ب / مرۆڤ ژ رويمەتيێ بترسيت گەلەك و گەلەك باشە، چونكى رويمەتى يا حەرامە و نەبەس يا حەرامە بەلكى كار و كريارێت مرۆڤى دهەرفينيت و چو خێرێ تێدا ناهێلێت، و ژ خێرێ ڤالادكەت، لەوا دڤێت مرۆڤ گەلەك و گەلەك ژ رويمەتيێ هشيار بيت. و رويمەتى ئەوە تو كارێ باش و خێرێ بكەى نەبۆ خودێ، و ئنيەت تە پێ خەلك و مەدحە و پەسن و ناڤئينان بيت، و دراستا رويمەتيێدا پێغەمبەرێ خۆشتڤى (سلاڤێت خودێ لێ بن) دبێژيت: خودايێ مەزن دبێژيت: ب راستى ئەز ژ هەمى شريكان ژ شريكيێ بێمەنترم (ئانكو ئەز پێدڤى شريكى نينم و من هەوجەيى پێ نينە) ڤێجا هەركەسێ كارەكى بكەت ئێكێ دى دگەل من پشكداركەت، ئەز قەبويل ناكەم و دێ بۆ يێ دى هێلم. ديسا دبێژيت: مرۆڤێ ئێكێ رۆژا قيامەتێ حسێبا وى دهێتەكرن، زەلامەكە شەهيد بووى، ئينا دەف و نيعمەتێت خۆ بۆ دانە نياسين و وى ژى ل سەر خۆ ئاشكراكرن، گۆت: تە چ ب ڤان نيعمەتان كر؟ گۆت: من بۆتە شەر كر هەتا ئەز شەهيد بوويم، گۆت: تو درەوا دكەى، بەلێ تە شەر كر دابێژن يێ ب جسارەتە، و هاتە گۆتن، پاشى فەرمان پێ هاتە دان و ل سەر نافچاڤان هاتە راكێشان هەتا هاڤێتيە د ئاگريدا، و زەلامەكە زانين وەرگرتى و زانين داى و قورئان خواندى ئينا دەف و نيعمەتێت خۆ بۆ دانە نياسين و وى ژى ل سەر خۆ ئاشكراكرن، گۆت: تە چ ب ڤان نيعمەتان كر؟ گۆت: من بۆ تە زانين وەرگرت و زانين دا و قورئان خواند، گۆت: تو درەوا دكەى، بەلێ تە زانين وەرگرت و زانين دا و قورئان خواند، دابێژن، قورئان خوينە، و هاتە گۆتن، پاشى فەرمان پێ هاتە دان و ل سەر سەر و چاڤان هاتە راكێشان هەتا هاڤێتيە د ئاگريدا، و زەلامەكە خودێ يا ل بەر دەستى بەرفرەهكرى و هەمى رەنگێت مالى يێت داينێ، ئينا دەف و نيعمەتێت خۆ بۆ دانە نياسين و وى ژى ل سەر خۆ ئاشكراكرن، گۆت: تە چ ب ڤان نيعمەتان كر؟ گۆت: من چو رێك نەهێلاينە تو حەزكەى تێدا بێتە مەزاختن هەكە من تێدا نەمەزاختبن، گۆت: تو درەوا دكەى، بەلێ تە كر، دابێژن، يێ مەردە، و هاتە گۆتن، پاشى فەرمان پێ هاتە دان و ل سەر سەر و چاڤان هاتە راكێشان هەتا هاڤێتيە د ئاگريدا. ديسا دبێژيت: هەركەسێ رويمەتيێ بكەت خودێ رۆژا قيامەتێ دێ وى شەرمزاركەت، و هەركەسێ كارێ خۆ يێ باش ئاشكراكەت دا د چاڤێت خەلكيدا مەزن ببيت، خودێ دێ رۆژا قيامەتێ راستيا وى بۆ خەلكى ئاشكراكەت. ديسا دبێژيت: هەركەسێ زانينەكێ ژ وان يێت رازيبوونا خودێ هەر ب هێز و مەزن پێ تێتە خواستن فێر ببيت، و فێرنابيت بۆ هندێ نەبيت دا متا و پەرتالەك ژ دنيايێ بگەهيتێ، وى رۆژا قيامەتێ بێهنا بەحەشتێ نەديت.
بەلێ دێ چ كارێ مرۆڤى د بازنێ رويمەتيێدا هێليت يان دەرێخيت ئنيەتە هەكە ئنيەتا من ف من بيت و بۆ خودێ بيت و يا دورست بيت ئەز د كارێ خۆدا دێ يێ بەردەوام بم خەلك چ دبێژيت بلا وەبێژيت خودێ چێتر دزانيت، كا چ د دلێ من دايە، نەخاسمە پێغەمبەرێ خۆشتڤى (سلاڤێت خودێ لێ بن) دبێژيت: ب راستى هەمى كار و كريار ب ئنيەتانە، و ب راستى بۆ هەر مرۆڤەكى كا چ ئنيەت ئينايە دێ ئەو بيت، ڤێجا هەكە ئنيەتا مەدحە و رويمەتى نەبيت يا بەردەوامبە و گوهێ خۆ نەدە چو ئاخفتنان. ل ڤێرێ فەرە ئەم ئيشارەتێ بدەينە تشتەكى هندەك هزر دكەن رويمەتيە و ئەو ب خۆ وەسا نينە ئەو ژى حەژێكرنا خەلكى و مەدحە و پەسەنا وان و ژێ خەبەردانا وان و ب ناڤ و دەنگكەتنا خودانێ كارێ باش يێ كار و كريارێت باش بكەت تشتەكێ ئاساييە خەلك مەدحێت وى بكەت و حەژێ بكەت، ئەڤە نەرويمەتيە. ئەبو زەر (خودێ ژێ رازی بیت) دبێژيت: ئێكى گۆتە پێغەمبەرێ خودێ (سلاڤێت خودێ لێ بن) تو چ دبێژى بۆ وى مرۆڤى يێ كارێ خێرێ دكەت و خەلك ژبەر هندێ مەدحێت وى بكەن؟ گۆت: ئەو مزگينيا لەزلێكريە بۆ خودان باوەرى، و خودێ چێتر دزانيت.
