ب / دڤێت ئەم بزانين خودێ مەزن فەرمانا ژن و مێران وەكى ئێك يا كرى نەزەر و بەرێخۆدانا حەرام نەكەن، د راستا زەلاماندا دبێژيت: ((قُل لِّلْمُؤْمِنِينَ يَغُضُّوا مِنْ أَبْصَارِهِمْ وَيَحْفَظُوا فُرُوجَهُمْ ذَٰلِكَ أَزْكَىٰ لَهُمْ إِنَّ اللَّهَ خَبِيرٌ بِمَا يَصْنَعُونَ)) و بێژە خودان باوەران، بلا چاڤێ خۆ ژ بەرێخۆدانا نەدورست و حەرام وەرگێرن، و بلا دەهمەن و نامويسا خۆ بپارێزن، ئەڤە بۆ وان چێتر و پاقژترە بكەڤنە د پيساتيا گونەهێدا، ب راستى خودێ ئاگەهدارى وێيە، ئەوا ئەو دكەن. و د راستا ژناندا دبێژيت: ((وَقُل لِّلْمُؤْمِنَاتِ يَغْضُضْنَ مِنْ أَبْصَارِهِنَّ وَيَحْفَظْنَ فُرُوجَهُنَّ)) و بێژە ژنێت خودان باوەر بلا چاڤێت خۆ ژ بەرێخۆدانا نەدورست و حەرام وەرگێرن، و بلا دەهمەن و نامويسا خۆ بپارێزن. ژ هەردوو ئايەتان بەرێخۆدانا حەرام و نەدورست نەزەرە و ئەمرێ مە هەميان يێ هاتيەكرن ئەم ـ چ ژن چ مێر ـ خۆ ژێ بپارێزين، بەلێ ئەرێ نەزەر بەرێخۆدانە يان ئەو بەرێخۆدانە يا ئنيەتا خراب دگەل و مەخسەد تێدا و تيرێت شەيتانى دگەل تێكەل، و هەكە ب ڤێ ئنيەتێ زەلام و ژنان بەرێ خۆ دا ئێك و دوو ئەو هنگى نەزەركر و كەفتنە د حەراميدا، و بلا بزانن بەرێخۆدانا حەرام و نەزەر رەنگەكە ژ رەنگێت زنايێ. پێغەمبەرێ خۆشتڤى (سلاڤێت خودێ لێ بن) دبێژيت: (العينان تزنيان وزناهما النظر) ئانكو: چاڤ زنايێ دكەن و زنايا وان بەرێخۆدانە. ڤێجا دڤێت ژن و زەلام ژ خودێ بترسن و هەكە ڤەشارتى و ب دزيڤە بەرێخۆدانا حەرام كر و كەس پێ نەحەسيا، بلا بزانن ئەو نەشێن ل خودێ ڤەشێرن، خودێ مەزن دبێژيت: ((يَعْلَمُ مَا يُسِرُّونَ وَمَا يُعْلِنُونَ إِنَّهُ عَلِيمٌ بِذَاتِ الصُّدُورِ)) خودێ ب ئاگەهە ژ وێ يا ئەو نەپەنى و ئاشكەرا، دكەن. ب راستى ئەو يێ ب ئاگەهە ژ وێ يا د دلان و سينگاندا ڤەشارتى. و د ئايەتەكا ديدا دبێژيت: ((يَعْلَمُ خَائِنَةَ الْأَعْيُنِ وَمَا تُخْفِي الصُّدُورُ)) خودێ خيانەتا چاڤان بەرێخۆدانا ب دزى و نهێنيڤە و د دلاندا ڤەشارتى، ژێ ب ئاگەهە. ژ ئەڤا بۆرى ديار دبيت بەرێخۆدانا بێ ئنيەتا خراب، و بەرێخۆدانا ئێكێ چو نينە و گونەهـ تێدا نينە، بەلێ گونەهـ يا د وێ بەرێخۆدانێدا ئەوا دويفرا دهێت و يا ب مەرەم، پێغەمبەرێ خۆشتڤى (سلاڤێت خودێ لێ بن) دبێژيتە عەلى (خودێ ژێ رازی بیت) (يا علي لاَ تُتْبِعِ النَّظرَة النَّظرَة فَإِنَّمَا لك الأُولَى وَلَيْسَتْ لك الآخِرَة) يا عەلى بەرێخۆدانێ دويف بەرێخۆدانێڤە نەبەردە يا ئێكێ بۆ تەيە و يا دووێ ل سەر تەيە، ئانكو: بەرێخۆدانا ب مەرەم يا گونەهە، ڤێجا هەرگاڤا ئەڤ بەرێخۆدانە د ناڤبەرا ژن و زەلاميدا چێ بوو ئەو يا حەرامە، و خودێ چێتر دزانيت.
