ب / دڤێت ئەم ژ خودێ بترسين و ئاخفتنا خۆ هەلسەنگينين بەرى بێژين و بزانين ئاخفتنا مە چەندا دورستە و چەند نەيا دورستە و پاشى ئاخفتنا خۆ بێژين، چونكى پێغەمبەر (سلاڤێت خودێ لێ بن) هەروەكى بوخارى (خودێ ژێ رازی بیت) ڤەدگێريت، دبێژيت: (وَإنَّ الْعبْدَ لَيتَكلَّمُ بالْكَلِمَة مِنْ سَخَط اللَّهِ تَعالى لا يُلْقي لهَا بالاً يهِوي بهَا في جَهَنَّم) و ب راستى بەندە يێ هەى ئاخفتنەكێ د نەرازيبوونا خودايێ مەزندا دئاخڤيت، هزرا خۆ تێدا ناكەت خودێ دێ پێ ئێخيتە د جەهنەمێدا. و د حەديسەكا ديدا هەروەكى ئيمام مالك و ترمزى ڤەدگێرن، دبێژيت: (وَإنَّ الرَّجُلَ لَيتَكَلَّمُ بالكَلِمة مِنْ سَخَط اللَّه مَا كَانَ يظنُّ أن تَبْلُغَ ما بلَغَتْ يكْتُبُ اللَّه لَهُ بهَا سَخَطهُ إلى يوْمِ يلْقَاهُ) و ب راستى بەندە يێ هەى ئاخفتنەكێ د نەرازيبوونا خودايێ مەزندا دئاخڤيت، هزر نەدكر دێ گەهيتە جهێ گەهشتيێ، خودێ نەرازيبوونيا خۆ دێ بۆ پێ نڤێسيت هەتا رۆژا دگەهيتێ. ڤێجا فەرە ئەم گەلەك هزرا خۆ بكەين بەرى ئەم بێژين ئەڤە بۆ خودێيە و ئەڤە نەبۆ خودێيە، و ئاشكرايە ئەڤ رێكخراوە ئەو مالێ ددەن و ئەو خزمەتا پێشكێش دكەن ژ خەلكيە و راگەهاندن و وێنەگرتنا وان باوەريآ بۆ خودانێ پارەى دورست دكەت پارێ وان كەفتە د جهێ خۆدا، و هەر د وى دەميدا باوەريێ بۆ خەلكى ژى چێكەت پشتەڤانيا ڤێ رێكخراوێ بكەن، هۆسا دێ بەردەوامى بۆ كارێ رێكخراوێ هەبيت، و ب بەردەواميا كارێ وێ بەردەواميە بۆ پێشكێشكرنا كارێ خێرێ بۆ هەژار و پێدڤيان، بەرێ خۆ بدێ كا راگەهاندن و وێنەكرنێ چ ئارمانجەكا پيرۆز ب جه ئينا، لەوا زانا دبێژن: هەكە ئاشكراكرنا خێرێ دێ بيتە ئەگەرێ چاڤلێكرنێ و راكێشانا خەلكى ئەو ژى خێرێ بكەن.. هنگى ئاشكراكرن ب خێرترە ژ ڤەشارتنا وێ، و كارێ رێكخراوێت خێرێ ژ ڤى رەنگيە. و ل دۆر ڤێ رامانآ موسلم ژ جەريرێ كورێ عەبدوللاى (خودێ ژێ رازی بیت)، ڤەدگێريت دبێژيت: دانێ ئێكێ ژ رۆژێ ئەم ل دەف پێغەمبەرێ خودێ بووين (سلاڤێت خودێ لێ بن) خەلكەكێ رويس و پارچەكا پەرۆكێ خيچ بەلەك يێ هريێ يان عەبايەك سەر ستۆيێ خۆدا بربوونە خوارێ، شيرێت وان د بەردابوون، بارا پتر، بەلكى هەمى ژ موزريان بوون، سەروچاڤێت پێغەمبەرێ خودێ (سلاڤێت خودێ لێ بن) گوهۆرين و تێك چۆن، پشتى ئەو هەژارى ب وانڤە ديتى، چۆ د ژۆرڤە پاشى دەركەفت ئەمرێ بيلالى كر بانگ دا و قامەت گرت، و نڤێژ كر پاشى خوتبە خواند، و گۆت: ((يَا أَيُّهَا النَّاسُ اتَّقُوا رَبَّكُمُ الَّذِي خَلَقَكُم مِّن نَّفْسٍ وَاحِدَةٍ وَخَلَقَ مِنْهَا زَوْجَهَا وَبَثَّ مِنْهُمَا رِجَالًا كَثِيرًا وَنِسَاءً وَاتَّقُوا اللَّهَ الَّذِي تَسَاءَلُونَ بِهِ وَالْأَرْحَامَ إِنَّ اللَّهَ كَانَ عَلَيْكُمْ رَقِيبًا)) خەلكينۆ پارێزكاريا خودايێ خۆ بكەن باوەريێ پێ بينن و بپەرێسن ئەوێ هوين ژ ئێك گيانى ب تنێ ئافراندين [و وى خودايى ژ وى گيانى هەڤسەرا وى ژێ چێكر و ژ ڤان هەردووكان گەلەك ژن و مێر دان و بەلاڤكرن، و هوين پارێزكاريا خودێ بكەن، ئەوێ هوين ب ناڤێ وى تشتان ژ ئێكدوو دخوازن، و هشيارى مرۆڤانيێ بن نەقەتينن ب راستى خودێ ل سەر هەوە زێرەڤانە. و ئايەتا دى يا دويماهيا سۆرەتا حەشرێ: ((يَا أَيُّهَا الَّذِينَ آمَنُوا اتَّقُوا اللَّهَ وَلْتَنظُرْ نَفْسٌ مَّا قَدَّمَتْ لِغَدٍ وَاتَّقُوا اللَّهَ إِنَّ اللَّهَ خَبِيرٌ بِمَا تَعْمَلُونَ)) گەلى خودان باوەران ژ خودێ بترسن، و هەر ئێك بلا بەرێ خۆ بدەتێ كا چ كار و كريار بۆ سوبەهى كرينە، و چ ل پێشيا خۆ هنارتيە، و ژ خودێ بترسن، ب راستى هەر تشتەكێ هوين دكەن خودێ ژێ ب ئاگەهە. زەلامى ژ دينارێ خۆ ژ دەرهەمێ خۆ ژ جلكێت خۆ ژ منا گەنمێ خۆ ژ منا قەسپێت خۆ، حەتا گۆت: خۆ ب كەرێ قەسپەكێ ژى، سەدەقە دا، زەلامەكێ ژ خەلكێ مەدينێ هات بوخچكەك ئينا نێزيك بوو دەستێ وى نەراگريت، بەلكى دورست نەراگرت، پاشى خەلكى دا دويفئێك، هەتا من دوو كۆمێت خوارنێ و جلكان ديتين، و هەتا من سەروچاڤێت پێغەمبەرێ خودێ (سلاڤێت خودێ لێ بن) ديتين گەش بووين دا بێژى زێرن، پاشى پێغەمبەرێ خودێ (سلاڤێت خودێ لێ بن) گۆت: هەركەسێ د موسلمانەتيێدا كارەكێ باش بكەت، خێرا وى كارى بۆ ويە، و خێرا هەركەسەكێ پشتى وى كار ب وى كارى بكەت، بێى كو تشتەك ژ خێرێت وان كێم ببيت، و هەركەسێ د موسلمانەتيێدا كارەكێ خراب بكەت، گونەها وى كارى بۆ ويە، و گونەها هەركەسەكێ پشتى وى كار ب وى كارى بكەت، بێى كو تشتەك ژ گونەهێت وان كێم ببيت، و خودێ چێتر دزانيت.
