ب: دیندار و موسلمانێ راست و دورست نه ئه‌وه یێ نڤێژكه‌ر و رۆژی گربیت و ئه‌و ب خۆ كوما ئێش و ده‌ردێت ده‌رونی و كومه‌لایه‌تی بیت، و نڤێژ ئه‌وا خودایێ مه‌زن دراستا وێدا دبێژیت: (إن الصلاة تنهى عن الفحشاء والمنكر) ب راستی نڤێژ به‌رێ مرۆڤی ژ ھه‌می گونه‌ھێت زێده پیس، و کریارێت نه‌دگه‌ل سروشتێ مرۆڤان، و کریارێت کرێت و نه‌شرین ئه‌وێت شه‌ریعه‌تی دورست نه‌کرین وه‌کی: خۆ مه‌زنکرن و زکڕه‌شی و که‌رب و کین و غه‌یبه‌ت و نه‌کامی و ئاخفتن ڤه‌گوھێزی .....هتد وه‌ردگێڕیت، وی ژ وان كرێتی و خرابیان نه‌ده‌ته پاش.
ڤێجا هه‌كه مرۆڤێ موسلمان یێ ساخله‌م نه‌بیت ژ ڤان ده‌ردان، وی ئیسلامه‌تی هه‌می نه‌گرتیه، و وی به‌س پیته یێ دایه لایێ ئاشكرا تنێ ژ ئیسلامێ، ئه‌و ژی رۆژی و نڤێژن، و خه‌ما درون پاقژیا خۆ نه‌خارییه؛ ژ به‌رهندێ دێ بینی خۆ مه‌زندكه‌ت، یان غه‌یبه‌تێ و نه‌كامیێ دكه‌ت، یان مافێت خه‌لكی دخوت، یان سه‌ره‌ریا نه دورست دكه‌ت و به‌رتیلان وه‌ردگریت و دده‌ت، و توهمه‌ت به‌خشینا دكه‌ت، و خه‌لكی دئێشینیت و دشكێنیت، و یێ ئه‌زمان پیسه و ئه‌زمان زڤره، و ئه‌و ئێشێت ده‌رونی دبنه دوو ره‌نگ: یێت بۆ خه‌لكی ئاشكرا و به‌رچاڤ و دبینن، و یێت نه ئاشكه‌را ئه‌وێت دلاندا ڤه‌شارتی:
ئێشێت نه‌ئاشکرا وه‌کی: خۆ مه‌زنکرن (التكبر) و شاھی ب خۆ برن (العجب) و غه‌زه‌ب و که‌ربگرتن (الغضب) و زکڕه‌شی (الحسد) و که‌رب و کین (البغض) و ھزرخه‌له‌تی (سوء الظن) و کێمکرنا خه‌لکی (اهانه الناس) و خوارنا مافان (اكل الحقوق).
و ئێشێت ئاشکرا وه‌کی: سته‌م و زۆرداری (الظلم) و جھئینانا حوکمێ نه‌یێ خودێ (الحكم بغیر ما انزل الله) و به‌رتیل (الرشوه) و واسته‌کاری (الوساطة) و سیخوڕی (التجسس) و ئاشکراکرنا نھێنیان (كشف الاسرار) و حیله و حه‌واله و خاپاندن و سه‌ردابرن(الخداع) و ھه‌می ره‌نگێت ئه‌زیه‌تێ (جمیع انواع الإذاء) و غه‌یبه‌ت و نه‌کامی (الغیبة) و ئاخفتن ڤه‌گوھێزی (النمیمة) و تانھاڤێژی (الطعن) و دره‌و (الكذب) و ب ھه‌می ره‌نگێت خۆڤه یا بچویک و یا مه‌زن و یا سپی و یا ره‌ش، و تڕانه‌کرن ب خه‌لکی (الاستهزاء) و خه‌به‌ر گۆتن و ئه‌زمان زڤری (الشتائم) و تۆمه‌تبارکرنا ده‌ھمه‌ن پاقژان (قذف الناس).
