسلمیدا دبێژیت: (جَاءَ رَجُلٌ إلى رسول اللَّه صَلّى اللهُ عَلَيْهِ وسَلَّم فقال: يا رسول اللَّه مَنْ أَحَقُّ النَّاسِ بحُسنِ صَحَابَتي؟ قال: أُمُّك قال: ثُمَّ منْ؟ قال: أُمُّكَ قال: ثُمَّ مَنْ؟ قال: أُمُّكَ قال: ثُمَّ مَنْ؟ قال: أَبُوكَ) زه‌لامه‌ك هاته ده‌ڤ پێغه‌مبه‌رێ خودێ (سلاڤێت خودێ ل سه‌ربن) و گۆت: يا پێغه‌مبه‌رێ خودێ كى ژ مرۆڤان پتر هه‌ژى هه‌ڤالباشييا منه؟ گۆت: ده‌يكا ته، گۆت: پاشى كى؟ گۆت: ده‌يكا ته، گۆت: پاشى كى؟ گۆت: ده‌يكا ته، گۆت: پاشى كى؟ گۆت: بابێ ته. و د ڤه‌گێرا موسلمیدا دبێژیت: (يا رسول اللَّه مَنْ أَحَقُّ الناس بِحُسْن الصُّحْبةِ ؟ قال: أُمُّكَ ثُمَّ أُمُّكَ، ثُمَّ أُمُّكَ، ثمَّ أَباكَ، ثُمَّ أَدْنَاكَ أَدْنَاكَ) یا پێغه‌مبه‌رێ خودێ كی ژ مرۆڤان پتر هه‌ژی هه‌ڤالباشیێیه؟ گۆت: دایكا ته، پاشی دایكا ته، پاشی دایكاته، پاشی بابێ ته، پاشی یێ نێزيكتر و نێزیكتر، ژ ڤان هه‌ردو حه‌دیسان دهێته زانین مافێت مرۆڤێت مه هه‌می وه‌كی ئێك نینن، كا كی پتر نێزیكی منه مافێ وی پتره ل سه‌ر من، و دڤێت به‌ری هه‌میان هه‌وجه‌یيیا وی بقه‌تینم، و نه‌هێلمه هه‌وجه و مه‌حتل، بۆ نموونه: هه‌كه ته برا هه‌بیت و مام و پسمام، و هه‌رسێ د هه‌وجه‌نه، هه‌كه ته شیانێت سنوردار هه‌بن، و ته شیانێت ڤه‌كری نه‌بن هه‌وجه‌یا هه‌رسێیان بقه‌تینی، هنگی ل سه‌ر ته واجبه تو هه‌وجه‌یا برایێ خۆ بقه‌تینی، یێ ژ هه‌میان نێزیكتر بۆ ته، و یێت دی دوعا بۆ بكه‌ی، و دله‌دلێ وان بده‌ی، و خه‌ما وان ل سه‌ر سڤك بكه‌ی، و بێژیيێ من شیان نینن، به‌لێ هه‌كه ته شیان هه‌بن ههوجهيییا هه‌رسێیان بقه‌تینی، و زیان ب ته نه‌كه‌ڤیت، هنگێ ده‌ستپێكێ دێ یا برایێ خۆ چاره‌سه‌ركه‌ی، پاشی یا مامێ، پاشی یا پسمامی، به‌لێ ل ڤێرێ تێبینيیه‌كا فه‌ره بێژین: دڤێت ئه‌م به‌رچاڤ وه‌رگرین ئه‌و ژی هه‌كه ئێك هه‌وجه بوو و دڤێت ههوجهيییا وی بێته چاره‌سه‌ركرن، هنگی كا كی نێزیكتره ژ مرۆڤێت وی ل سه‌ر وی دكه‌ڤیت ئه‌و وێ هه‌وجه‌یێ بقه‌تینیت، به‌لێ هه‌كه مرۆڤێت وی یێت نێزیك، ئه‌ڤێت ل سه‌ر وان دكه‌ڤيت هه‌وجه‌یيیا مرۆڤێ خۆ راكه‌ن نه‌كر، و ده‌ستێ هاریكاريیێ بۆ درێژ نه‌كر، و پشتا خۆ دایێ، هنگی ئه‌و ئه‌رك بۆ مرۆڤێ وی یێ دویڤ ویدا د نێزیكیێدا دهێته ڤه‌گوهازتن، و دڤێت ب ئه‌ركێ مرۆڤانيیێ رابیت، و نه‌بێژیت بۆ فلانی دكه‌ڤیت، راسته بۆ وی دكه‌ڤیت، به‌لێ ئه‌و فلان یێ خرابه و خه‌ما مرۆڤانيیێ ناخۆت، وی چ نه‌كر تو ژی چو نه‌كه‌ی؛ چونكی یێ ژ ته نێزيكتر چو نه‌كر ئه‌ڤه خه‌له‌ته، و نه‌دورسته، و تو ژ به‌رپرساتيیێ رزگار نابی، هه‌كه ته شیان هه‌بن؛ چونكی خودێ دبێژیت: (لا یكلف الله نفسا الا وسعها) بۆ نموونه: هه‌كه برایێ ته یێ ته‌نگاڤ بیت، و برایێ ته سێ كور هه‌بن، به‌لێ هه‌رسێكان پشتا خۆ دابیتێ، و هاریكاریيا بابێ خۆ نه‌كه‌ن د گه‌ل حالخۆشيیا وان، به‌لێ د خراب و دلره‌قن، هنگی بۆ ته نینه تو ههوجهيییا برایێ خۆ بهێلیيه ل عه‌ردی، و چاڤێ خۆ نه‌ده‌یێ و هه‌وجه‌ییيا وی نه‌قه‌تینی، ب هێجه‌تا كورێت وی زه‌لام و زه‌نگینن، و ده‌ستێ وان یێ به‌رفره‌هه، بلا ئه‌و بكه‌ن، ل سه‌ر وان دكه‌ڤیت، ل سه‌ر من ناكه‌ڤیت، و ل سه‌ر من ناچیت، راسته ئه‌و د به‌رپرسن، به‌لێ هه‌كه وان پشتا خۆ دا وێ به‌رپرساتيیێ، هنگی به‌رپرساتی بۆ ته دهێت، و دڤێت پێ رابی، هه‌كه وه‌نه‌كه‌ی یێ گونه‌هكاری، و ته مرۆڤانی نه‌پارازت، زانا دبێژن: هه‌كه یێ نێزیك ب ئه‌ركێ مرۆڤانیيێ نه‌رابوو، هنگی دهێته ڤه‌گوهازتن بۆ یێ دویڤرا د نێزیكیاتيیێدا دهێت.
